Vai huangtau hi NGO hian ngaimawh teh se

Mizorama kan NGO lian YMA leh MZP/ MSU tihte hian vai permit nei lova lo lut an dap ṭhin a, vai dawr an ngaimawh thute an sawi ṭhin laiin tun hnaia Mizorama vai pathum langsar tak tak chungchangah ngawih an chuh tlat mai hian ngaih a tiṭha lo, hei hi politics lam ni lovin hnam thil a nih vei nen. Kamrul Islam Laskar (Kamrul Chhangte/ Kamlova Chhangte), Abub Mazumdar leh Musa Ahmed chungchang hi a mimal thil ni lovin a hnam thila en hian heti taka zuamawm leh thuhnuai theih state hi kan lo ni ta reng em ni le?

Kan rama kan hnam dang buaipuite hi han en ila, politics-a level sang tak aṭanga rawn lut ni lovin kan ṭhenawm state-te border area-a cheng mi sang tak ni lo ṭhiau an ni. Heng mite hi thiamna lamah mi sang niin an lang lo. Khawvel sumdawnna kawnga sang taka invawrh thei chi ni pawhin an lang lova, an thiamna level hre ve se su lo mah ila Mizo tlangval naran aia sang tur bik an ni lovang. Heng mi pathumte hian inanna an neih chu Assam-a District kilkhawr Cachar District lam mi leh sa ṭhiau an ni a, Mizoram hi sumdawnna hmunpuiah an hmang ṭheuh tih bawk. Hmun sang taka company lian leh firm ropui nena inthlun zawma state tana hlawkna lian tham lalut thei tur thiamnna nei an ni lo.

Heng mi pathumte hi ralkhat hriata kan lo hriat ve dan chuan Kamrul-a hi chu pa inngai tlawm tak, sumdawn thiam tak niin Vairengte velah khuan thil remchang apiang zuar ṭhin a ni a, Mizote lawm zawnga khawsa thiam tak a ni. Tichuan kar lovah a hausa a, hmelhriat neih belh zelin Mizoram chu a sumdawnna atan a hmang a, chumi hnu phei chuan Mizoramah inbengbel chhovin contract hna hial a thawk thei ta. KR Construction a din a, hna a hmu thei em em bawk a nih chu. A hna hmuhte hi a lian em em a, Mizorama construction firm lian kan neihte khum zak khawpin a awm thei a ni. A hna a ṭha bik a, a thiamna a sang bik a nih chuan ram tan a ṭha a, duhsak pawh ni se hriatthiam theihna tlem a awm thei e. Mizo contractor heti zat awm chunga Kamrul-a'n hna a hmu thei fal bik em em hi a mak hle a ni.

Kumin kum bul lam Assembly budget session-a Chief Minister Zoramthanga’n ziaka a chhân danin, kum 2018-19 aṭanga tun inkarah KR Construction, Ṭhuampui, Aizawl hnenah, restricted tender hmanga PWD hnuaia hna chi hrang hrang pek tawh zat belhkhawm, final estimate chu ₹40,92,95,776.04 a ni tawh. KR. Construction hnenah vek hian kum 2019-20 khan PWD Saiha Division hnuaiah tender hmangin hna pahnih – work order amount ₹35,05,54,147, Chakhei to Siasi (20.00) Km F/C & Pavement works leh work order amount ₹12,16,87,-740 Chakhei to Siasi (20.00) Km permanent works te pek ni bawkin, tender leh restricted tender hmanga KR Construction hna pek zawng zawng final estimate belhkhawm chu ₹88,15,37,663.04 a ni. Lengpui Airport thuam ṭhatna atana KR Construction-in hna a hmuh 4 final estimate belhkhawm chu ₹27,27,73,928 a ni (Thu lakna - Zalen).

Kan sawi mek hi hnam thil a ni. Kan rama hna pawimawh hi construction lama mi thiam bik pawh ni lo kutah a lut hnem lutuk. Amah hi constructor lian ni se hriatthiam theih dan dan a la awm ang a, contractor lian a ni lova, Airport chei ṭhat pawh a sa dik thei lova a chim a ni. Airport a sak chim hnu hian a hna aṭanga chawlh tir lovin Class II Constactor ni ṭhin kha Class I Contractor-ah Mizoram sorkar chuan a kaisan tir a ni. Heti zozai hna lian an pek hian Class II Contractor chiah a lo la ni.

Abu Mazumdar ve thung hi chu smuggler a ni. He pa hi Assam Police lam chuan kuhva tawlh ruka inhnamhnawih tiin an man tawh. Thil mak tak chu New Delhi-ah Mizoram Chief Minister Pu Zorama leh Assam Chief Minister Himanta Biswa Sarma te ramri chungchang sawia an inbiak khan Abu Mazumdar hi a awm ve nawlh. Official thila indawrnaah pawh Chief Minister level inbiaknaa smuggler a tel ve hi a mak hle a ni. Abu Mazumdar hi Assam Police ten an man hnuah bail-in a chhuak a, chumi hnu chuan tun hnai mai khan Kolasib lama Mizoram sorkar function-ah a lo awm ve nawlh bawk. Chumi hnuah Supply Minister inah chaw a ei lai thlalak a lo darh leh chuai chuai bawk a, smuggler an tih ni si kan Minister ina chaw a ei khan sawi a hlawh khawp mai. Abu Mazumdar hi buhfai supplier a ni tel bawk a, Mizoram sorkar hnuaiah buhfai a la supply mek a ni.

Musa Ahmed hi tun hnaia lo lang a ni, amah hi a hre chiangte chuan pa hausa leh thiltithei tak a nih thu an sawi. Sairang lamah a inbengbel daih a, vote pawh a lo nei. Hman nia Press Conference-ah khan a voter ID number lamin an puang a ni. Kuhva tawlh ruka inhnamhnawih ve mai ni lovin a meizang hlaptu (King Pin) a nih thu Assam media lam chuan an ziak. He pa hi Mizoramah a lo awm daih a, Assam Police lamin kum khat chuang an zawn hnuah Silchar Airport ah an han man a nia, hengte hi a mak hle.

Mizoram tana ṭangkai hnam dang an awm tawh ṭhin a, Mizoram tana hnawksak pawh an awm ngei a ni. Politics thila kan lak vek chuan a dik lova, heng mite hi tute pawl mah pawh an nih ka ring ve lova, mahse thurualpui tur an hmu zel zawk si hi hnam angin a tlawm thlak a ni. He hnam hi a harh a ngai a, tlawmngai pawl kan tih te hi an ngawih rei poh leh kan ngaih a ṭha lo - min zuamtute hi ṭhenawm tlangval an nih hlawm hi.

- Lalzarzova