Corruption

Corruption han tih hian a huam zual hle. Hlemhletna ti te pawn a sawi theih mai awm e, amah­erawh chu tun ṭuma kan sawi tum leh thlur bing tum chu mirethei chan ai emaw dik lo taka hlawh bak pawisa eirukna hi a ni.

Ram hmasawnna daltu leh ramin hma­sawnna kawnga zawha tiṭhuanawp theitu chu corruption hi a ni a, hei vang hian kan ram hmelma lian tak a ni kan ti thei awm e. Kan ramah ngei pawh corruption hian minti buaiin kan hmasawn theihna tur min daltu lian tak a nih tawh avangin, kan kohhran leh pawl hrang hrangte pawhin corruption hi an do a, mimal ang zawng pawhin dona tak tak an awm nuk bawk.

Zirlai tam tak chu an lehkha zirlai aṭanga corruption duh lo bur an ni a, sorkar hna ka thawh hunah chuan corrup­tion hi ka do ang, tite pawn an sawi ṭhin. Ṭhenkhat chu lehkha an zirlai aṭang pawhin eiruk an tum nghal em em bawk a, mihring mizia in ang lo tak tak kan nih avangin zirlai kan nih lai aṭanga eiruk hua leh haw lo kan awm mai a ni zawk.

Atira midik tak tak te a hnua corrpution a tal buai leh te pawh an awm thei a, hengte hi eng vang nge tih chuan a chhan hrang hranga awm thei ang.

A chhan zinga langsar tak nia lang chu nupuite vang hian corruption-ah hian a lo fihlim loh theih dawn hle niin a lang a, ṭhenawm inerna aṭang pawhin corruption tih duhna rilru hi a neih phah theih. Tin, kan kuta thuneihna a tam vangte, mamawh bak awhna suala thin­lunga tlukluh vangtein corruption tih duhna hi mihring nunah hian a lo awm fo a ni. Heng lo pawh hi chhan hrang hranga awm thei ang.

Ti hian han ngaih­tuah ta ila, corrpution hi thil ṭha nge thil ṭha lo? tih hi mimal tinte kan inzawh nawn fo a pawimawh hlein ka hria. Corruption a hluar chuan ram hmasawn theihna tur kawng tam tak a ṭuanawp dawn a, chu chuan ram economy a tichhe ṭhin a ni.

Ram economy chhiain a nghawng chu ram mipuite intluk­tlan lohna a nasa thei a, chu chuan mirethei leh mihau­sa kar a tizua thei hle. Sorkar ṭhain a tum ber chu mipuite rualkhai zawka hmasawnna hi a ni a, chumi nei thei tur chuan sorkarin scheme hrang hrangte leh hma­sawmna tur prog­ramme hrang hrangte a duang ṭhin a ni.

- Fanai Biaka