Kawngpui siam ṭhat a hun

Fur a liam a, kan sorkarin harsatna a tawh fo ruahtui tam vanga kawngpui chhe siam loha a dah reng hi rang takin siam ṭha tawh rawh se.

Road tax leh pawi­sa khawn theihna dangah lirthei aṭangin a theih ang angin na takin pawisa a khawn mek a ni a, hetih lai hian road tax chawitu mipuite tan kawngpui ṭha min pe leh duh chuang miah si lo hi a ni phawt.

Hmanni khan Hachhek Con­sti­tuency Deve­lopment Committee chuan Tuidam-Darlak inkar kawng­pui chhe lutuk siam turin sorkar an ngen a, mipuiin kawng chhe siama hnatlanga vawi tam an neih hnuah pawhin sorkar chuan kawngpui hi siam ṭhat a la tum ta si lo a ni.

Bairabi-Zamuang kawng chu siamna a la rei lo chungin a chhe leh tawh lutuk tih an sawi a, he kawng hi helai bial tana kawngpui pawimawh a nih vangin sorkar hnenah he kawng hi siam ṭha turin an ngen a ni.

Hetianga sorkarin a tih tur a tih loh fo avang hian kawngpui dan leh mipui tana rokhawlhna awm thei thil thleng a awm fo tawh. Hetianga sorkar kar vanga harsatna a awm tawh loh nan sorkar hian a tih tur ti ve vat ṭhin rawh se.

Fur ruahtui tlak tam vanga kawngpui chhiaah sorkar hian a sawi fo a, mahse NE state dang ruahtui tam ve na thoah pawh kawng an nei ṭha thei tho a, kawng chhia kan nei reng bik hi thil dik a ni lo.

Kawngpui ṭha neih hi tax petu mipui chanvo a ni, chutih laiin kawng siam ṭhat hi tax khawn hi sorkar mawhphurhna a ni. Duh tawka chhiah lak hnua sorkarin kawngpui a siam ṭha leh duh ṭhin si lo hi thil dik lo tak a ni. Sorkar hian a duh­naah pawisa pawh a nei tih kan hre vek.

Ruahtui tam vanga kawng­pui chhia chu a awm theih a ni, mahse kum tin maia kan kawngpui te a chhe bik ziah hi chu sorkar inthlahdah vang a ni e. Fur a zo tawh, kawngpui siam ṭhat a hun ta e.

- Robert Ronghaka