National Democratic hi engnge a nih?

1. India Parliament rorel­naah khuan India ram Party lian zawng zawng tih theih deuh thaw leh Party dangte pawh hmun hnih lian takah an inṭhen phuk a. Chungte chu Ruling Party leh Opposition Party nih an inchhawk ṭhin. Chung te chu Congress hova awm hlawm khat United Peoples Alliance (UPA) leh BJP hova awm National Democratic Alliance (NDA) te an ni. India hmar chhaka awmten chu NDA chu hlawm khata siamin a hmingin North East Democratic Alliance (NEDA) an ti a, NDA nen thuhmun reng a ni.

He NDA-ah hian 2014 MP inthlan dawn khan Mizoram aṭangin Congress Party ni lo - MNF, ZNP leh MPC-te chuan NDA hi zawmin MP inthlanpui pawh kha an chuh ho va. Delhi-a NDA an sawrkar a, Prime Minister Modi-a’n thutiam a lak dawn pawh khan an sawmna angin he Mizoram aṭanga NDA hotute Pu Zoramthaga, Pu Lalduhawma leh Pu Lalhmangaiha te chuan an zu telpui nghe nghe a ni.

2. NDA hi UPA ang bawk­in a telho zinga Party lian ber Congress emaw, BJP emaw kha an zu zawm ta tihna a ni hauh lo va. Party tin hian Party thiltum leh Policy Thuthlungpui nei vek an ni a. UPA-a an tel hian chung Party-te chuan Congress thiltumte leh an Party thununna chu zawmin an Congress ve ta tihna a ni hauh lo va. Chutiang bawkin NDA-a an tel hian chung Party-te chuan BJP Party chu zawmin an thu angin an kal dawn tihna a ni bawk hek lo.

MNF, ZNP leh MPC-te hian mahni pawl thil tum te, policy te, inkaihhruaina te a hrana nei vek an ni a. BJP-ah telin an zawm a, an thu leh policy angin an kal dawn tihna a ni hauh lo. Mizo-te culture, ram, ṭawng leh sakhuanate humhim a, veng tlat tura Party dingte vek an ni. A tu-a mah hi BJP policy leh kaihhruaina hnuaiah an awm dawn lo hrim hrim tih a chiang.

3. Mizoramah kohhran hrang hrangte hnathawh leh hmalakho theihna remchang siamin Mizoram Kohhran Hruaitu Committee (MKHC) an siam a. Chutah chuan Kohhran lian ber Presbyterian hotupa Synod Moderator chu Chairman atan hman a ni a. Chutiang a nih avang chuan Synod Moderator leh Presbyterian Kohhran thu thuin a telho Kohhrante chu an awm tura kan rin chuan a dik hauh lo ang.

UPC-ten Trinity ringin baptisma pawh a thlawra inthlawr paw ve ta tur angah ngaihsak ta ila a dik hauh lo vang. Chutiang bawkin Baptist leh Catholic-te pawh Presbyterian Kohhran hrang hrangte khan mahni kohhran tihdan, thurin leh kal hmangte a pangngai chiaha kalpuiin MKHC-ah hian telin hma an va la ho mai chauh a ni. Kohhran dangte Presbyterian-a tel ta leh an tihdan anga kal zel tawh tura puh luih tlat chu a dik hauh lo ang.

4. UPA leh NDA pawh hi chutiang chiah chu a ni. Heta tel hi a nihna takah chuan Parliament rorelnaah tu group-ah nge an tel dawn tihna mai a ni. Heta tel Party-te hian Congress emaw, BJP Party emaw zawmin an tel ta tihna a ni hauh lo. India rama Party tam tak heta telte hi Congress emaw, BJP emaw zawm leh an thu anga awm turin zu puh ta ila an haw khawp ang - a dik hauh lo reng a ni. MKHC-a Kohhran telte Presbyterian Kohhran zawm ta leh an thu ang anga awm turin puh lui ta tlat ila chung kohhrante chu an thin a ur khawp ang. Chutiang tak chu a nih avangin tun aṭang chuan he thil nih phung hi mitinin hre ṭheuhin kan thu sawi tur pawh puitling takin i ngaihtuah ṭhin ang u. Politics a inbeih nana hman fo tlak niin a lang lo.

He thu ka han ziah chhan chu thu dik ziktluak lo hmanga Party inbeih nan hotu ṭhenkhatin an la hman fo vang a ni a. Ka hriat ve dan chuan Mizorama Tualṭo Party official-a BJP thawhpuitu chu ZNP an ni a. 2015 AMC leh MLA Bye Election-ah khan BJP nen an thawk hova, Bye Election-ah pawh an President Pu Lalduhawma a ding nghe nghe a nih kha. An hlawhtling ta chuang lova, sum lamah engzatin nge kha mi ṭum khan BJP-in an rawn puih phei chu midangin kan hriatpui lo. An worker ṭhenkhatin kan rawng huai kan ser tawp mai tiin an hlim viauva, inthlan a zova an reh leh ta mai niin a lang.

- Rualkhuma Hmar