LOCKDOWN HMANG ṬANGKAI ILA

Zirna Inah chuan naupangte chauh an kal a. Chenna Inah chuan inkharkhip chhungin chhungkua in kan awmho a. Chhungkua a inzirtir nan a va ṭha em! 

Mahni duhthu a kan awm lai khan chintawk awm lovin kan eiin kan in zel a, chu chuan kan taksa hi dinhmun hlauhawmah a thlen a. Natna khirhkhan pui pui lakah a fihlim zo lova. Nun nuam lovin hun kan hmang ṭhin. 

Inkharkhipna hnuai-ah chuan kan ei chak zawngte pawh kan lei pha ta lova, hmanlai hun ang maiin kar tluanin anhnah kan ring a, chawlhni tukah sa kan hmeh pha ta chauh - mahse kan taksa tan chuan a va ṭha tehreng em! 

Tunah chuan kan ka pawhin anhnah tuina leh hanna a hre pha tawh a, tui ti takin chaw kan ei hliam hliam ta mai le! Kan taksa pawh a lo nuam ṭan a, hriselna lamtluang kan zawh ṭan der mai. Lockdown zawhah chhunzawm zel ila, kan hrisel phah sawt ang. 

Mizo te hi chhuak vak nasa tak mai kan lo ni. Tukṭhuan ei kham tawh chuan kan zavaiin kan leng chhuak zel a, kan chenna In chu chahbi chauh kan nghah tir a, Aizawl khawpui kawtthler zim takah kan intawkkhawm a, lirthei kan keng zel bawk si a, chu chuan traffic jam a siam phah bawk. 

Inkharkhip hnu hian kan In chuan nghaktu mumal tak a nei ta. Tihtur nei lova awm reng ai chuan nitin chhuat nawh, bang bal lai nawh fai, tukverh darthlalang nawh fai, ṭhutthleng nawh fai te chu naupang te zirtir ila. Puitling pawhin sekrek khawih tur zawng zel ila, chuta ṭang chuan chenna Inah hnathawh tur a tamzia kan lo hre thei mai ang. Nitin leng chhuak ṭhin te chuan sekrek khawihtute, ei rawngbawltute chu chhungkua a kan mi pawimawhte an nihzia kan lo hre chhuak tawh bawk ang.

Inkharkhip a nih hma khan nitin kan chhuak a, kan mamawh ni lem lo awh chawp lei nan leh intihhlim nan cheng sang tel kan va hmang zel a, thla khatah chuan sing tel teh meuh a lo ral ṭhin. Kan ei chak zawng te, thawmhnaw nalh te lei thei hrih lo mahila lehlamah sum kan khawl zel tihna a ni. In kharkhip a zawh hun chuan kan lo intodelh sawt dawn a ni. 

Zuk leh hmuam, ruihtheih thil te pawh a lo vang zo ta a. Ruihtheih thil avanga kan buaina pawh a lo ziaawm ta sawt mai. 

Mi hlawhtlingte hi harsatna hnuaiah an awm laiin nasa takin an inzir chho a, chuta ṭang chuan hlawhtling takin an lo pen chhuak ṭhin. Lockdown hnuaiah hian kan nun inbih chiang ang u. Insiam ṭhat nan kan hman theih chuan inkharkhip hi kan tuar thlawn lo ang tih i ring ngam ang u. 

Hotute thupek awihin awm tlat ila, thupek awih lo ramte an thi nasa zel e.