SAWN PAI NAWN I DUH EM?

Tuna kan sawrkar hrawn mek MNF Ministry hi, Congress sawrkar inringtawk lutuk leh vawi thum sawrkar nawn inbeisei chunga MLA ṭhenkhat chhawk (candidate tum tawh lo) anga an khawsak vanga party chhunga khi awm, zar zo an ni ber.

Pu R Lalzirliana leh Pu Lalrinliana Sailo te'n MNF an zawm hnua, Pu RRR leh midang tam tak an lawmluh leh hnuah MNF party lam hi mipuiin an hawi chauh. Hemi hma zawng hian Tuna MP (RS) Pu K Vanlalvena leh Er Lalrinawma etc te hovin hmun hrang hranga Street Campaign an neih ṭhin pawhin ngaihven a hlawh lova, thlalera mi au-rawl, tih ang mai a khawhar thlak ni.

An Party President Pu Zoramthanga (tuna CM ni mek) hian kum 2018 inthlan dawn khan kan sawrkar huna kan hmalakna tur leh kan flagship programme Mau chungchangah ruahmanna kan nei fel vek tawh a. Sawrkar official te nena inrawn hranpa ngai tawh miah lovin, sawrkar veleh Bawngpui in sî ang phatin bul kan ṭan nghal thei dawn tih a sawi a nih kha.

Hetiang a nih lai hian, CM anga Hnam Rûn lama a thusawiah ve thung chuan, kan sawrkar flagship programme chu Mau ni lovin Rua a ni a ti leh hlauh thung. Bawngpui in sï ang phata bulṭan theih tur nia insawi chungin kum khat chuangzet raw chi siamtu lam Monu damloh thute nen hun khawhral a ni thung.

Campaign lai leh Sawrkar thar lakluh a nih tirh khan, sum lama harsatna awm loh tur thu te, sawrkar hnathawk hlawh an bat ve dawn loh thu bakah state budget pawnlam aṭanga sum tam tak haihluh a nih dawn thu an sawi uar hle a. Kan budget hi chu, 'a chi' tur mai a ni tih sawiin state budget pawh kan ta liau liau a nih avangin kan duh chuan kan bai thei a, kan duh chuan, kan kang thei bawk tih te a ri nawk mai.

Mahse kum hnih a ral meuh chuan, kan budget (kan ta liau liau nia sawi) chu vaibelchhe 3000 chuangzet kan hmu kim ta lo, kan indaihloh phah tih a ni leh ta. Hetih lai mek hian kan budget a tel lo Covid vanga pawisa dang kan hmuh tam tak erawh sawi lan a ni ve ngai lo thung.

Inthlan hma khan, SEDP cheng nuai thum sem theih a ni lo titu chu an mawl vang tiin kut min ben khum dur dur a, tunah chuan anmahni ngei pawhin an sem theih tak loh avangin a mawl zingah an tel ve a tih theih awm e.

Kum 20 chhung ramhnuaiah awmin, phingphihlip Si-ar lak tum an sawi ang deuhin Independent theih an inbeisei a, mahse Statehood-ah kan hahchawlh rih phawt ang a, kan la chhunzawm zel ang tiin an hote hminin, an lokir a. India Constitution hnuaiah zalenna sual chhunzawm a lo remchang lem si lo.

Sum leh pai lamah harhtharna sang tak changin, an rorelna hnuaiah nuih dur dur chung leh hlim si loin kan phun nuai nuai chu a nih tak ber hi.

Mahse an ṭhat ve riauna chu, an tum angin hlawhtling ngai lem lo mah se, SEDP pawh cheng 25000/- sem phawt in cheng 300000/- an la target reng thu an sawi a, an la hlim thei zel.

Tun hun hi, Mosia awm tura a nu hlawh neia rawih (hun hlim­awm) an tih kha a la nih loh hmel. A hun lo thleng tur chu, ka nghakhlel hle tih hla kha tui takin i sa zel phawt mai teh ang aw. Hmeichhia in mi thuhmun laka sawn a pai nawn chuan, mipa thiam loh ni lovin, hmei­chhe thiam loh a ni - Sawn man pek a ngai tawh lo.

I vote tur hre chiang rawh.

- Vanlalhuma Kawlni, Ramhlun South