Cheraw record khan tourist a hip lo

Mizoram chuan kum 2010 March thla khan World Record kan lo siam tawh. A rualin mi 10,736 zetin Cheraw an kan a, mau hmanga a ruala lam tam ber record siam a ni. Guinness World Record lamah ziah luh thlap a ni a, sum sen a hautak dâwn tehreng nen Tourism lamah hlawkna a awm hriat a ni lo.

Tunlai chu Mizo­ram hian record thar siam a tum leh mek a, a ruala ṭingṭang perh tam ber nih kan tum an ti. Ka hriat sual loh chuan ṭing­ṭang perh tam ber record hi Meghalaya lamin an siam mêk a, thil ropui tak chu ni se khawvelah hian hnam dang, anni aia inko khawm tam thei tur hi an awm chiang a ni.

A pawisa nei lo ber state chuan sum tam tak sengin ṭingṭang perh rual hnem ber World Record siam kan tum a, tute emaw chu an lar phah hluai ang a, a buaipuitu lamah hlawk deuh te pawh an lo awm mial mai thei a, Mizoram sum erawh a hek hiau hiau ang a, tourist an lo kal tam phah leh chuan si loh chuan huau huai chi khat kan siam belh ve mai tihna a ni ang.

Ṭingṭang perh rual record siam thei, mahni state panna kawngpui ṭha pawh nei si lo kan ni dâwn a nih hmel. Ṭingṭang perh rual tamah khawvel record siam mah ila, sorkar hnathawk in thla tirah hlawh a lâk theih si loh chuan a va ho duh dâwn ve.

Cheng nuai 3 sem min tiam (kan dil pawh ni lo min sawi hmuh) a, Rs 25000 lek sem chunga guitar perh ṭhup ṭhup hnam kan ni dâwn. Traffic jam awm lohna kawng­pui neih hmaa ṭingṭang lo perh pawh chu a inthlahrunawm dâwn a ni.

Tourist hipna atan chuan miin eng tin emaw tak min hriat hi chu a pawimawh ngei mai. Meghalaya chuan khaw fai berte an nei a, ruah tui tlak tamna berte an nei a, tui khawh thla sang leh mawi em em an nei a, an ram a mawi bawka tourist an hip viau.

Kan ram mawizia hi sawi ve ṭhin mah ila Meghalaya te angin tourist place kan nei ve lova, tourist nawmchenna pakhat zu kan khap bawk si a, ṭingṭang perh hmanga tourist hip tur an awm chuan Meghalaya zawk hi an ni ang.

Mizoramah chuan kan hmuh nin em em te an rawn inlar ang a, a tourist zawk an rawn inlar hmel bawk si lo, Cheraw kan record aṭanga teh chuan thil ropui tak a ni dawn lo. Thil to tak, pui tak pawh a ni lo ang.

Ngun zawka thil ngaihtuah hmasak a, kan ram mil tawka khawsak zir hi mipui leh ram hruaitute hian thiam se a ṭha a ni.

- Lallianzuala