SEDP-in ringhleltute ka a hup

MNF sorkar chuan a intiam ang ngeiin SEDP chu a sem ṭan dawn ta a, SEDP sem a nih loh tur thu tai pawng pawnga lo tlang au pui ṭhinte ka an hup chho ta nghat nghat mai le.

SEDP hi a tirah nuai 3 tiam mahse hripui a len avangin sorkar hian pawisa a duh angin a nei ta lova, hripui dona atan a hman ral hnem em avangin Rs 25,000-in a sem phawt ang a, a la sem belh zel dawn a ni.

Thil hi a thlen hmaa haisen tak taka lo sawi kher loh tur a nih ṭhin laiin inti fing tak tak fing tluantling leh si loten Mizoram sum leh pai dinhmun thlirin SEDP a sem theih loh thu an sawi piap piap a nih kha.

Kan sorkar chuan sawichhiatna nasa tak karah a intiamna chu a tihlawhtling leh ṭan ta a, mipui beisei SEDP chu an sem ṭan dawn ta a ni.

SEDP ah hian intiamna ang chiah chiah sem a la nih loh chhan chu kan sawi tawh angin hripui leng vanga sum senna hriat lawk loh a tam vang mai a ni a, nuai 3 dawng tur pawhin nghah leh deuh ngai mahse nghah thlawn a ni lovang.

He MNF sorkar hi kum 2023 ah a tlin leh chuan nuai 3 hi chu kan dawng ngei ang tih ka kutphah tlukin ka chiang a ni.

Party inbeihna chu party mi chuan an hrethiam mai a, mahsela mipui hre lo zawkte bum tumna ang zia zanga SEDP sem a theih loh thu lo sawi kha an tam hle a. Tunah meuh chuanin e, SEDP sem theiin kan sorkar a inpeih ta at mai le.

He SEDP sem tur hian rah ṭha a chhuah ngei a rinawm a, thingtlangpa tan chuan Rs 25,000 chu sawi loh Rs 10,000 pawh hi a hlu a ni. Tuna sem chin hi khawpui mihausaten tlem tiin sawi hnawm tum mahse a dawngtu lam chuan sit lovin lawm takin an dawng ngei dawn si a.

- Zothanmawia