AMC inthlan versus MLA inthlan
Kum 2013 inthlanah khan Aizawl Municipal Corporation (AMC) lama councillor zingah MLA-a candidate an awm ve nual a, a tling ta chu sawi tur an awm ta chiah lo a ni awm e. Tun ṭumah hian MLA inthlan a lo hnai leh ta a, AMC inthlan leh MLA inthlan boruak hi han sawi lan ve hrim hrim chakna a lian a, ngaihtuahna ti thuitu a nih theih ka beisei a ni.
Tichuan han ziak nghal phawng mai ta ila. AMC-ah khan MNF-in sorkarna an siam tlat mai a, hei hi kum 2018 MLA inthlana Aizawl bial ti ngaihnawmtu tur chu a ni dawn a ni. AMC inthlanah pawh an tlin chuan MNF hian Aizawl bial hi an hui deuh duak ang a, Aizawl khaw pawna an tlinna nen belhkhawmin sorkarna pawh an siam dawn a ni mai thei a ni, hei hi politics chhiarkawp chhut theih dan pakhat langsar tak chu a ni.
A pahnihnaah chuan kan sawi leh ta ila. AMC term hmasa berah khan Congress khan sorkarna kha an siam lova, a inthlan kual chhen hnu kha chuan an in sorkar chhawk den den a, sorkarna an siam kha chu kan hre ṭheuh awm e.
Keia sawi tum tak chu khatia Congress-in AMC-a seat an hloh ṭeuh avang khan opposition lam kha an phurin kum 2013-a MLA inthlan kha an thlir ta ṭhup mai a, mahse a result a lo chhuak a, AMC-a kan thlan tlin duh hleih loh kha MLA lamah chuan kan lo la duh em em chu niin, Congress chuan Aizawl khawpui chu an hui fai deuh vek mai a, politics chhiarkawp hmasa zawk nen chuan a lo danglam leh ta a ni.
AMC inthlan hnuhnung ber kha MNF-in an tih fuh chu an mal din ngam kha a ni a, Congress khan MPC an thurualpuia an duhawm kha an chân phah ta a ni. MPC mi leh sa, candidate atana itawm fahran lohte khan an han din tir vei thul a, a tawpah chuan AMC sorkarna an hloh phah kan ti thei ang. Politics chhiarkawp ni lo chhiarkawp pangngai aṭanga kan chhut chian chuan AMC-a MNF vote zawng zawngin Congress an hnehna kha chu sawi tham kha a ni lova, bial ṭhenkhatah khan vote tlem te te in an tling a, chu chu sorkar siamna atan a tawk lek a ni.
Tichuan, MLA inthlan lo awm tur leh AMC inthlan kal ta chu politics chhiarkawpa chawh ka han tum ve ta a, ka chawk thiam reng reng lo tih kum 2010-a AMC inthlan hmasa ber leh kum 2013-a MLA inthlan result aṭangin a chiang leh ta si a ni.
- Lalhmachhuana Hnamte