HMASAWNNA KAN TI THUANAWP LEH TA MAW!

Mi ramin an neih, kan awh ve ngawih ngawih, kan rama kan neih ve tur, motor 4 ngawt thawl taka tlan theihna tur, Vairengte aṭanga Sairang thleng, nuamsa taka kan tlan zar zar theihna tur, Central pawisa veka siam tur chu, kan sorkar lam bawkin an lo ti khawtlai leh ta.

A em em deuh tawh lo maw? He kawng ropui tak lo awm tur hi a lawmawm tehreng nen, sorkar phei chuan phur taka lo nawr vat vat a, a chak thei ang bera hna lo thawhpui tur zawk khan, compensation an lo beisei ve avangin, hna kal mek an chawlhtir tawp mai a. Kawng lai tur contractor-ten hmanraw ropui leh man to tak tak an rawn chhawp rup tawh a, chung hmanraw thar ṭha pui pui chu, an dah khawmna hnim ṭovin a zam hnan luk tawh mai. A zia lo lam deuh chu a ni.

Turial Hydel Project pawh kha compensation uchuak tak avangin, hma lak theih loh vin kan dah tawh a, Pi Sonia Gandhi blessing avang chuahin tih puitlinin a awm hram a, Compensation avang bawka hna ṭhuamawpa kan siam leh hi chu, a em em deuh tawh a ni.

Tunge a kaikuang? A technical thil kan hre thuk ve lo, kan hriat thiam ve tawk chu, Forest Department in sum lak ve an duh vangin, mimal compensation lak tur tih fel vek hnuah, harsatna an siam leh a. Hna thawktu company lamin compensation double pek an duh si lo a, hna thawk thei lovin an innawr ta vak vak mai a. Mimal compensation la turte pawhin an lak theih loh phah a, an ram neihah kut thlak an phal tawh bawk si lo, in sa mekte lahin chhunzawm a theih tawh loh avangin an chawl tawp a, hma lakna thar tur pawisa ber hrenbeh sakin an awm bawk si a. An thin a rim a, kawng dan hmanga an manganna tih lan kha, an tih theih tawk a ni ta mai.

Forest department control-tu chu kan thlan lalte bawk an ni. A kaikuang lam chet buarchuar vang bawk niin a lang.

Zah nachang hriat a hun ta: Forest department hian pawisa lak tur an lo nei ve a nih pawhin, engatinge a tirah hma an lak ve vat vat loh? Mipui ti mangang zawng leh hmasawnna hna kal tur tiṭhuanawp zawnga thuneihna hman hi a zahthlak zawk em em lo em ni? Kan ram hma­sawnna tur phur taka lo ṭawiawm tur zawk khan, thu ka nei ve alawm tih vanga compensation la turte hnena no objection sign duh loh ringawt hi, ram hmangaihna avang ni lovin, thluaka sum lut thla­rau bawk a nih hmel. Zah nachang i hre tawh teh ang u.

Hetianga ram intodelh lo lutuk, central pawisa hmanga nung ve ṭawk ṭawk, central sum lo lut ren taka hman pawh tum lo, ka ti thei tih vanga man ṭang in eitir vak vak a, central sum a nih chuan lo suasam chiam duhna thlarau hian, ram hmasawnna tur a ti ṭhuanawp rei tawh lutuk.

Kan in leh lote chang­kangin, a chhung bungraw ṭha pui puite nen khawsa mah ila, kan ram aṭanga chhuak tur awm ve lo, chawmhlawm state kan la nih chhung chuan, hmabak hi kan la ngah lutuk. Kan chetzia leh thuneihna kan hman vel dan maksak tak tak hi i bansan tawh teh ang u.

- Lalrinliana Colney