Shhhh... i hmai tuam rawh!

Fur lai a ni a, ruah a sur duh chur chur ngei mai. Tha za lo tak chung pawhin ruah sur hnuaiah ei kan zawn tlan a ngai mek. Ruah sur hnuaiah hna thawk turin ka inkhalh chhuak a, raincoat ka hak bakah ka hmai ka tuam thlap bawk a. 

Ramhlun North ka thleng, kawng sirah thlai thar zuar an lo awm. Hengho hian mahni thlai thar zawrhna tur hmun ṭha nei ve thei se aw tih chu rilruah a rawn lut nghal, chutah rilru khawih deuh dang ka hmu zui zat mai.

Ruah sur hnuaiah pitar pakhat hian thlai a zuar a, a hmai a tuam lo (mask a vuah lo tihna a nih chu), sorkar mit aṭang chuan chu pitar chu a va han sual turu kher em! Dan a zawm lo a, hrem theih leh man tur, pawisa chawitir tlak a ni, a ṭul phei kuan khenbeh hial tlak a ni mai a!

Pitar kiangah chuan police an lo kal a, ka hmuh lai ngei chuan hmai­tuamna (mask) a vuah loh vang chuan pawisa chawitir a ni. A mantu police chuan 'receipt' an pe thlap, an va ti felfai thlap thlap tak em. Bawngkawnah hmai tuam leh tuam lo an vai lai ka hmu phei leh a, an chanchin erawh ka hre zui ta lo thung. 

Zan lama ka chanchin thar ngaihtlak ka rilruah a rawn lut chhunzawm nghal. Hripui len laia dan zawm ṭha lo leh dan bawhchhia an man zat leh pawisa chawi zat an rawn puang zat zat a, a hnu lawkah sorkar thuneitu leh official ṭhenkhat chu hmaituamna (mask) vuah lo leh, vuah mumal lo chunga an ṭhukhawm lai an lang zui leh si. 

Thuneitu lam tan hmai tuam loa ṭhutkhawm khan hri hi a hlauhawm lo bik nge ni a, an awmna hmun a thianghlim leh changkan em avanga vuah ngai lo an nih bik le? Kawng sir a pitar tan a hlauhawm ang tho khan air conditioner hnuai ṭhute tan khan a hlauhawm dan a inang reng awm si a, midang kai darh thei vek an la ni zui - ngaihtuah mah teh u, a ho tlat. 

Hmanni chu bike in ka in khalh chhuak a, helmet (full face) ka khum avangin hmai tuamna ka vuah lem lo, ka helmet lak thlak ruala vuah mai turin ka kawr ipteah ka ak ṭha khiau thung. Aizawl Civil Hospital thlangah sawn min lo phar ding chat a, mask ka vuah loh vang a lo ni. 

Helmet full face khum avanga vuah lo ka nih thu ka sawi a, mahse mask ka vuah loh miau avangin dan zawm lo leh pawisa chawi tur ka ni - thiamthu sawi tur ka nei lo. Amaherawhchu, bike khalh chhung chuan mask vuah chu a thaw-ipik ka tih thu leh, a him tawk thoa ka hriat avangin ka insawi thiam ve luam a, ṭha taka vuah zuiin kan in ṭhaṭhen. 

Dan zawm leh thu pek ngai pawimawh lote hi dim tur an ni lo a, dan hmangin an phu ang tawk hremna pek hi thil nih dan tur dik tak a ni. Mi rethei pawhin kan retheihna chapo pui leh hmachhuana hmang ni awm taka thiam inchantir chawp nana hman hi kan tih loh tawp tur a ni.

Chutih rual chiah chuan, dan leh hrai hian thlei bik a nei tur a ni lo thung. Dan hi a siamtu leh kengkawhtute ngei pawhin an zawm ṭhat loh a, an palzut a nih chuan hremna an hmachhawn ve tho tur a ni ang. Thuneitu ṭhenkhatin hmaituamna vuah an ngaih pawimawh loh laia a reithei zawk sum laksak nana kan hmang leh lawi si a nih chuan rorelna dik a ni thei ngai lo ang. 

Kan hriat ngai loh leh cho rual loh Covid-19 a hrang mek a, sorkar leh mipui pawh in inzir chawp chungin kan hmachhawn tlang a ni. Thla thum chuang hna thawk mumal thei loin kan inkharkhip a ni a, thla bi hlawh nei ve lo tan chuan luhai thlak map map tak chu a ni.

Sum a vang a, ei leh in tur thawh chhuah pawh harsa tak a ni. Rethei leh mangang taka kan awm mek lai hian dan zawm loh leh tih fuh vak loh lai kan nei palh a nih pawhin inhriatthiamna sang tak awm thei hrem se tih hi a duhawm. Chutih rualin mipui pawhin min ngaidam leh mai ang tih vanga dan pal zam mai loin, kan zavaia ṭhat tlan nan thu i awih tlang ang u.