Aw min hrilh rawh - inthlan hma ngeiin!
Chhut leh ngaihtuahna sen chiam ngai mang lova, British PM thar, Rishi Sunak-a'n "Leadership is not selling a fairy tale" tih an han sawi te hi chu a va'n dik mai mai e aw. A thlum leh lem nuam, a tak ram thleng ngai lo tur hi hruaitu ṭha chuan a hruaite a barh satliah tur a ni lo! A tak, tlo leh ṭha min hrilhtu leh min tiamtu hi a bikin politics huangah phei chuan Mizote hian kan mamawh tak zet.
Awle mittui, thutiam hlawhtling lo leh hmaikawr ngai bawk a kan hruaitu (leader) te in rawn inlan leh chuan, a nawlpui hi chu kan inpalthlukna ngai 'in thangah' bawk kan rawn inawk tâng leh chat dâwn sa!
A nawlpui hi kan chim chin a hniam ve em tlat a! - Tumkhat chu kan ṭhianpa ram enin CM bangla aṭanga hla ve fê AMC huam chhunga ruam pakhatah kan kal a. Chu a in hmun bawra chengte sukthlek tur awm chu a hriat theih thuai nia!
Chhun pachang ni sa vel vawlah chuan in panga emaw lai aṭang chuan YouTube lama thawnthu phuahchawp chhiar ri hi a inchhawn chuah chuah a, woofer-ah an ti ri ring sauh sauh zui - a manganthlak duh a nia aw! Timaw? Social media lama kan râk ri, kan thil thlir chin leh ngaihthlak ṭhin te hian ram hnuk a hnaih lo lutuk tlat! Dahna ruam a hniam tlat chuan politician tam tak tan chuan ke tahna (doormat) dinhmun luah tlak lek ni hek i, keini mipui hriatrengna (public memory is short) lah hi a tawi si a, bum kan nuam a ni! Kan it leh awh a tet miau bawk avangin tawktarh holam tak tak hmanga bawl kan nuam hle.
A tlai hmain, vat! - Inthlanpui a hnai tial tial a, kha pitar kha rilruah a lian zual zel. Hmeithai a ni a, thil a hre tam lovin a hre thui lo - a rinawm bur thung. Tuktin a feh a, haw lamah a chawhmeh hawn remchan ang ang a zuar ṭhin. Chutiang chuan kum 5 a hmang tling tla ve leh mai ṭhin a, vote a neih tirh aṭangin political party pakhat tân chauh vote a thlak ṭhin. Chu party a vote ṭhin chhan chu a pasal thi ta chunga a rinawmzia tarlan nan a hmang. Ani thingtlang pitar chu dem mai ka'n tum a, khawpui lama party pakhatin hna a pek nu pakhat paw'n amah hna petu political party bâk a vote ngai tlat bik lo!
Kan rinawmna hi bihchian chuan mahni hmasialna leh hlawkna lo tel tawh avanga lawmthu kan sawi lêtna vêl mai mai lek a ni! Ram leh hnam kan ngaihtuah pha thleng lova, hmana chithlum min hmuam tirtu te khan kan ngaihtuahna an duhsakna them min lo pek tawh hmangin an lo thunun zeih zeih zui zel lek a lo ni! Tawktarh hmanga thunun theih mihring kan tam poh leh mi ṭha lo kutah thuneihna a awm zel ang. Political party pakhata hawi chhuak thei map lova awm rinawm ve bur aiin tunge ram leh hnam hmangaih tih hi chip a hun. Chuvangin, kei ni lo, keimahni bil bik ni lo - kan zaa nghawng hmasawnna chang thei turin rilru puthmang suk sak tawh te hi min hrilh harh vat teh u!
Tunge rawn ding chhuak dâwn? - Lo Rv tawk awm se, concert chhim tawk awm bawk se... Pu PC Lawmkunga (IAS rtd) ṭawngkam han hawh zawk ila, "mi ei leh in tur ka va sawi sak thei lo!"
Kan sawi theih chhun chu zawhna pakhat a ni. Tunge heti khawpa kaihhruai ngai mipui hi min khai chhuak tura rawn ding chhuak dâwn tih hi a ni.
- Tpa Bunghai