Tuipui khuain tomato an thar ṭha

Horticulture de­part­­ment puihna-in nikum khan Khaw­zawl leh Cham­phai inkar, Tuipui khua chuan a chin hun lo (off season) laiin tomato an ching a, an thar

ṭhat avangin kumin hian Horticulture department puihin chhungkaw 41 chuan fur laiin tomato an ching leh a, quintal sing chuang an tharchhuah an beisei.

Heng tomato hi Horticulture depart­ment Director Dr. Eli­zabeth Saipari leh a thawhpuite'n Ban­galore-a Indian Institute of Horti­cul­ture Research (IIHR) aṭanga an lak­chhuah a ni. Tomato hi thlasik thlai a ni a, fur laiin phai aṭanga manto tak taka lakluh a reh theih nan a chin hun loh, fur laia chin theih dan tur an ngaihtuah a, fur laia tomato tharchhuah chu thil har tak a ni thung.

Mahse Horticul­ture leh KVK te nen ṭangkawpin kum hmasa khan an enchhin a, a hlawh­tling dawn hle nia an hriat vangin kumin fur ruahtui tam lai tak khan ṭha takin a thar chhuak thei ta a ni.

Tuipui-a tomato an chin hi IIHR, Ban­galore chuan variety thar Arka Rakshah leh Arka Samrat siam chhuah a ni a, heng tomato variety te hian natna chi thum do theihna a nei a ni. Hei vang hian a thar chhuah pawh hi za zela 70 velin a tlem phah ṭhin niin mithiamte chuan an sawi. Chung natna chi thum do thei tuna Tuipui khuain an chin tak chu a tharchhuah pawh a ṭha a, a tui em em bawk a ni.

Heng tomato hi lo-ah thlai dang angin an ching ve mai a, a zamna tawite an siamah chuan zamin a rah ṭha em em mai a ni. October 10 khan a seng turin Minister PC Lalthanliana hoin department hotute nen a hmunah kan kal a, mak ka ti hial zawk a ni. Mahse a chi a ṭha a, lo neitute an phur em em bawk nen, thla hnih leh a chanve lekah an tharchhuak thei a ni.

Department hotu­te sawi dan chuan tomato hi ṭum khata thar huk loin, a tah­tawla tharchhuak turin a phun hun thlengin an enpui a, market a awm reng thei dawn a ni. Tunah hian Tuipui khua chuan nitin kg engemawzat an hralh chhuak reng a ni.

Hetianga depart­ment lamin theihtawp an chhuah zel chuan khaw dang pawhin kum leh lamah chuan uar zawkin ching ta se, phai lam aṭanga lak luh ngai miah loin han tharchhuak zel se a duhawm ngawt mai. Tuna an tharchhuah hi kg ah Rs. 60 in a hmunah a lei theih a, Silchar lam

aṭanga lakluh ai chuan Aizawl leh khawpui dangah pawh a aiin a tlawm daih theih dawn a ni.

- Lal Rinmawia