Garage neih vek i tum ang u
Aizawl khawpui chep lutuk tih ziaawm nan sorkar chuan motor dahna (garage) nei lote tan kum tluanin hun a pe a, kawng sira lirthei park tam lutuk vangin kawng a tizim em em mai bawk si a. Sorkarin garage nei tura min tih vang pawh ni lo, lirthei kan register dawna kan intiamna ang ngei khan mipui lam pawhin sorkar thu zawm ngei ngei a ngai dawn a ni.
Sorkar ṭan vang lam em em pawh ni loin, kan khawpui zim te hi a zauh belhna tur a vang tawh hle mai a; kan lirthei kawng sira kan hung ṭhuap mai ṭhin hian khawpui a tichep lehzual ta hle a ni. A ni telin lirthei chi hrang hrang a pung a, tunah phei chuan chhungkaw khatah lirthei 3/4 neite pawh an awm ta nawk mai. Mamawh vanga heng lirtheite hi nei kan ni na a, a ṭhen chuan hausak inpholan nan an hmang emaw tih tur an awm ve bawk a ni.
Khawpui chep lutuk leh traffi jam nasa tih ziaawm nan Ocober thla khan motor number tawpa ni (day) mila indinchhawk ruahman a ni a, Aizawl khawpuia lirthei veivak te han thlirin he ruahmanna hian traffic jam pawh tlem chuan a ziaawm hret niin a lang. Amaherawhchu mi neinung zawk chuan a number dang duhin lirthei an lei belh leh mek zel si a, kiam lam aiin pun lam a pan mek zel zawng a nih hi. Nitin indinchhawk buatsaih hi October thla chauh ni loin, pawhsei leh a ni a; eng ang chen nge pawhsei a nih ang a, a aia sawr zim zawk tur nge tih ngaihtuah leh a la ngaih hmel mang e.
Mizoram sorkar hnuaia transport department chuan heng hi hriain September 1, 2010 khan garage nei lo chu registration a tih sak tawh lo a, thawktute an bum ṭhin vang te, thawktute inthlahdah avang pawhin garage nei loa register pawh an tam mai thei a ni. Engpawh nise, September 1, 2010 hnu lama lirthei register reng reng, garage nei lote phei chuan court-ah pawh zualko se, thiam an chang thei dawn lo tih a lang reng mai.
Dawt sawia ṭhenawmte an phalna anga an garage kawka thawktute bum emaw, thawktu ṭhenkhat thiam loh vang pawh ni raw sek sek; kawngpui sir garage atana hman ngawt chu an thiam dawn tawh lo a ni.
Mihausa, lirthei pawh nei thei chuan garage hi a nei ngei tura ngaih a ni a; December 1 aṭang chuan kauh zawka kalpui a nih hunah eng ang takin nge an buai dawn tih chu hriat a chakawm khawp mai. Tunlai hian Transport Department, AMC, Local Council leh Traffic Police an ṭangho ṭha hle a, hetianga an ṭanho ṭhat zel chuan mi tlemte, kawngpui sir tihnawktute hi mipui tam zawk hian kan kawh rawn ve tawh dawn a ni.
Hei mai bakah kawngpui sirah lirthei chhia, hun rei tak kawng tihnawka an dah a tam mai. Heng senghawi hna pawh hi thawh tham fe a tling dawn a, a pawimawh ber chu Local Council-te an ni dawn. An tha tichak turin a enkawltu AMC pawhin ṭan an lak a ngai hle dawn a ni. Hlauh bik emaw, duhsak bik emaw neih a rem dawn lo a, khauh taka he thil hi kan kalpui a ngai a ni. Aizawl khawpui chep lutuk tih ziaawm nan chuan thu awi lo zual bikte leh mi ṭhenkhat chuan tawrh ve deuh pawh kan inhuam tur a ni.
- Lalduhawma