Kan duhzawng hi a va mak ngai em!

Hmanni chu Aizawl khawpuiah hian ka lêng vêl a, chuta ka thil hmuh chu mak hi ka ti hle mai. Dawr ṭhenkhatah hian jean kekawr khûp ṭet nasa em em mai hi an lo zuar ṭeuh mai a, an lo khai ṭeuh mai hi ka hmu a. "He kekawr hi an lei duh loh chuan an zuar awm si lo a," ka ti a. Tichuan, "Engvangin nge he kekawr khûp ṭet em em he tia an zawrh tak le," ka ti mai mai a.

Mi ṭhenkhatin jean kekawr khûp ṭet deuh an ha hi chu ka hmu tawh tho a; an zawrh an khai hi chu ka la hmu lem lo a. Tichuan, ka ngaih­tuah chho ta zel a. "Chutiang, jean kekawr khûp ṭet deuh chu lo lei ta ni se, eng nge a nalhna tur emaw, a mawina tur ni ang," te ka ti mai mai a. Tichuan, "Hetianga jean kekawr khûp ṭet deuh mai nalh an tih a, mawi an tih a, ṭha an ti a nih chuan, jean kekawr zuartute hian a khûp lai chu nasa deuhin tiṭet vek se la, a ṭhat dawn hi maw le," ka ti rilru ta a.

Tin, jean kekawr a nih avanga a khûp ṭet deuh mai hi eng nge a nalh bikna emaw, a mawi bikna emaw hriat thiam a har hlein kei chuan ka hria. A nih loh leh jean kekawr ni lo, kekawr puan man to deuh deuhte ho hi a khûp lai hi tiṭet ta se la, an ha duh ang em le, an lei duh ang em le?

An hak duh ka ring hauh lo, an lei duh pawh ka ring hek lo. Chuti a nih chuan, kha jean kekawr khup ṭet hniar sur mai kha kan lei duhna leh kan hâk duhna rilrute kha eng ang rilru nge ni ta ang le? Kei chuan ka hrethiam pha ikhaw lo mai!

Mawi kan tih leh nalh kan tihte hi a va mak ta ngai em! Heti a nih chuan, "Jean kekawr zuartu zawng zawngte u, in jean kekawr zawrh kha a khûp lai kha tiṭet vek ang che u. Tichuan, in hralh zur zur mai ang." Tunah chuan kan awm dan hi a letling nge, a linglet pawh ka hrethiam ta nek lo ve. Nangni, eng nge in hmuh ve dan le? Jean kekawr a nih avanga khûp ṭet nalhna chhan emaw, a mawina chhan emaw hi khawvela thil hriattiam har pawl tak a ni mai lo maw? Kan rilru hi a ṭet ta zawk em ni ang?!

T.V.-ahte hian hetiang jean kekawr khûp ṭet ha hi chu hmuh zeuh tur chu a awm, 'mi tih dan apiang lakte pawh hi a ṭha ber em?' tihte hi ngaihtuah a va ngai em. Kan hmasawn dan pui roh hi inbihchian a ṭul hle lo maw? Jean kekawr khûp ṭet deuh hak hi hmasawnna a ni thei ang em?

Hmasawnna a nih theih chuan, hmasawnna ṭet a ni mai lo'ng maw. Mi thil chik deuh leh mi hawi zau deuhten han sawi fiah teh u le. Kei chu ka mawl em a, engmah hi ka hre ve lo a nia aw.

- C. Lalneihliana Bethlehem Vengthlang