Kawng chhawng aiah Kawng chhia!

Tuna kan sorkar hian kawng chhawng min tiam a, tuna kan hmuh mêk chu kawng chhia a ni.

Kawng chhawng min tiamtu hi chuan thil theih loh min tiam a, fly over naran siam chu a theih a, Aizawl khawpuiah indawh phei zur tur leh kawngpui chunga thui taka awm phei zai tura sawi kha chu a theih loh a ni. Kawng chhia hi chu siam ṭhat theih a ni a, tun ṭhal lo awm turah hian an siam ka beisei ve tlat.

Kawng chhia siam theih ti chiangtu chu MNF sorkar an ni. Kum 2018 kum tawp­ah an rawn sor­kar a, Congress in pawisa an khawl sa hmangin kum 2019 kum tir aṭangin an han siam ṭha tak tak chu Assembly House thlengin an pu lut a. Kawngpui ṭha avangin mahni infakna resolution kan hmu hial a nih kha. Tunah hian kawng a chhe leh ṭan tawh a, siam a hun leh tawh.

Kum 2023 ah MLA inthlan a awm dâwn a, tuna kan kawngpui ang hi chuan sorkar lehna chance hi a tlem mah mah ka tia. An siam ṭhat hman chuan mipui hriatrengna hi chu a tawi an tih angin an theihnghilh ve leh mai ang. Kan sorkar hian kawng chhawng siam tum lo hian kawng chhia hi repair mai se tlinna chance a san zawk hi a mimal taka ka rin dan a ni.

Chutihlaiin he sorkar hi a chhungah khi a awm niin an sawi tlat thung. MNF zingah hian läwm lo, nakin lawka remchang zawnga chhuah emaw sorkar do zawnga er lêt vak tum awma an sawi hi chu politics lama thil thleng fo pangngai a ni. Mi zawng zawng a lungawi theih loh.

Mi chak bîk, hna­thawk tam leh CM rin bik chuan pawi­mawhna an nei sang zel a, chumi pawm thiam tán party lamah hmun a awm ang; chumi pawm lova thik leh sawisel chu an tlatlum dawn lo, an lang zel dâwn a ni.

Kawng chhawng siam hma hian liam tham takin an phel rup ang tih a hlauhawm avangin kawng chhia tal hi siam hman se a siamna tur pawisa a awm leh awm loh chu keini hriat phak a ni ve lo.

Mipuiin kawng chhawng (kawng lûn laia fly over naran ni lo) hi kan beisei tak tak lo. Mipui beisei chu kawng chhe siam ṭhat a ni a, hei hi kan sorkar hian a thei em em ang, pawisa a awm phawt chuan.

- Marindika