Tlawm thlak an ti ve deuh ṭhin ang em le?

Sawrkar hmalakna tur ni awm takah hian, MZP leh YMA te hian Chakma te hi an buaipui em em mai a. MZP phei chuan Chawngte leh a chhehvela Mizoram Chakma dik tak leh dik tak lo te chhiarpui (census) te neiin nasa takin hma an lo va la tawh nghe nghe a.

Mizoram tlawm­ngai pawl lian ber YMA lah chuan hman ni lawka Champhai Zotlanga an General Conference (October 17-19) ah khan Chakma chungchang hi an khel bup bup mai bawk a. Chutih laiin sawrkar laipui lam zawkin state tinah ramdang mi dap chhuaka hma la turin thupek a lo chhuah tawh bawk a. Kan sorkar ber lah chu a la ngawi ta vung vung mai si zawng a nih hi! Hui Ha!

Mizoram chhunga kawng zawng zawng a chhe rual em em mai hi thil mak tak a ni. Hmun tin maiah Association hrang hrang leh mi tlawmngaite kawng chhe siamin an hnatlang sup sup mai a. Truck driver leh sumo driver-te an nuar thul! Khawvela ruahtui tlak tamna bera an sawi ṭhin Meghalaya state kawngpui chu a fai mam hun reng mai si! Kan sorkar hotute ve hian eng nge an tih bik? An zak ru ve chem chem ang em le?

Zirna lam nise, a mangan thlak a ni. Kan sorkar sikulte a rawih chhe zo dawn! Primary leh Middle school-te phei chuan naupang tih tham alawi an nei ta mang lo. Mission sikul leh private sikul te'n a dawlh chhe zo ṭep! Zirtirtu mahni thawhna hmuna awm ṭha peih lo an tam. MZP-in a tuar zo lo! Sawrkar thawh ai an thawk! Sawrkar hotuten tlawm thlak ti ve tak maw?

Gas bur tih ching­pen lah a tam. Sawr­kar hian a tih ngaihna a hre lo a ni chek ang a. Mipuiin kan sepui ruah tuar tlawk tlawk mai a. Y.M.A Volunteer an che leh ta! YMA a han chet meuh chuan mipuiin gas bur khat (full) kan la ve thei ta! YMA dam reng rawh se. Mahse, YMA-in tha a han thlah hlek chuan a ngai te bawk a ni leh mai ṭhin. Khawiah nge kan sawrkar hi a awm ve le? CM chu ni i la ka ..... tawh mai awm e!

Aw, kawlphetha mawlh mai hi, rual awh a va na em! Bairabi Hydel Project P.C. Sawrkarin a buaipui mup mup laia, an tih dan zir ve tura palai rawn tirtu Arunachal chu khitah khitah an awm tawh! An power an ei seng tawh lo. Zofate'n khua kan tlai leh ta! Kum 30 chuang liam ta kha a pamhmai lua e! Kan sawrkar hotute hian a thang tlawm thlak an ti ve ang em le?

- J. Sawilaia