Police nupuite motor an tih mai hi

Hman deuh khan Mizorama Police Officer zingah mah­nia motor nei hrang anga an kalna apianga Police motor hmang thei an awm thu kha an rawn ziak tawh a.

Hei hi ka lo hriat ve dan chuan Police Officer SI rank chin hi chuan motor pakhat aia tam an lo kawl deuh vek zawk a lo ni a, tichuan pakhat chu oficer-in a hmang a, pakhat hi an family pawi­mawhah an hmang nasa. Officer lian chinah hi chuan an nupuiten pakhat kawl ve ang maiin an awm a lo nih awm chu.

Congress sorkar leh ṭan dawn kum 2008 khan Home Minister thar kan neih khan mimal thila Police chhawr tih tawpa tum thu kha huaisen takin a sawi a, a tir lamah kha chuan a han ri deuh ṭhak ṭhak a, a ri rei lovin a zuih ral hma hle.

Tuna Home Minister hi chu a ngawi reng a, chu chu advantage ah Police ṭhenkhat hian an laa an duh dan danin an tal hi a ang ṭhin a. Heng te hi chu keini sawi ve phak a nih loh laiin public money hmanga lei government vehicle Police Officer ṭhenkhatin anmahni private motor ang maia an nupui leh fate pual anga an hmang hi chu ngaimawh a hun ta viau.

Police officer lian zawng zawng chu an ni hauh lovang a, mahse Police ngaih­sanna nen hian Police motor hi chu hmuh fuh a lo awlsam bik ṭhin si a ni.

A front seat-ah hmeichhia an chuang hmuh tur a tam a, a khalhtu lah officer hmel pu an ni ngai si lova, Mizoram sorkar pawisa (mipui chhiah) aṭanga lei Police motor ah sorkar petrol thun saah an chuang kawi an chuang kawi hi ṭhenkhat chuan an sawi duh khawp mai.

Keia sawi duhna lam chu a dang leh daih. Police Station tam takah hian motor an indaih lova, chu bakah misual hnu chhui tur pawhin Petrol an indaih loh avangin an tlan chhuak kim thei lo an la ti lehzel a. Police Station tam takah motor indaih lo, SP chin Officer lian zingah motor ṭha pahnih kawl, a ṭhen chu Bolero pahnih kawl tawp te, hman deuhva an lei Duster leh motor ṭha dang kawl kawpte hi an awm nual an ti tlat mai.

Hei hi Home Secretary level emaw DGP lam aṭang hian emaw motor sem rual dan hi awm se. Officer va tihbuai hrim hrim lam ni lovin an nupuite hman tur a awm si chuan Police Station leh Out Post lama indaih lohnaah hian motor hi sem rual se Mizoram tan a ṭha dawn si a.

Police-a lut tura Mistiri duhsak leh officer ina orderly anga daha in sak hna an thawh dan pawh sawi tur a tamin officer hlawh inzatah in an neih ṭhat bik theih chhan pawh Labour leh Mistiri manah pawisa an seng tlem bik a. In pakhat sakah chuan nuai tel fe hlep thei an ni tawh tho a, motor lam hi chu sem rual a ṭha a ni.

- MS-a Ralte