Thlirna chi dang

Dt. 17 Articles chhuaka Pu JL Liana thuziah kha ngaihnawm ka ti a, tunah hian a ngaihdan hnial lam ni loin, hetiang lo lam zawnga thlir dan kan ziak ve teh ang. Chutih rualin tawi te te in party dang pawhin chance an la neih ṭhat theih dan tur ziak tel nghal ila a ṭha awm e. Thlir dan hrang hrang a awm thei ang chu.

A thuziakah khan ZPM-in harsatna an tawh theih dan tur a thlirna aṭangin kawng hrang hrangin a rawn sawi a, a hnialawm loh hlawm hle. Chance an neih theih dan tur i han bih ve thung ang. CM tur hi chhawp chuak hma selangin, chu chu lungrual takin thlawp ngam se, chu chuan kawng thui tak a sah kuak ka ring.

MLA thlan chhuahten CM tur chu an la thlang ang tih hian mipui rintawk lohna leh en liam mai mai na a thlen duh - a chhan chu party tin hian en bik an nei ṭhin a ni. Chuti lo chuan Zoram tana hmalakna tur kawngah hriam taka thu sawi ngam a har. Tunlai khawvel inthlan leh India-ah ngei pawh hian hruaitu tur hi tih chian a ni

ṭhin. Chuta ṭang chuan mipui hian tehna an lek fo a ni. Tin Kawlphetha (power) leh thlai thar leina ( D A H ) policy etc. leh a dang te sawifiah thiamin chang chawi leh selangin. Thlai thar leina tur leh power ngah hi tunlai Zoram tuihalna a ni. Thlai thar leina awm se, Zoram mipui taihmakzia hmu vein ka in hria.

Thawk khat lai, Sawhthing tlema a man a ṭhat deuhlai khan, thingtlang lam unau te chu hlawh tam loh hlauin zing aṭangin an thawk chhuak mai. Chu chu power hmangin han process zui bawk se. Tin DAH policy hi a lo tih theih a mawn le? NLUP pawh sem theih a ni tlat. Inthlan a tlin hma pawh hian mipui hian thil sawina tur leh tlukluhna tur CM candidate an mamawh ṭhin. An khua leh veng tana plan leh project an lo neih te sawina tur an duh

ṭhin a ni. Tichuan, zoram dung leh vang han fang chhin se, a hlawk viau mai thei.

Congress ve thung

Mizoram mipui sukthlek leh dinhmun hre chiang bertu tuna CM ni mek Pu Hawla thluak hi tlinpui leh tham a ni. Zoram mipui hnuh dan turah hian a bo lo a, a hre bawk. Hemi ti thei tur chuan finnaa thuam a ni lo thei lo. Tin Party President an zah thiamna ringawt pawh hi entawntlak an ni. Chu bakah inthlan dawna candidate han siksawi velah pawh hian thu an awi thei hle a, in siamrem an hreh lohna hian sang takah a dah ṭhin. Party lian lo ni sa nen.

An party policy ti hlawh­tling tur hian theih tawpa tlan pawh an hreh lo. Inthlanah hian mi ṭhenkhat hi chuan policy ai hian candidate kan en zawk a ni. An mi leh sa eng emaw chen hi an la vawnhim theih chuan beih chu an la khirh viau mai thei. Tin Party-ah hian hnual rawihna khawpa boruak chhia an nei em em lo, hei hi an ṭhatna tur ponit-ah a tel thei ang. Lungawi lohna te tham hi chu thil kalphung ve a ni a, party tinah hian a awm vek.

MNF ve thung. Anni pawh hian chance sang tak an nei a ni. Mizoramah chuan Congress leh MNF hi party lian an ni a, mipui thinlungah pawh hian Congress a nih loh chuan MNF a ni mai tih ngaihdan hi a awm deuh roh a. Central-ah pawh a ni ve tho mai. Congress kaihhruai a nih loh pawhin BJP kaihhruai a ni tlangpui. Party policy sawi thiam an pun deuh a ngaiin a lang. He lamah hian hriam deuh hlawm se.

Tin Party President zahna kawngah inzir tur la awmin alang, an zah lo ni loin mipui level chungah dah thiam an mamawh em aw a tih theih. An Party-ah hian Pu Lalhmingthanga hi hmaih chi a ni lo maithei. Tlang hrang hrangah hian ‘pu’ a la vuan an la awm ṭeuh mai. Dah thiam dan a zirin bial hrang hrangah hian MNF la vote ngai lo hian an vote thei dawnin alang. Zuitu a la ngah hle.

Thil zawrh chung changah leh school timing chung chang hi a ṭha a, mahse mipui support khawpin an la sawi thiam lo deuh niin a lang. Mi pawi kan sawi em lo ang a, ngun taka thlir a, ka hmuh dan a ni e.

- VL Ruata