Mizote’n kan danglamna i chawinung zel ang
Mizote hi danglamna riau kan nei a, hmelah chuan anpui chu kan ngah viau. Khawchhak lam mite leh India Northeast lamah hian kan anpui chu an tam. Hmelah anpui chu ngah mah ila, kan hnam nunphungah erawh hnamdangin an neih ve loh neih leh chin ṭhan kan nei nual a. Chungte chu kan pi leh pute hunlai aṭanga kan lo chin leh tun thlenga kan la inzirtir ṭhin te a ni. Chungte chu tawi te te in in zirho teh ang :
Tlawmngaihna: Tlawmngaihna tih thumal hi sapṭawngah chuan a tlukpui ka hmu hauh lo a, a tlukpui tur ṭawngkam hi a vang hle. Mahni inphat tih te, midangte tana inpek tih te pawh hian a hrilhfiah zo chiah pawhin a lang lo. Meirion Lioyd Missionary chuan Mizote min hmuh dan tihian a sawi, "Mizote chungril nun leh innghana ṭha leh mawi em em chu an tlawmngaihna hi a ni" a lo ti. He ṭawngkam ril tak hi Mizote kan danglamna leh, kan pi leh pute lo ropuina em em leh Mizo nun leh khawtlang tipumkhat a, tinuam a, timawitu chu a ni. Kan pasalṭha tlawmngai zingah Taitesena hi tlawmngaihna kawngah chuan kan sawi hmaih thei lo, tlawmngaihna lalpa tih hial pawhin sawi ila kan uar lutuk lo ang chu maw. Tunlai hunah pawh hian he Mizo nunzia hi chawinung tumin YMA pawh hian inzirtirna leh a taka thawkin an kengkawh ṭha hle mai.
Lal Isua nunah khan tlawmngaihna kan hmu a. A zirtirna leh a thupekte hi Mizo tlawmngaihna kan tih nen hian a inmil hle mai. Chumi zuitu keini ringtute chu kan tlawmngai tur a ni a, Kristian nun nen pawh hian a inhmehin, a inzawm tlat a ni. Ziaktu pakhat chuan 'Kristian kan nih hma pawhin he tlawmngaihna hi chanchin tha (the hidden gospel) a ni' lo ti hial a ni. A huhova tlawmngaihnaah hi chuan kan thawk ṭha tlangpui. Mahse, mimal taka tlawmngaihna nunah hian kan tlachhe mek thung. A mimal taka ṭanpui ngai nia kan hriat han puih mai te, kawng kan kal laia chak lo zawkte leh inphur bawr em em han puih mai te, mi puanpho tla han chharsak maite thleng hian kan uar thar a pawimawh hle. Fak leh chawimawi phut hauh lova mi ṭanpuite hi tlawmngaihna nu leh kristian nun ze mawi chu ava ni em!
Ai upa zahthiamna : Aia upa zahthiam tih pawh hi hnamdang hian an inzirtir em ka hre lo a. Mizote ah erawh chuan kan pi pute thil ngaihpawimawh leh an kenkawh tlat nun a ni. Mizo ṭhangthar zingah aia upa zahna a tlahniam viau. Aia upate zah hauh lo, kutthlak duh leh ankhum bawng bawng duhte kan pung ta zel a.
Lehkha zir sang tak kan ni emaw, awfisar lian tak, leh mi hausa tak kan ni emaw pawh ni se, Mizo nunze mawi aia upa zah thiam hi kan Mizo nun zemawi ropui tak a ni.
Aia upate zahthaimna Mizo nun ze mawi tak tidaltu pakhat chu kan social media Facebook, Instagram, Twitter, Whatsapp etc. te hi an ni. Aia upate thu post an lo comment duh danahte hian aia upa zahna tlachham fe fe an kat ta nawk mai. City Bus chhungahte ṭhalai ṭhenkhat mahni aia upate zahthiam taka ṭhutna han kian mai ṭhin an awm laiin, ṭhalai leh naupang ṭhenkhat chutiang nachang hre miah lo, a bikin school uniform ha te zingah awn awm nawk thin te hi kan mizo nunmawi kan kalsan tawhzia tichiangtu pakhat a ni. Zirtirtute pawh hian an naupangte hi Mizo nunze mawi hi zirtir fo se a ṭha hle mai.
Israel fate ho khu an hnam nunzia leh sakhua chawinun kawngah chuan an entawntlak hle. An saltanna hmunah te, hnamdang awmna zingah pawh an Juda em em zel mai a ni. Keini pawh hi khawiah pawh awm ila, Mizo em em mai ila, kan mawi zawk. Engtikah mah Sap, Korean etc. kan ni dawn lo, Mizoah kan lo piang a, Mizo niin kan boral leh dawn. Mizo nih hi khawiah mah zahpui lo ila, i chawinung zel ang u.
Rinawmna : Rinawmna hi kan Mizo nunziaa bet tlat ṭhin a ni. Hmanlai chuan kawngka an kalh ngai lo a, rukru an awm ngai lo, an inring tawn em em a, khawtlang nunzia a mawi ṭhin. Kutkem nei tihte kha an hmusitin an deusawh hle ṭhin. Tunah chuan kutkem tih satliah chu a nep ta lutuk engmah kan ngai vak lo. Mahni in chu sawi loh, Biakin thlengin kalh ṭhat ngaiin fimkhur a ngai ta. Kristian ram si ah hian tumah hi kan inring zo ta meuh lo chu a ni e.
Tunah zawng meng reng chungin kan inbum a, a thaibo theih theih kan thai bova, Pathian thu meuh pawh hian min ti rinawm zo ta lo emaw tih tur a ni ta. A langa rukru leh lang lo lama nuai tel ru te nen Biakin leh khawlaiah pawh kan inpel ta suau suau mai. Mizo nunze mawi kan hloh nasat ber zinga mi chu rinawmna hi a ni. Kristian kan nih hnuah phei chuan rinawm zawk awm tak, kan kristianna leh kan ringtu nihna hian rinawmna lakah hian awmzia a nei ta lo emaw tih hial tur a ni.
Mizo hnam incheinaa inchei a, intih Mizo em ema lam dual dual ringawt hi a tawk ta lo; kan Mizo nunze mawi- tlawmngaihna, aia upa zahthiam leh rinawmna te hi i chawinung zel zawk teh ang.
- Reuben Lalnunthara Hnamte