Ruihhlo
Mihring nun tichheitu zinga langsar tak chu ruihhlo hi a ni a, mihringin hmasawnna kawnga zawh a daltu lian tak a ni thei. Hriselna lamah pawh taksa tichhe thei tu a ni. Hengte avang hian khawvel rampumah ruihhlo do hi eng sorkar mai pawh hian a ngaipawimawh hle a ni.
Kan zoram dung leh vangah ngei pawh ruihhlo hian kan ṭhalaite nun a tichhe hle a, upa lam thlengin. kan ṭhalai tam tak ruihhlo vanga nunna chan ta te pawh tam tak a ni tawh ang. Mizoram ṭhalaite hi Mizoram future an ni a, chung ṭhalaite chu Mizoram kut leh ke te an ni bawk. Ṭhalai zingah ruihhlo ti an tam chuan kan nakin hun atan a pawi thei a, kan mimal nunin a tawrh bakah kan khawtlang, ram leh hnam tan pawh a chhiatna thlen theitu a ni bawk.
Chutih lai mekin Mizoramah ruihhlo a hluar hle tih hi hai rual a ni lo a, hei hi eng vanga hluar nge tih te chu bengsika kan ngaihtuah a ngai tak zet tawh a ni. Ruihhlo hluar chhanah hian tu thiam lo nge? Kan thuneitu lam thiam lo nge? Nu leh pa emaw khawtlang lam thiam lo ni ang? Engpawhnise tumah inmawhpuh tawn lo a, keimah ni ṭheuh tun aṭanga ruihhlo do kawnga theihtawp chhuah a, mimal tinte ṭan lak hi a pawimawh tak zet a, kristian kan nihna zawn aṭanga ruihhlo ṭhat lohna te thlir thiam hi thil pawimawh ber zinga mi a ni ngei ang.
Kum tin, nitin, darkar tin deuh tho ruihhlo vangin khawvel hmun hrang hrang mihringten mual an liam zel a, chutah chuan kan ram pawh hi a bang bik lo a ni. Hei hi mahni ṭeuh inzawt ila, nun tichhe theitu ruihhlo chu sirah kan hnawl mai ngam dawn em? Mi piangthar tan phei chuan Pathian thu nena a inhmeh lohna kan hmu thiam em?
Kan ram leh hnam damna atan hian eng dang a awm lo a, Pathian thu bak chu a awm lo a ni. Chuvang chuan kan ramah hian chanchinṭha Pathian thutak sawi hi a pawimawh hle a, kar tluan deuh tho a inkawm nei tam Mizote zingah hian Pathian thu sawi hi an tam hle a ni. Mahse chu chuan kan nun hi a pawh pha tam lo a ang hle bawk. Chuvang chuan Pathian thu hmanga ruihhlo do hi a pawimawh hle a, kristian kan nih phei chuan kan tih ngei ngei tur niin a lang bawk.
- John Lalfaka