AR an chhuah hunah chuan...

"Assam Rifles hi an chhuak dawn em?" tih hi zawhna a ni tawh lova, "Engtikah nge an chhuah dawn?" tih hi zawhna a nih tawh zawk avangin mahni thiam angin i han sep rawtui ve dawn teh ang.

1. Football khel­mual - Mizote infiamna ngainat ber football khel­mual hi tuna a awmna saa dah zel emaw, a awmsa sawn hret emaw hian ṭha tak siam ni se. Football khel­mual bik liau liau niin running track pawh awm lo se, mi 15,000 leng a nih pawhin a tawk tiu teu viau ang. Dressing room thiang­hlim ṭha 4 awm se, light êng ṭha nen a tawk hle ang.

2. Puipunna hmun ṭha: Tun hmaa AR Cinema Hall lamah emaw, Venghlui lam hnaih­ah emaw hian a chung nei lo puipunna lian, a sira mipui ṭhut theihna amphitheatre siam ni se, hei chu mipui 20,000 leng vel tal ni thei se.

Independence Day leh Republic Day bakah kohhran inkhawmpui hrang hrang, Chapchar Kut leh kut dang dang hman theihna tur niin concert leh exhibition leh fair atana hman theih ni se. A chhuat hi RCC emaw chang ṭha tak ni se, hman loh niah parking ṭha a ni nghal thei ang.

3. Hall lian: AR hmun hma hi a zau bawka Saron Veng hnaih lamah hian emaw Multipurpose Hall lian ṭha tak, mipui 5,000 vel lenna siam ni bawk se, kawt zau tawk leh parking nen. Hei hi contact sports bakah basketbll, volleyball, bad­minton etc atana hman theih a ni bawk ang.

4. Kawngpui ṭha leh parking: Bethlehem Veng aṭanga main road pan chhoh theihna hi zal ṭha deuh taka sial theih a nih hmel a, in pahnih khat ṭhiatin Saron Veng Baptist Biak In bul aṭangin zal nuamin a siam theih bawk, heng tawn tawnah hian parking zau ṭha se. Main road hi kawngpui metre 10 vel dawrha sawn theih a nih bawk chuan parking ṭha a ni nghal ang.

AR chhuahsan hmunah hi chuan sorkar office dah phal miah lo se, hall-in a ken tel bak a hranpa sumdawnna hmun siam phal lo se. Hmun awl dang zawng hi thing phun belhin tihring ta ila, a nuam ngawt ang.

- Zosangi Pa