Mobile games hi a hun leh hmun hria ang u

Mihring nun hian hlimna ringawt a zawn chuan a bul lawkah hlim lo an lo awm tel fo ṭhin. Mahni chauh inngaihtuah mi chu mi indaihzai lo tak an ni fo bawk.

Ṭhiante biak pawh hre mang lo khawpa mobile games kan khelh luih luih lai hian PUBG hre ve lo te chu helper aṭangin mistiri-ah an lo kai sang a, ni khatah Rs 700 chuang te an lo hlawh daih mai. 

Hun hmasa lamah chuan chhungkuaah remote kan inchuh a, landline telephone hmang rei kan inhau a, hei, vawiinah chuan TV en ṭha peih a ram pawh kan awm mang tawh lova, office-ah lo phei chuan landline telephone kan nei ta mang hlawm lo. 

Kan inhauhna pawh a changkang ve tial tial a, kan bul maia ṭhu, phone a khamphei zawnga kenga bih ngur ngur ten kan biak an hre lova, an ṭawng mawlh mawlh bawk si. Keini min chhang lova, hmuh theih loh an phone a mi an chhang thung si. 

Nupa tam tak inhauh phahna, inngaizawng tam tak intih tau-rauna, hun hlutna awmzia hriat loh tirtu hi khelh loh tawp tur ni lovin a chin tawk hriat a ṭha mang e. 

Chhunlama tlangval sek pui pui ṭhuthlengseiah mu chunga an han PUBG nileng ngawt mai te hi aw... Lehkha zirlai tam tak lah an zirlai a ti bahlah bawk. 

Hri leng avangin kan in lockdown a, kan Police te pawh pawn lamah duty hmel hmuh tur an tam hle. Rim lah an rim narawh e, an hah ṭhin ngawt ang. 

Chutihlaiin Police mobile games khel pawh hmuh tur an tam hle bawk. Ding reng tura beisei an ni lo. Sorkar thuchhuah mek intlanchhawk a ni, motor tlan pawh en hman lo khawpa Phone en ngur ngur zel mai, hawi pawh hawi chhuak eih lo te hi chu insiamṭhat ve hret kan ngai em aw!

Tun hnaia Thenzawl thil thleng pawh hi Chakma ṭhian dun pahnih te hian Police duty an paltlang nual hmel a, hei ai hian kan force mi te hi taima leh zual se hotute dan leh thupek chhuah tam tak hi zawm a hlawh ang a, a hlawhtling bawk ang. 

Tih tur tam tak min ṭhulh tirtu hi kan hlawkpui viau erawh chuan a lawmawm lam ni se.