SORKAR HNATHAWKTE HLAWH HRENSAK LAIA PARTY WORKER TE HNA PEK HI! KHAWHLUT ZUR ZUR, LIAM LEH ZUR ZUR

September ni 11, 2018, MLA Election hma lawk khan MNF President Pu Zoramthanga chuan Kolasib Diakkawna MNF party pisa thar hawnnaah sorkar laipui aṭanga sum lo kal tur tamzia heti hian a sawi a: 

“Vaibelchhe nuai khat chu state 8-in a inzatin insem ta ila (insem tur tihna ni lovin). A hmang tam theiin an hman tur a ni ringawt. Inzah sem pawh ni ila, kum khata development fund-ah cheng vaibelchhe sing khat leh sang hnihin min daih. Sawmpahnih vawi riat sawmkua paruk, vaibelchhe 40 lai ala chuang leh nghal thei zawk a ni. State tin hian insem chhin ta ila, vaibelchhe sing chuangin min daih vek turin tuna kan budget hnuhnung ber plan sector a mi pawh zuk awm a mawle. Congress Sorkar hian vaibelchhe sing an hmang em? Kum khatah za pawh an hman ka ring lo. A bang hi a tam lutuk, khurpuia tui lo khawh lut chur chur, liam chur chur ang a ni,” a ti. 

Kum 2018 MLA Election hmaa Pu Zoramthanga thusawi khu lama hman sen loh Mizoram a lo khawh lut chur chur chu khaw nge a liam zawh tâk le? Tuna kan dinhmun erawh a dang ta hle; sorkar hnathawk hlawh pawh a pe kim thei lo va, a pûk sak ta hial a ni si a. 

Kum 2020, February ni 25, a lo her chhuah meuh chuan CM dinhmun zahawm tak luah ta Pu Zoramthanga chuan, Assembly House-ah heti hian thu a sawi leh a: 

"Jal Shakti Minister Shekhawat-a pawh khan mimal takin min rawn phone a, 'Hei in project kha ka hmu a, tam deuh ka rawn pe dawn che u a ni,' a ti a. Vawiinah hian ka sawi duh loh chu, a rawn sawi amount kha a tam lutuk a, ka ringhlel a, chuvangin, amount-a ka chian loh chuan ka sawi ngam bik lo. Tin, a dang pawh a awm ṭeuh mai," a ti leh a. 

Sorkarna an siam hnuah pawh sum tam turzia hahípin a la sawi chhunzawm zel a; mahse a tak takah chuan Sorkar hnathawk hlawh pawh a pe kim thei ta lo chu a nih ber hi. Chhungkhat pa berin a nupui fanaute hnenah, "Sum hi kan ngah a nia, lo la lut tur pawh tam tak a ni," ti reng ta se, an chhungkua chu sum hman leh khawl kawngah an ngaihtuahawm viau lo'ng maw? Lo ngaihtuah zui ve teh u. 

Kan beisei hauh lohin COVID-19 hripui a lêng, kan chi-ai a, kan buai em em a, a mangan thlak a ni. He hripui, COVID-19 do tur hian Kohhran, pawl hrang hrang leh mimal ṭhahnemngaite’n phal takin Chief Minister Relief Fund (CMRF)-ah sum kan thawh khawm zur zur a, ruling leh eptu MLA te pawhin vaibelchhe 17 chuang an thawh dawn. COVID-19 hi a hnam angin kan do va, kan ṭangrual em em a ni. 

Sorkar hnathawkte phei chuan pawl bil anga CMRF a pawisa an thawh bakah sorkarin an hlawh engemawzat a hrensak hial a ni. Chungte chu COVID-19 hripui dona tur niah ngaiin ngaihṭha takin, “E a pawi lo ve, COVID-19 hripui hi kan do hneh dawn phawt chuan kan hlawh hi kan ui reng reng lo’ an la ti a ni. 

Mahse, mipui beisei angin thil a thleng lo. Mipuite chuan COVID-19 hripui hi kan State hotute nen kan do tlang ang a, ni 100 chuang Lockdown vanga an sum leh pai lakluhna tlachhiate ṭanpuina leh dawnkan zui nan state-in sum a neih ang ang kan hmang dawn emaw kan tih laiin 'development chhuanlamin’, hna hmanhmawh thlak ni miah loah an party worker te tan chauh work order an sem zur zur a. Lockdown vanga mi harsate tana pawisa a khurpuia lo khawh lut zur zur a, liam zur zur ang ni lovin, party worker vulhna atan hna ṭau an ṭhet hawng a; party worker duhsak bik tana liam zur zur an pek chhuah chauh chu mipui te’n kan hmuh leh kan hriat phak a ni ta si a nih hi! 

Heng an party worker te tana work order an sem zur zur te hi a hmanna tur ruahman sa vek kum kal ta 2019-2020 budget ami a nih vangin a tihdanglam theih tawh loh an ti a. Sorkar hnathawk hlawhte pawh hi Budget a dah sa vek asin. 

Sorkar laipui meuh pawhin COVID-19 hripui vangin Budget a sum hmandan tur a ruahmansa tam tak COVID-19 hri do nan a tidanglam a. Kan state-a Junior Minister ber, Pu Robert Romawia Royte enkawl  Department chanpual sum chu COVID-19 hripui do nan a hman theih loh bik tihna em ni? Sorkar hnathawkte pawhin Budget a pass sa vek an hlawh COVID-19 do nan an dawng kim lo a ni lawm ni? Cabinet Minister dang rawn miah lo pawhin Chief Minister hian kum kal ta sum hman bang emaw, kum kal mek Budget a sum ruahman dan tidanglam turin thuneihna a nei tih te chu mipui nawlpui hian kan hre ve a nia. 

Mi pakhat ni si, Chief Minister leh Finance Minister  ‘thawk dun ṭha lo’ lutuk hi ramin kan chhiatpui zel dawn niin a lang. COVID-19 hrileng vangin lockdown neih a lo ṭul a, nitin mahni eikhawp la lut ṭhin te, in hlawhfa chawp 

ṭhin te hna chawlh a lo ngai a, mi rethei tan phei chuan he hripui hi a va huatthlala zual tehreng em. He'ng mi harsate sum leh pai lakluhna chhe mek tuam hlawm leh chhawmdawlna lam aia party worker te tih lawm tumna lama sorkar a kal nasa ta lutuk hi engtia tih chi nge ni le? 

Hei hi em ni mipuite aṭanga MNF sorkara pawisa khawh lut zur zur, MNF party worker-te tan chauha liam leh zur zur chu? Kan Zoram hmasawnna tur ni lo, Pu Zorama leh mi tlemte hmasawnna tur hi Zoram mipuite hian kan lo khawhluh tir zur zur zawk em ni? Ngaihtuah a ngai e.