Festival kan hman danin ramdang khualzin a hip tawk lo

Kan ram leilung mawina leh hriselna te ramdang lakah kan chhuangin kan sawi ṭhin a. Kan boruak la thianghlimzia phei chu kan Chief Minister ni mek Pu Zoramthanga chuan sawi foin, ram dangah hralh theih ni se tih ṭawngkam ang deuha ngaih theih tur hialten a sawi a ni.

Kan ram chhungah sawrkarin a hriatpuia intihhlimna hun hman ṭhin Chapchar Kut, Anthurium Festival, Thalfavang Kut etc. te a awm ve a, a lawm tura inbuatsaihin Minister leh sawrkar hotute an ṭhukhawm ṭhin.

Tun ṭum ah pawh Anthurium Festival Mizoram sawrkar kaihhruaina hnuaiah kum 20 dawn hman a lo ni ta a, tuna kan hmandan leh a bul kan ṭan tirha kan hman dan hi ala danglam teh chiam lo.

Anthurium pangpar ramdang aṭanga kan lak luh hmingchawiin Festival kan buatsaih ṭhin a, kan hmanna hmun pawh a tlang­puiin Reiek tlang leh a chhehvel khua niin, hmandan tur ruahmanah chuan item nei turte ruat niin chung zingah chuan kan sawrkar hotute CM, Minister, sawrkawr officer leh a dangte hming alang deuh tlanpui.

Hetiang Festival kan hmanna tura sum min petute hian kum tam tak min pek tawhah hian hmasawnna engnge kan hmuh tiin min zawt ta se tute kohhran khawmpui kalkhawm ang thurel ang deuhin a ngai te bawkin kal ang aw tih velah hian kan la in awi nung mai mai ni hian a hriat.

Tourim depart­ment enkawltute hian kan ram mawina leh kan nunphung (culture) pholanga kan ram leilung, nungcha, kan luidung mawina leh hlutna pho chhuah lam ai chuan hmunhma siam chawp leh changkang ve deuha cheibawl an tumna policy hi paih bo ngam tawh se. Hetiang ringawta sum siam hi tum loin keimahni nihna phung dik tak (original) pholang hian khualzin tam zawk hip dan hi chu a awm ngei ang.

Hnampui leh ram changkang zawkte hian kan ramah hian changkang leh ropui tak hmuh an beisei lo; chu ai chuan kan nundan phung kan environment ṭha em em te hi an hmu duh zawk ang.

Kan sawrkar hotu lute pawhin kan ram boruak thianghlimzia an sawi chamchi ang hian Tourism department hotute hian hmunhma sak vak emaw, thil awmsa cheibawl vak lo hian kan awmdan sa aṭanga kan ram mawina hi tih hmasawn dan ngaihtuah zawk se. Engemaw Festival buatsaih a hun hman dan tur duan sa kaldan pangngai zawm leh ringawt lo hian kan kalphung hi thlak a ṭul tawh a ni.

Hmasawnna kan duh rual hian Department officer tena sum an siamna tur hmasawnna ringawt ni lo se. Tou­rism tih hmasawn kan duh a nih chuan ram hmunhma cheibawl vak emaw, siam danglam vak ai chuan kan awmdan sa kan ram leilung mawina lang chhuak si a, khualzinte hip khawm dan ngaihtuah hi a hun tawh hle a ni.

- Lalnunzira Chawngthu