Zephyr Drama ‘Ropui khawp mai’ leh Mizoram khawvel

Zofate zinga ‘Ennawm Khawvel’ (Entertainment) huanga hlawhtling ber pawl chu Zephyr Drama Club hotupa H. Lalrotluanga (Mapuia Hauhnar) hi a ni tih kan hre vek awm e. Tun hnaia Zephyr Drama Club lemchan thar ber ‘Ropui khawp mai’ tih chu Social Media lamah video tawi te te dah a ni a; Runmawi Apps lamah ₹250/- in a video hi lei tur a awm a, darkar 1:47:23-a sei a ni. Tun ṭuma Zephyr Drama Club lemchan hian vawiin khawvela Mizoram dinhmun tlangpui a tarlang chiang hle a. Social Media lama Politics Group–ah pawh sawi zui a hlawh hle a nih hi.

Ram kan vei takzet ta

A tira kan sawi tawh angin Zofate zinga mipui ngaihzawn rawn leh min tihlimtu, huhang ngah em emin Lemchan hmanga Mizoram a veizia a tilang hi a lawmawm hle a. Vawiina kan Sorkar hrawn mek leh kan hrawn tawhte hian Mizoram hi kan hmangaih tawk lohzia a tarlang chiang hle a. Mizoram hi Politics, Kohhran leh Mipuite hmang hian kan la siam ṭha thei a ni tih min tarlansak a. Fiamthu nuizatthlak tak phena Mizoram dik lohna leh inenfiah kan ngaihzia a tarlante hi, nuih liam mai loa a tak ngeia siam ṭhatu kan nihna tur ni se, a lawmawm hle ang. Chu chu he lemchan pawh hian a tum ber leh min zirtir chu a ni. Hetianga Mizote zinga arsi lian takin kan ram a veizia han hmuh hian, a thlamuanthlak hle a; rah ṭha tak chhuah mawlh teh se.

Kohhran sum vawnghim thei, Sorkar sum vawnghim thei lo

Mizorama Sorkar hruaitu kan neihte hi Kohhran Upa, Sunday Sikul Zirtirtu leh khawtlang tan pawha mi chunga leng an ni deuh zel ti ila kan sawi sual awm lo e. Kan ram rorelna sang ber Assembly House-a ṭhute hi Kristian deuh vek kan ni bawk a; kohhran tan pawha mi ṭangkai tak takte an ni hlawm. Mahse chu'ngte chuan Politics khawvela an luh chiah hian sum leh pai an vawng him thei ta lo tlat hi a mak em em a; keini ang Politics hrethiam lo leh hre thuk ve lo tan chuan – a mak tih mai loh chu sawi tur a awm lo. Kristian kan nihna leh Kohhran Upa kan nihna hian Kohhran huangchhung bak a pel ta meuh lo tih, he lemchan hian chiang takin min tarlan nawnsak a ni. Chuvangin Mizote hian dikna leh rinawmna hi kohhran pawnah, kan ram rorelna – politics khawvelah pawh nunpui turin he lemchan hian min chah mawlh mawlh a ni.

Mizoram hian hmangaihtu tak tak a nei lo

He Lemchan hmuhnawm taka ṭawngkam lar tak chu ‘Mizoram hian hmangaihtu tak tak a nei lo’ tih hi a ni awm e. Hei hian Mizoram dinhmun chiang takin a tarlang a; Mizorama Sorkar kan hrawn tawh zawng zawngte ngaihtuah let hian a dikzia kan hrechiang hle awm e. Kristian ni lo ram hruaitu kan awh ngawih ngawih chhante hi Mizoram hian Mizote zingah hmangaihtu tak tak a nei lo tih a lang chiang hle. Hausakna leh Sorkara a fawng vuan a, dan leh hrai pal zut tam tak kan awmna chhan zawng zawngte hi Mizoram hian hmangaihtu tak tak a neih loh vang a ni tih he lemchan hian chiang takin min tarlan nawnsak bawk. Kan ramri buai rengte hi chinfel a hun tawh a; hnam dang nupui pasala neite pawh kan inenfiah a ngaihzia kan hmu bawk. Social Media maia phun lungawi loin, Mizote hian a tak tak ramah Mizoram siam ṭhaa hmangaih turin he lemchan hian min sawm nawn a ni.

Ṭhalai an fing tawh

Sum leh pai hmanga mi harsa zawkte rah beha vote zawnte hi ṭhalai tam takin kan duh tawh loh a ni tih he lemchan hmang hian kan hmu. Sorkar hna an thawh lai leh sum leh pai an neihna kawngah pawh mi dik tawk lo, puanhnuai thil awm ngeia kan hriatte hian kan ram leh hnam rorelna – politics chu luhchilhin rorelna fawng an vuan a. Chumi rah chhuah chu vawiin kan Mizoram hi a ni. Chuvangin ṭhalai, ram leh hnam vei tak takte chuan Mizoram hi ṭha se kan duh tawh em em a; sum leh pai hmanga lei theih nih kan duh tawh lo a. Mi ṭha leh kan duhzawng chu, Pathianin kan chhia leh ṭha hriatna min pek hmanga vote mai tur kan nihzia he lemchan hian min hriat nawntir a ni. Sum leh pai hmanga min leitute kan vote tlin rah chu – a thiam leh a tling tak takte aiin tihpuitu nei ṭhate tlinna Mizoram khawvelah kan dah a ni tih he lemchan hian a nemnghet zual a. Chuvangin, bum tlak awm tawh lo khawpa chhia Mizoram hi keini ṭhalaite hi chuan i chhandam mawlh ang u.

He lemchan tlawm tak, ṭha tak leh zirtir nei ṭha tak hmang hian Mizote hi harh ila; Mizoram tluchhe mek tungding leh tur hian nang leh kei bak hi kan awm lo a. Mipuite hian kan zir hmasak loh chuan ram hruaitu ṭha hi engtikah mah kan nei thei ngai dawn lo. Vei tur dik leh buaipui tur dik tak hi vei ila; kan ram leh hnam mamawh, kan chhungkaw mamawh hi buaipui hmasa tur kan nihziate hi hrechiang nawn ila. Chu chu a tak ngeia lanchhuahtir turin ke pen ila; Pathian rinchhan chungin Mizoram hi i siam ṭha mawlh ang u.

- Rinfela Zadeng