Ṭamdil enkawltu ban a ṭha thlawt MCS pa leh Kuhva smuggler te hi?

Hmanni deuh khan thil pakhat a rawn lar a. Vai pain Twitter ah Ṭamdil Tourist Lodge chhung a ṭawp thu a rawn ziak a, an thlen zana amah lo dawng­sawngtu chu a ruih thu a ziak bawk a, Mizoram tán a zahthlak hle a ni tih hria in kan sorkar chak tak chuan hma a la vat mai a ni.

Tourism Depart­ment chuan Ṭamdil enkawltu chu a hna aṭangin a ban hmiah mai a, hetianga sorkar huaisen kan nei hi mipui lam chuan kan lo ngaithei lo leh pek tlat. Thil ti dik lotu zawk sorkarin a hna aṭanga a chawlh tir chu lo khawngaihin sorkar an sawisel ta sup sup a, mi dik lo kan in khawngaih siak ta vel hlawm kha a mak ka ti.

A chhan chu Mizo te hian dikna kan duh niin kan in sawi deuh vek hlawm a, Kristian ram kan nihna nen pawh dikna ken kawh ngam hi kan tih tur dik tak a ni a, chu chu sorkarin a han kalpui dek dek a, sorkar zawk kan beih rawn leh luih luih si hi ka hrethiam ve lo.

Thil dangah pawh hriat chianna hun awm hmaa sorkar kan in peih rawn siak vel mai duh kha chu Mizo mipuite hi sorkar ṭha nei tlak kan la nih lohzia a lang chiang viau.

Hetianga sorkarin thil dik lo a do apianga sorkar kan beih rawn zel chuan thil dangah pawh sorkar hian mi dik lo a hrem ngam tawh lo ang a, a tuartu tur chu mipuite bawk hi kan ni dawn.

Tunah pawh kan Minister inah vai smuggler chaw ei lai thlalak a rawn lar leh hluai a, hetah pawh hian sorkar chuan hma lak leh ngei a duh lehin a rinawm. Mahse hmanni lawkah khati taka sorkar hmalakna kan lo sawisel tawh vang khan sorkar hian hma a la ngam ta rih lo ni berin ka hria.

MCS chhuak thar pa in ti emaw ni pawh kha police chuan thu an han zawt fiah ve bawka an tia, eng teh ualah kan in chhuahin a rinawm bawk lo. A chhan chu sorkar hmalakna kan sawisel peih lutuk hian sorkar pawh a ti down vek dawn a, thil dik lo dona kawngah sorkar a chak loh phah sawt dawn miau a ni.

Kuhva smuggler chungchangah pawh hian kan sorkar hian inthlan te a hnai tawh si a, mark tih ṭhat nan tal pawh hremna lek kawh a duh viauin ka ring. Mahse hma la ngam lo tur khawpin mipuiin thil dik lo titute lakah sorkar kan dem zawk daih mai kha a pawi asin.

Tun chinah chuan Zoram mipuite hian sorkar hi sawisel ringawt zel tawh lo ila i thlawp tlat zawk tawh ang u.

- John Hualngo