MI HLAUHAWM
Rom Emperor ropui Julius Kaisara kha a hun tâwpah phatsanin a awm a, a ṭhian ṭha leh khâwnbâwl upa, a mi rin takte khan an phatsan a. A khâwnbâwl upa (senator) Tillius Cimber-an a man bet thut a, chutianga a man beh lai chuan a khâwnbâwl leh a ṭhian nia a ngaihte chuan an rawn bawh huk a, chemte chuan an vit ta hrawih hrawih mai kha a ni a. A lam hnai leh a fapa ang maia a en, Marcus Junius Brutus-a meuh pawhin a phatsan tih a hriat chhuah chuan a tân a tlai lutuk ta. Mak tia meng bial kâwk kâwk chungin khawvel history-a ṭawngkam lâr tak ni zui ta "Et tu Brute?" ("Nang meuh pawhin maw Brutus?") tih ṭawngkam hi a chhakchhuak ta hial a ni.
Helaia inphatsanna runthlák tak hi English thu thiam hmingthang William Shakespeare-a play-ah khan mawi leh lungkuai deuh maia chhawpchhuah a ni a, college-ah te khan kan zir tui ve hle ṭhin kha a ni a.
Ni e, phatsanna hi a tenawm a, a ngeiawm a, kan Lalpa Isua Krista meuh pawh a thian bulhnai takin a phatsan a, tun thlengin "Judas" tih ṭawngkam chu ṭawngkam ngeiawm leh phatsanna ṭawngkam atan khawthlangho chuan an la hmang ta reng a nih hi. Mi phatsan chingte chu 'Judas' tiin tiel takin an ko zui ṭhin.
He khawvelah hian mi hlauhawm tam tak an awm a, ṭhenkhat chu misual pâwl anga inhlawm khâwm a, ho hran neia in kulh hrangte an ni ṭhin a, an bulhnaiah tumah an kal ngam lova, an ṭihkhai hle ṭhin. Ṭhenkhat chu mi rawk ching te, mi suam ching te, mi tih hlum thleng pawha hnial lo khawpa mi sualte an ni. Heng zawng zawng hi pâwn lam hmuh theih langsara kan hmelma anga kan ngaih theih, min tichhe thei an ni a, an laka inven leh sahimna zawn hi thil harsa lutuk a ni lem lo. Mahse, heng mite aia hlauhawm hi an awm! Chu chu kan ṭhian ṭha anga kan ngaih, kan bula awm reng, kan kawm ngeih êm êm, kan mi rin êm êm, kan hmaichhana min fak a, kan hnung lama kan chhiatna tur duh leh site hi kan tan mi hlauhawm an ni.
Politics khawvel aṭangin han sawi ta ila, inthlan dawna min hmangaih bertu niawm taka kan kephah pawh an fawp duh ang a tia inngaitlâwm a, kan inluah chhete tea rawn lêng lut ṭhinte kha ṭhenkhat chu rorelna lalṭhuthlenga an han ṭhut chiah hian an danglam ta daih ṭhin a. Kan vote beiseia kan khawngaihna rawn diltu khan kan chanai a fanghmano ei leh hmak hmak mai laia hi phatsanna a nih loh chuan hming dang vuah tur a vâng khawp nia!
Politics khawvelah hian inphatsanna tenawm tak tak hi a va thleng nasa ṭhin em! Thuneihna duh vanga mahni party chhuahsan ta lâwp lâwp te, awr phiar ṭawng ṭawnga an lo ṭan ṭhin an han sawichhe leh chiam mai ṭhinte hian lemchanna khawvel a nihzia a tilang chiang ṭhin ngawt mai.
Sikula kan pâwlpui, tlar khata ṭhuho ngei ngei pawh hi exam hall-ah chuan kan inhuphurh ru duh viau asin! Ṭhenawm ṭhenkhat hi chuan kan hriat lai chuan ṭhenawm ṭha kan nih thu an sawi kur duah a, mahse kan awm loh veleh tute hnenah emaw hrawn kan hrehawmzia sawiin min leh rêl phâr leh chiam pawh a ni mai thei. Mihring hi kan mak khawp a! Mi bula kan fak chiam hi midang bulah kan rêl leh chiam thei bawka! Chutiang mite chu a ni mi hlauhawm kan tih chu ni.
Chutianga kan hmalama min hmangaih ber niawm taka in lantir a, kan hnung lama min tihchhiat hreh leh si lo ṭhian neih ai chuan a langsara kan hmelmate hi hriat an awl zawk a, an laka inven pawh a awl zawk daih zuk nia. Ṭhian tak tak chu an hlu a, ṭhian der erawh chu mi hlauhawm tak an ni. Kan Bible chuan zawlnei derte laka fimkhur turin min chah a, chutiang bawkin keini pawh fakdertu lakah i fimkhur fo ang u.
Mi hlauhawm kan tih zingah hian nang chu lo tel ve duh hauh suh aw.
- PC Nghaklianmawia