Connected Health Care chu engnge ni?

Khawvel changkang chho zelah hian hmun kilkhawr tak tak leh thingtlang khaw tin mai hi mobile phone leh internet hmanga ‘hmeh zeuh’ in kan inbe tawnin, kan inhmu tawn thei tawh a. Heng te hi a ṭha lam zawnga hman theih an ni a, a chhe lam zawnga hman theih an ni bawk.

Heng khawl thil, a ṭha lam leh mihring tana hman ṭangkai theihna kawng khat Connected Health Care chanchin hi lo bel chiang ila -

Khawpui lian zawkah te damdawi lam thiamna sang zawk leh ṭha zawkte an in bun khawm avang hian India ram hmun pilrila mi chengte tan hian Daktawr Specialist te rawn leh inentir hi thil awlai a ni lo. Damlo leh a enkawltu tur (attendant) tan te zin veivahna man, khawpui lian tak taka thlen man leh vei vah man te leh Daktawr hmu tura appointment lak nghah hun chhung nen, namen lo a ni. A lo tawng tawh te chuan kan hre thiam tlang hle awm e.

Chung harsatna te sut kian deuh nan thiamna sang zel leh technology changkang chho zel ‘digital technology’ hmang ṭangkai a, thingtlang leh hmun pilrila chengte tan Daktawr Super Specialist ṭha tak takte ral aṭanga awlsam zawka videoa rawn leh inenkawl zui theihna hi Connected Health Care an tih chu a ni.

Connected health care hmang hian tu pawhin India ram hmun hrang hranga Daktawr thiamna bik nei Super Specialists te, Delhi, Kollkata, Mumbai, Chennai te emaw te pan ngai lovin mahni awm hmun aṭangin natna hrang hrang atan an lo rawn ve thei ta a. Hei hian sum, tha leh hun senso a a ti tlem zawk a ni.

Mimal tan chauh pawh ni lovin, sawrkar tan pawh medical re-imburse­menta insenso eng emaw zatin a hum thei bawk a, medical re-imbursement claim ṭhin te tan pawh, kan claim theih zat bakah ei leh in leh khawpuia chen leh veivahna man kan claim theih loh te pawh tam takin min chhan thei a ni.

Connected Health Care ṭangkaina dang leh

Khawsak dan a lo changkang chho zel a, mihring kan lo dam rei tial tial a. Amaherawh chu, nun changkan chhoh zelna hian natna ṭhenkhat heng - zun thlum, BP sang, kal leh lung lam harsatna a keng tel ve thung a. Chung natna te laka invenga do let tur chuan mahni inenkawl a, hriselna ngaihven leh vawn ṭhat lamah ṭan lak a ngai a. Natna khirhkhanin min tlakbuak hmain mimal mamawh ang zela damdawi leh, nunphung leh, kan taksa hriselna enfiah ngun te, eitur leh rilru te her danglam a ngai thung.

Hetianga inenkawl ṭha tur chuan Daktawr rawn reng te a lo ngai a, an mi rawn ang leh damdawi chawh te uluk taka zawm te a lo ngai a. Connected health care service chuan dawmdawi lam thiamna leh techno­logy te hmang kawpin awlsam zawka invawn hrisel theih dan a rawn paw chhuak a. Mobile phone te, Laptop te leh tablet (laptop te chi ti mai ang) hmangin Connected Health care hi a pawh theih vek a ni.

Connected health Care thawh dan

Video hmangin Super Specialist Daktawr te rawn an ni a. Ṭawng thiam leh damdawi lam thiam leh internet leh computer thiamten chutiang hmun chu an vil a. Damlo chu ‘account’ hawnsak a ni a, a natna report leh inentir tawhna te zawng zawng ‘free’ in a copy dah ṭhat sak a ni a. Daktawrin damlo leh a report te leh inentir tawhna zawng te a en a, video-in damlo nen an inbia a (ṭawng lettu a ṭul chuan, ṭawng lettu telin) Daktawr en leh rawnna te chu print chhuah an ni a, damlo chu pek a ni a, a copy pawh digital-in dah ṭhatsak a nia. Chu chu damlo leh Daktawr te chuan an duh duh hunah an enin an hmang zui zel thei a ni. (Hei hi ‘tele medicine’ an tih ṭhin aia huap zau leh ṭha zawk a ni)

Connected Health Care-ah hian Daktawr rawn man hi a tlawm thei ang bera siam an ni a. Damdawi lam thiam Super Specialist Daktawr te bakah, Psychologist (rilru lam thiam mi) te, Counsellor te, Dietician te leh Physiotherapists te, Damdawiin te, Diagnostic Centre leh Damdawi zuartute pawh thawhpui an ni.

‘Connected health care service’ chuan heng te hi a huam -

• Video hmanga Super Specialist Daktawr thiam tak tak te rawn

• Rawn vawikhatna

• A bawhzuina

• Daktawr dang rawnna (second opinion) - a ṭul chuan

• Specialist pakhat aia tam rawnna. (a ṭul chuan entirnan, thin leh kal specislists te rawn kawp an lo ngai thei)

• Mamawh anga zela ei tur leh ei dan ‘diet plan’ (menu)

• Rilru hriselna atana Counselling

• Natna benvawn enkawl dan

Connected Health Care-in

a huam loh

Connected Health Care hian emer­gency a huam lo. Tin, Hospitala in admit ngei ngei zai ngai emaw te hi a ṭul tawpah chuan a pumpelh tir thei lova. Amaherawhchu, chutiang hun a lo thlenah chuan a ṭul dan angin leh amah enkawltu Daktawrte nena ṭang kawpin, rawn tur leh Hospital dik te, appointment te leh sensoa bumna lakah min enkawlin min hum thei a ni.

Tin, mahni awmna hmuna Daktawr te a kal kan lova, a thawhpui zawk a. Super Specialist rawn a ngaih huna rawn tur an awm si loha hmun dang (khawpui lian zawk) pan a ngaih hmain senso huma rawn theihna a ni zawk a ni.

Chuvang chuan “Senso manhla, inentirna dik” tih hian Connected Health Care hi a sawifiah ber awm e. India ram Prime Minister-in ‘Digital India’ a sawi lar em em mai tih hlawhtlinna pakhat pawh a ni a tih theih ang.

India ramah chuan Catex Health Services hi hmahruaitu a ni a. Mizo­ramah pawh hma a rawn la mek a, Trinity Diagnostic Centre, Zarkawt nen an thawkho. Phai pan ngai, panna tur sum awm si lo tan phei chuan thil ṭha tak leh hmantlak tak a ni thei a ni.

- Lalrinmawii Fanai (Teteii)