Rawngbawl hnam Pathian ngaihsak si lo kan ni!

Zoram kristiante dinhmun hi ngun taka chîka zir chuan bulṭanna fuh, pen leh chuan thiam si lo kan ni tih kan hmu theiin a rinawm. Hnam anga ka han sawi hian a nawlpui nihnaah hmehbelin kan ni ta vek e kan ti kher lo.

Hman ni chu Bial Inkhawmpui kan thleng ve nawlh mai a. Ṭhalaite chetla ka thlir ru reng a. Ushering, refreshment, informa­tion etc tih velah an zavai tih tur khan inkhawm laiin an buai a, an vei noh noh mai a. Biak ina zai hruaitute tih loh chuan Pathian thusawi ngaihthlakna hun reng reng an nei lo.

Buai pawl nih tum khan a ṭhenin camera an lekchhuak sek bawk a! Zaipawl zai zawhah an chhuak a, an buai leh nghal a, ka mang an tiang hle. Hetiang hi Kohhran tina kan ṭhalai rual inkhawmpui hman dan a ni ta vek mai. A behbawma buai chungin inkhawmpui kan ṭin a. Pathian aiin inkhawmpuia kha kan ngaihsakin kan buaipui a nih hlawm hi! Inkhawmpui a hman avanga Pathian pawlna chang thar kan awm em tih ai chuan kan zai ṭha em tih kan ngaihven zawk bawk.

Mi a piangthar a, a kum zat azirin a telna awm fellowship-ah inhnim lutin ṭhahnem ngai taka inkhawmin pawl thiltihna apiang­ah tel a tum zel a. An project pui ber pakhat an tihhlawhtlin hnuah kum a vei der a.

Chubak chu han kal leh chuan ngaihna reng reng Zoram kristiante hian kan hre tawh lo! Nikuma kan tihdan aia danglam deuhin thil hlui kan her lum kum tin ta vel mai a. Pathian min pawlna sermon ngaihthlak tur a tlem tial tial a. Pathian nena inpawlna hla sak tur nei pawh an awm mang bar lo.

Kohhran leh pawl thiltih engkima tel theih kha rawngbawlna kan hriat chhun leh thiam awmchhun a ni ta deuh der a. Budget kan tlin chuan hna ṭha thawkah inngaiin hlawhtling kan inti zo ta vek mai a ni. Nimah­sela, kan kianga mite'n kan nunah inkhawm nun bak danglam an hmuh si loh avangin kan nun awttu reng an awm si lo.

Ṭhahnem kan ngaih a, rawngbawl kan intih laiin kan nitin nundan erawhin ring lo mi kan kianga awmte lakah thiltihtheihna pakhatmah a nei si lo va. Eiruk hmangin min ngaisang chuang lo va, ruihtheihthil ti ṭhinte'n belh tlakah min ngai chuang bawk hek lo. Pathianin tihtur a tih leh tih loh tur a tih ngaih pawimawh a nunpui aiin program buaiin kan buai sup sup a nih tak ber hi.

Rinna kawng kan zawh danah pawh Pathian thua inhnim phum ṭhin leh mimala ṭawngṭai mawlh ṭhin mi te chu hmuh tur an khât pharh a. Lalpa ṭih chu sual huat a ni tih nunpui kan tlem tial tial ta bawk.

'I vengte hmangaih rawh' tih thupêk a taka zawmtu kan han tam loh êm êm danah hian kan Pathian biak danah hian fel lo leh dik lo a awm tih inhmu ngam a, kohhran mipuite ben harh tum rawngbawltu pawh kan nei ta mang lo. Mahni kohhran theuh tha bera ngaiin kohhran kan program apiang an changkang tial tial a. Mahse, kan inkhawmna leh kan inkhawmpui tam zawk leh kan Pathian biak dan erawh Pathian hian a hnein a kham ngawih ngawih zawk tih reng kan hre thei ta lo.

- Lalremliana Pachuau