Aizawlah two wheeler

Khawpui dang ang bawkin Aizawl pawh a ṭhang chak a, mihring kan tam lutuk loh ngaihtuahin lirthei erawh kan intodelh viau lawi a. In tinah lirthei pahnih pathum kan kawl deuh fur awm e. Veng chuan hnuai deuh zawkah te pawh lirthei kan kawl fur tawh a, lirthei man kan neih dek dek chuan secondhand tal neih duh kan ni zel. NLUP pawisa hmanga lei leh puk chawpa lei pawh chhiar sen loh kan awm tawh awm e!

Tun hmaa kan hriat ngai lem loh tun hnaiah kan tawng chho mek a, chu chu two wheeler lirthei jam ve ta zel mai hi a ni. Kan kawng a chep a, lirthei ke pali nei a jam hi chu kan tawn ṭhan a ni tawh a, chutihlaia kan thil tawn mek two wheeler jam erawh hi chu thil duhawm lo tak a ni. He thil hi khawpui tinuam lo zualtu tur a ni a, hlauhawm chhih-chhiahna a thleng ti pawhin sawi ila a hlauhawm belh phah tawh chuang awm lo e!

Mizorama lirthei pung chak ber chu two wheeler a ni. Statistical Handbook of Mizoram, 2014 in a tarlan danin, kum 2013-14 a Mi­zorama lirthei awm zat chu 1,37,225 a ni a, kum hmasa 2012-2013 aia a punna chauh pawh 15895 a ni. Lirthei zingah hian two wheeler a tam ber a, 80729 a ni. Two wheeler taxi te a han awm chho nen who wheelter lirthei punna hi tunah phei chuan a sang tawh viau ang; who wheeler pawh a jam tak fo hi.

Two wheeler a pung chak a, a jam ta hial mai hi tu mawh mah a ni awm lo e. Who wheeler khalhtute hian mawhphurhna lian tak kan nei ṭheuh thung. Two wheeler khalhtu polite tak tak zingah polite lo deuh deuh an lo inzep a, anniho hian kan khawpuia lirthei che vel hi an tihnawk zual sauh a ni ber mai.

Two wheeler hi khawpui chhungah vaivak tam ber a ni a, two wheeler khalhtuten hawihhawm taka two wheeler kan khalh chuan kan khawpui hi lirthei chungchangah chuan a nawm belh sauh dawn tihna a ni.

Intlan pelh hi tu te pawhin kan thiam a, ṭawng mawi lo ni lo se hmeichhia two wheeler khalh thiam ngawr ngawrte pawh hi an intlawh khalh khawng-khaw-bai phei zei zei a, mi an tlan pel ve mai ṭhin.

Mahse midang zah vang leh Mizo nun ze mawi lantirin khawpui lirthei tamna hmunah hi chuan two wheeler intlan pelh loh hi a ṭha ngawt mai. Two wheeler khalhtute an lo din a, an lo in line tawh chuan in line ve hram hram ila a himin a ṭha a, traffic dan kan bawh chhe lo bawk ang.

Tin, two khalhtu luhlul leh polite lo zual, two wheeler inline laia midang tlan pelh (over take) chingte hi traffic police te hian man ṭhin se, man loa an chhuah zel chuan mi dang tlan pelh ching laklawh ho hian midang nghah hi thil nihphungah an ngai lo a, tlan pelh zel an tum a, an tlan pel zel bawk a. Hetianga an tih hian hmun hrang hrangah midang tan jam an siam zut a, kan buai phah fo a ni.

Two wheeler khalh­tute hi khualzin hmuhah pawh hmuhnawm khawpin discipline nei ṭhain intlar ṭhin ila, midang lehpelha tlan hmasak inchuh tawh loin Zo nun ze mawi hi lirthei ke hnih nei khalhtute hian lantir ila, traffic dan kan bawh chhe lo bawk dawn a ni.

- Lalpekhlua