MIZORAM KAWNGPUI CHHIATZIA

Mizoram dung leh vang kawngpui chhiatzia thu hi, kal chhuakin a hmunah va hmu ve kherlo mah ila, media hrang hrang; T.V, Whaatsapp, YouTube leh nitin chanchinbu atangte in kan hre thei awm e. Furpui lai chuan kumdang ah pawh a chhiatzia kan hria, tun tum zet erawh hi chu kiltin mai ah kawngpui chhiat thu hi tlangau pui a ni ta, a chhan leh avang pawh mipuiin kan hre thawkhatin a lang. Hei hian kum 2023 inthlanpui ah te hian effect/nghawng rawn neih phah tak maw!!! tih hi mi tam tak thlir dan a ni.

Aizawl khawpui pawnlam kawng chhiatzia thu kan sawi luai luai lai hian, Aizawl khawpui kawng leh a chhehvel te hian sawi a hlawh ve vaklo a kan hriat avang hian, hotute hian an ngaihthah phah em ni chu aw a tih theih. Khawnge vengdang khawchhung kawngpui chanchin sawilo in, nitina ka veivahna thin kawng chungchang chauh hi i tarlang teh ang.

AIZAWL TEMPLE to MZU INKAR KAWNG : He kawngpui hi Aizawl khawpui chhung kawngah chuan a lunin a pawimawh ber hial awm e. Mizoram University leh Central Godown lian panna kawngpui tha, rulnganpa anga dum mam tak a awm zur awm tak hi, a chhe em em a ni. Helai hi Aizawl khawpui West-I leh West-II bial niin, rulling MLA leh Minister chak tak te bial ani nghe nghe a. Anni pawh tuk zan an vei a, ngaihpawimawh awm tak anih tehreng nen, an pu ber hi an sawipui (dil) ngamlo nge an ngaipawimawh tawklo tih hi mi tam tak thlir dan a ni. Kumtir lam khan pipe lian tak tak, pathlawi pawm zet tura lian, sei pui pui, thuk takah PHE ho in an phum a, tunah chuan an hnawhkhat leh vek tawh a. Mahse, kawng awmsa rualin an hnawh mam leh silo a, black top loh nen, kawngkhuar tam bawk nen, motor chhuk chho inpel turte hian a mam lai inchuh hian an inthawi thuak thuak a. Bus leh motor hnunglam a chuang thin tan chuan fimkhur a tulin intauh dawt chang a awmfo thin. Tuna a chhe zualpui deuh te hi chu kan MLA te hian an fund te hi hmanga han siam ni se zawng, an beisei aiin an hlawkpui ngei ang le.

Hei chang a nilo, Zohnuai kawngpui hrul Pi Ruaipuii building thlen hma Pu Zoliana leh Pu Zama te in kum 2017 June thla a kawng leh retaining wall chimin an in a hnawlchhiat sak te chu Disaster Management lamin hetih hunlai a tanpuina an pek bak chu vawiin thlengin sawrkar lamin Retaining Wall te siama hma ala lak zui tak loh avang hian, helai hmun hi kawng a zim a, motor inpel tur tan changlo mihring tan pawh tlak hlauhawm tak a ni. Loh theihloh in loan te la in Pu Zama hian amahin Retaining Wall te siamin hma a la a, sawrkar lam hian an enpui lo nge kawngpui aia sangin pan angreng takin Retaining Wall a siam a, a in sak leh kawtzawl in kawngpui a rawn nawr zim a, motor pawh inpelh theih a ni meuhlo. Sawrkar pui hian ngaihven deuh hlek se zawng tun aia tha leh mam deuhin a tih theih ngei ang le. VVIP ten MZU (Mizoram University) an tlawh dawn a phuailuai taka repair chawp chuk chuk leh a chhiat lutuk em avanga motor a kaltir ngamloh vanga Helicopter te a kaltir kherlo a kaltir na tlak a tha leh mawiin he kawngpui hi chu i nei ang u.

Reilote hnu ah Chief Minister veivahna ber leh a inkhawm kalkawng ber pawh ala nimai thei asin. Chutih hunah chuan kalkawng dung tluan deuh thaw a kawngpui area sir tawn tawn a bungrua hlangthla leh hlanglut, reilo te ding zawk tih loh nileng zankhua dawn dawna motor hung (park) te hi awmlo in, a dahna tur hmun siam ah dah a ni ang a. Kawngchhawng leh Fly over bridge pawh siam ngailo in, kawng bumboh leh khuar awmlo in, rulngan pa ang mai a mam nalhin, motor jam thin avanga programme pawimawh neite tlai hlauhawm lo in mitin kan inpel zung zung tawh ang.

Chuchang ala nilo, kawng kawi leh kawngsir zau deuh lai apiang a, Hawkers leh eichawp zuar awm zut te pawh hi, an awmna tur fel tak ruahman sak niin, vengchhung kawrpui leh nala (Tuiluankawr) te hi, bawlhhlawh tereuh te thlenga paih nana hmanglo tura inzirtir leh khauh zawka enkawl turin, Y.M.A. section tin ten an vil ang a, kawtlai leh kawtko lungrem thlengin fai tak leh mawi taka chei leh enkawl turin hriattir leh ngen a ni ang a. Vaivakawn taxi stand bul lungrem felfai taka enkawl leh Poster mumal taka tar te hi a tha, hetianga veng tinin kawrpui leh kawtlai nala (Drain) kan vawn thianghlim chuan chhuah lam leh tlaklam Chite leh Tuikual, kumtin thenfai hnatlang neih thin te pawh a ti ziaawm ngei ang.

Mizoram kawngpui chhiatzia sawi atangin, hengte hi a nimai lo maw!!! Miten kalphungthar tia an tlangaupui mek leh miten an bawh ruih ruih hi, hawh u, tun atang hian i tan mai teh ang u. Mizoram a kum nga (5) zawn zata khawpui fai ber lawmman dawng thin Biate khua te khian, hetiang aimah a khauh zawk a an in enkawl vang leh an tanrual vanga dawng thin an ni.

- Lalhmangaiha Sailo Holy Cross Bakery Ph : 9436360275