RINAWMNA
Hman ni deuha Hindu pawl pakhat puithiam, a naute hmeichhe pahnih pawngsual thubuai avanga court-in lung in tang tura a hrem chungchanga a laka rinawm tlat, a nau ṭhenkhatte thil tih dan leh chet dan khan ngaihtuahna a tithui ngawt mai.
Kan India ram leh Mizoram chang pawh ni loin khawvel ram hrang hrangah pawh hian a bikin ram hruaitu ṭha lo, rinawm lo tih chiang tak tawhte chunga eng pawh huama rinawm tlat hi hmanah leh tunah pawh hian an lo awm ve teuh tho mai.
Hruaitu ṭha lo leh rinawm lote laka rinawm tlatna hian ram hrang hrangah chhiatna nasa tak a lo thlen phah tawh - hruaitu rinawm lo laka rinawm tlatna hian! Hruaitu rinawm laka rinawm leh hruaitu rinawm lo kalsan ngam India ram state dang leh kan North East state puite ngei pawh chak taka hmalam an pan a, an state khawpui leh kan ram khawpui ber New Delhli te rel hmanga an service tir theih tawh laiin keini erawh chuan, “Cheng khat pawh ka eiru lo” tih lam kan la khel loh nakah!
Rinawmna hi mihring kan nih chhung atan te, sawrkar inrelbawlna atan leh Vanram meuh thlen nan pawha thil pawimawh mah nise mi rinawm lo tih chiang em em tawhte laka rinawm erawh kan ba lo tih kan hriat a ṭha awm e. Kan Pathian biak ngei pawh hi rinawm lo, thu tiam anga awm lo leh ṭhin nise tiang tak hian zuitu a ngah kher awm lo e!
Political field chauh pawh ni loin nula tlangval nupa karah pawh a tu emaw zawk a intiam anga awm loa rinawm lo tih hre reng chunga a rinawm luih reng chuan a lu chungah meiling a chhek khawl a ni lek fang ṭhin.
Zofa te, thu uar deuhten Pathian hnam thlan leh zawn chhuah ang hiala an sawi ni chung sia heti tak maia hmasawnna ruhrel lian hrang hranga kan la hnufum em em reng tlat mai hi a chhan leh vang bul berah chuan hruaitu rinawm lo, Pathian leh khawvel sawrkar duh dana thutiam anga awm leh lo ṭhinte laka kan rinawm tlat vang hi a ni thui khawp ang le!
MLA inthlan lo awm leh turah hi chuan an rinawm lo a ni tih chiang tawhte hi chu hnawlin, an rinawm leh rinawm loh pawh la chiang lote lakah hian kan rinawmna han sawn ve ta ila. An lo rinawm chuang ta lo a nih leh inthlan leh pekah mi dang kan vote leh mai ang; chu chu a democratic em em si a.
- V.Lalchhanhima, Chhiahtlang