Abu Mazumdar leh Mizoram sorkar
February 7, 2022 khan MNF party chuan Press Release hmangin thuchhuah an siam a. Chutah chuan hei hi a inziak - "Abu Majumdar-a hian Assam CM hi New Delhi a thlen khalh nghe nghe a, Mizoram House-ah Pu Zoramthanga leh a ṭawiawmtute hi va hmu hmasain, anni chuan ani chu anmahni lam Assam House-a thleng turin an lo kawhhmuh nghe nghe a, Assam House-ah hian Minister Atul Bora nen an thleng dun ta nghe nghe a ni. Zanriah kilhonaah pawh hian Abu Majumdar-a hi a tir lamah a lut ve mai nghal lo nghe nghe a, Assam CM hnenah 'I sawm a ni lo'm ni, pawnah a awm' an tih takah chauh Assam CM hian a kohluhtir tih hriat a ni," tih hi.
Khi thu khi han chhiar nawn leh ṭhin ula Mizo tlangval thinlung hi a na tawlh tawlh lo thei lo. Khi thua inziak chiang tak chu ramri chinfel tuma Pu Zoramthanga leh Himanta Biswa Sarma an inbiak vel dawn lai khan he pa Abu Mazumdar hi a lo inrawlh ve sek tih a ni. Chief Minister pahnih indawrna leh ramri chungchanga boruak sang tak karah sorkar official pawh ni ve hlei lo a lo inrawlh tlat mai hi a mak a ni. He pa hi Assam sorkar chuan kuhva tawlh ruk thubuai siamsakin tun hnuah an man nghe nghe tih hriat phei chuan a sawmtu zawka puh Assam lam hi an ti mak ngawt a ni.
BJP Mizoram lah an lo awm mai mai bik lova. NDA lama an awmpui leh NEDA-a an thurualpui MNF hi an khei an khei mai a ni. Lok Sabha inthlana MNF MP berin Amit Shah hnena lawmthu sawi chunga CAB a pass pui tawh hnu pawhin Mizoram BJP hian MNF hi an unau chei duh tak tak lova, hei hi BJP MLA neih chhun BD Chakma hi ruling lama an ṭhut tir duh loh vang niin an sawi a. BJP Mizoram chuan Assam lamah Abu Mazumdar hi an hruai a nih leh nih loh an zuk umzui ta a, Assam lam chuan Abu Mazumdar chu Mizoram lam hruai ngei a nih thu an sawi tih BJP hian thuchhuah meuh neiin an han sawi ve leh hnuhnawh a. Mizoram BJP ngei maiin Abu Mazumdar hi Assam BJP sorkar hruai ni lovin Mizorama MNF sorkar lam hruai a ni tih an rawn puang zui.
Mizoram BJP chuan Assam Chief Minister Secretary Jyanta Malla Barua an biak pawh thu leh ani hian Abu Mazumdar chu Mizoram sawm a nih thu an rawn ziak a ni.
MNF Thuchhuah kan en chuan, "Mizoram House-ah Pu Zoramthanga leh a ṭawiawmtute hi va hmu hmasain," tih a awm a, ramri chungchang inbiak hma khan he pa hian kan Chief Minister zahawm tak hi a lo va hmu hmasa tlat mai. Hetiang anga hun pawimawh bikah pawh Abu Mazumdar hian Pu Zoramthanga hi Mizoram House-ah a va tlawh tih a lang. Ngaih a ṭha lo a, chu bakah MNF Party thuchhuaha a lan dan chuan "anni chuan ani chu anmahni lam Assam House-a thleng turin an lo kawhhmuh nghe nghe a," tih a ni a, vai pa hausa ve tak mai thlenna tur kawhhmuh a ngai pawh hi a mak riau.
Hotel lian leh ropui a tam tehlul nen smuggler hausa tia tun hnua an sawi ni si hian Mizoram House lamah kan Chief Minister a va hmu zet a, kan CM hote hian a thlenna tur atan Assam House an lo kawhhmuh avang hian mikhual leh hmelhriat loh mi naran chu a ni lo tih a lang chhuak leh ta a ni.
He pa Abu Mazumdar hi a nihna keini chuan hre ve lo mah ila Assam lam media chuan 'smuggler' an tih loh pawhin smuggler-a puh a nih thu an ziak. He pa hi Mizoramah hian a tlangnel fe ni tur a ni, kan buhfai ei tur pawh lian tham tak hian a lo supply chur chur a nih awm chu. He smuggler-a puh tel lo hian supplier an hmu zo lo em ni tih hi zawhnaa ni.
Buhfai supplier tih aṭanga chhui zawn theih pakhat a awm leh chat a, Kolkasib lamah September thla khan Abu Mazumdar hi an hmu. An hmuhna hi sorkar function pawimawh Fast Track Court lungphum phumnaah a ni.
Kolasib lamah hian Supply Minister inah chawhlui a kil lai thlalak chiang takin a awm bawk. Kolasib-ah Supply Minister inah chawhlui a kil a, amah hi buhfai supplier a ni bawk. Smuggler lian tiin Assam lam chuan an man bawk si a, thil hi chiang lo ruai hian a chiang angreng ta em em si a, he thilah hian Abu Mazumdar thiltih theihzia a lang chiang hle tihna a ni. Assam chuan an man a, bail in a chhuak mek tih laiin kan Minister inah chaw a ei thei a, he thil hi kan ngawi ral mai mai dawn nge Abu Mazumdar awm dan hi chiang takin an sawifiah dawn kan hotute hian?
Hei hi politics lama lak phet tum lovin CYMA leh MZP leh MSU tih te pawh an ṭawng chhuah a hun tawh tehlul nen tun hnai ah hian kan NGO lian te hian beisei an la phak lo char char mai. Hnathawh nei lem lova motor lei thei NGO hruaitu, an thawh mekna lama an hlawh ang hlawhte aia che lian zawk NGO hruaitu kan neih leh Abu Mazumdar chungchanga an ngawi duk mai hian inzawmna nei lo hram se Mizo ṭhalai te hian kan va ti em. Mizoram sorkar hruaitute hmelhriat ṭha tak Abu Mazumdar hi Assam hian smuggling thubuai an lo siam sak ve tawp mai a, Assam hi an tiawm lo a ni.
(Source: MNF Press Release - Memo No.MNF/Media/03/2022/366 Dt.07.02.2022.; https://zalen.in/detail/zpm-in... ; BJP Mizoram Pradesh Press Release; https://theprint.in/india/smug...)
- Lalhlimpuia (PuiPuia)