TU NGE KAN THLARAU LAM NUN CHAWM TA ANG? – by Kima Mivam

Tin, chung laia zirtirho an pun an pun lai chuan, an ni tin thil semah anmahni hmeithaite an ngaihsak ṭhin loh avangin Grik Judate chu Hebraite chungah an lo phunnawi ta a. Tin, sawm leh pahnihte chuan zirtir mipuite chu an ko va, “Pathian thu hril bansanin, dawhkanahte rawng kan bawl chuan a ṭha lo vang. Chutichuan unaute u, in zingah Thlarau leh fina khat mi hmingṭha hlir pasarih thlang rawh u, anni chu heng thil reltu atan hian kan siam ang; keini erawh chu ṭawngṭai leh thu rawngbawlin kan awm leh tlat zel ang,” an ti a. (Tirh 6:2-4)

Mizoramah harhna vawi tam a thleng tawh a, Aizawl Theological College Principal hlui, Rev. Vanlalchhuanawma phei chuan Harhna hi a thleng reng angin a sawi hial a ni. Mahse, Harhna a thlen apiang deuhthaw hian pawlthar/pawlchhuak an rawn langsar ngei ngei a, Mizoramah pawh Kohhran tenau te te nen ṭhahnem tak kan awm phah ta a ni. Heng hi eng vang nge ni ang? Pathian thu, a ziktluaka zir ve lem loten kan thlarau lam nun min chawm nasa mah mah a ni thei ang em? Revival Speaker leh Ruihhlo bawih aṭanga piangthar, Pathian thu sepsel te te zir ve ṭhinten min zirtir nasat avang hian kan ramah Harhna dik a thleng thei lo a ni mai ang em? Pathian thu thiam leh hre zawk, kan Pastor/Theologian ten kan ramah Harhna an pawchhuak ngai meuh lo va, a hre lo zawkte harhna ken lah an dodal zel bawk si; tun hma Kelkang harhna hmasaah phei chuan Sawrkar nena ṭang dunin, harhna chang ṭhenkhat chu Jail-ahte an khungtir kha! Kohhran kal sualna pakhat a ni mai lo maw? Kan Bible chang tarlan nen khian zirho dawn ila.

Bible-a Tirhkohte hna kha Tunlaia kan Pastorte hna hi a ni:

Tirhkohte kha Isua chanchin hre ber leh a thu tlangaupuitute an ni a. Anni thusawi kha miten an ring em em a, an thu leh hla pawhin mi tam tak a hneh a, anni kha a hranpain zirna sikul kal lo mah se, Isua bula awma inzir an ni a. Tirhkoh Paula'n Gamaliela ke bula seilian a nih thu a sawi ang khan, Isua zirtirte kha tirhkoh; a taka Isua ke bula seiliante an ni. Tichuan, thuhrilin khaw hrang hrangah an vak kual a, Isua hnung zuitute pawh an lo pung zel a ni. Tunlaia kan pathian thu thiamte (Pastor/Theologian) hi Isua ke bula seilian ang kha an ni a, a thu leh hla pawh hre ber tur leh zirchiang nasa ber an ni a. Pathian thuhril (Evangelisation) hna pawh an kut ken ber tur a ni ang. Bible pawh a chinchhuaka kum tam fe zirchianga luhpuitute an ni. Kohhran mite pawhin an Pathian thusawi a him kan tih ṭhin kha!

Upa thlanchhuah te kha Kohhran enkawltu tur an ni:

Kohhran a lo ṭhan len zel takah chuan Kohhran hmasaah khan innghirnghona a lo thleng ta a, an thil semah hmeithaite an hlamchhiah ni ngei tur a ni. Grik Judate chu Hebrai mite lakah an lungawi lo ṭan ta a ni. Tirhkohte khan thuhril rawngbawl hna an thawh a ngai si a, tichuan inrelbawlna felfai zawk keng turin Upa pasarih thlanchhuah an lo ni ta a, chu'ng chuan Kohhran inrelbawlna (Administration) an kengkawh tur a ni. Chutianga inrelbawlna kengkawh tur upate an thlan dawn chuan tirhkohte chuan, “Keini erawh chu ṭawngṭai leh thu rawngbawlin kan awm leh tlat zel ang,” an ti zawk a ni. Tirhkohte kha an rawngbawlna (thlarau nun chawm/Evangelism)-ah an chiang a, Kohhran inrelbawlna (Administration) lamah inhnuhluh buai an tum lo.

Upa thlan chhuah (Stefana te, Philipa te etc)-te hna ber tur chu Kohhran enkawl (Administration) a ni tihna a nih chu. Anni chuan Kohhran mite an hrechiang thei ber ang a, Isua chanchin hrila vak kual reng, Tirhkohte kha chuan an hrechiang ve vak lo ang. Chutiang chiahin Mizoramah pawh hian, kum nga lek rawn awm Pastor chuan kohhran mite dinhmun tak leh Kohhran member-te sukthlek chu an hrechiang lem lo zawk fo ang. Chuvangin, Kohhran administration atan chuan Kohhran Upate an ni tur a ni. Chutiang a nih mek lai chuan Pathian thu hril hna (Evanglisation) lamah hian Pastor te an intiral bang ta viau mai a. Rev. Adina, Hnahlan pastor bialtu ngei pawhin ama Facebook wall ah chuan “Evangelisation” hna chu Revival Speaker te hna deuh bik a nih thu a rawn sawi ta duah mai nih kha.

Baptistu Johana khan Baptisma a chantir ṭhin a, Thuhril hna leh thlamuan hna kha a thupui ber a ni a. Tunah chuan kan Pathian thu thiam (Pastor/Theologian) te chuan Baptisma chu an chantir ngei mai. Mahse, Thuhril leh mipuite thlamuanna hna an thawk ta meuh lo a ni. Covid boruak a san lai pawhin min rawn tlawh ngai lo va, kawngkam aṭang pawhin “In dam em?” min ti lo. Mahse, Lockdown boruak rip tak karah pawh pawisa khawn tur chuan an nau te, eng emaw zat chu an rawn tir leh du du tho si a. Thla tin, thawhlawm khawn an rawn lut zur zut mai a nih kha! Thlamuantu hmel ni lovin kan sum neih chhun chhun pawh inngaitlawm taka min dila min rawktu tur hmel kan hmu ngun zawk a nih kha!

Tunlai kohhrana Upa leh Pastor:

Tunlai Mizoram Kohhranah chuan Upate hna ber tur kha Pastor ten an khawih nasa ta hle a ni tih kan tarlang ta a. Pastor ten an hna ber tura ngaih, member-te thlarau nun chawm (Evangelisation) chu an thawk ta lo hle tih pawh a chiang ta bawk. Kohhran upate chu mahnia Pathian thu pawh mahnia zir ve bek bek an ni a, Pathian thu an sawiah pawh a felhlel a tam duh ngawt ang, a zirchhuak pawh ni ve lo tan chuan sawi huai pawh a har ang. Tunah chuan Bible sawi dan kan kalpui lo nasa ta hle tihna a ni. Pathian thu thiamten min thlamuan an tum tawh lo va. Upa tam tak pawh an intiral bang ta a, atua mahin Kohhran mipui min rawn ngaihven ta lo ṭan mek a nih hi. Tichuan, Revival Speaker leh an team te kan ruai a, Kohhran tihharh kan tum a, an phenah Kohhran hruaitute an lo inla tuavawn mek a nih hi. Anni'n Pathian thu him lo tak tak min fah leh si a, harhna dik lo tawk lo leh Pathian thu dik tawk lo tam tak min fah tawh ṭhin si a, pawlchhuak kan lo tam ta em em a nih tak hi maw?

Kharna:

Bible sawi anga kan kal dawn a nih chuan kan Pathian thu thiam (Pastor/Theologian) te hian Thuhril hna or Thlarau nun chawm hna hi an thupui ber ang a. Kohhran Upa te hi chuan Kohhran inrelbawlna lam (Administration) an khawih tur a ni. Kohhran inrelbawlna thawk tura thlanchhuah Stephana te ngei pawh chuan thuhril hna chu an thawk viau tho ang khan Upa te pawh thuhril hnaah an ral bang lo vang a, mahse Tirhkohte (Pastor/Theologian) chuan inrelbawlna an khawih hman loh avangin “Keini erawh chu ṭawngṭai leh thu rawngbawlin kan awm leh tlat zel ang,” tia Tirhkohte sawi ang khian, Kohhran Upa ho kutah Kohhran inrelbawlna an dah tur a ni ang. Tunah chuan Pastor te hian Kohhran inrelbawlnaah thu neih ber an tum a, an hna pui ber thlarau nun chawm an hlamchhiah ta mah mah a, kan ram a dam loh phah ta a ni. Kan rin pui ber Bible thu ang hian Kohhran inrelbawl hna chu Kohhran Upa ho kutah dah se, Thlarau lam nun chu kan Pathian thu thiamte ngei hian rawn chawm tawh rawh se. Tichuan kan ram a dam ang a, Kohhran hi a nung thar leh em em ang!

– by Kima Mivam