LEHKHABU PHO RÚNPUI
Mizo Writers Association chuan, ni 24–29. October. 2022 chhung khan Vanapa hall bathlarah, lehkhabu pho rûnpui (book fest) a buatsaih a. He hunah hian sorkar sum leh hun tihek zawng leh minister/MLA te khuallian emaw, chhim tur emawin an sawm hran lo va, anmahni Mizo Writers Association chhungkuaa mi an hmang hmiah mai a, an entawn tlakin an fakawm ngawt a ni. Chuti chung chuan, he lehkhabu pho rûnpui hi kan minister-te leh mi pawimawh tak takin an rawn chhim tho va, special taka lo dawnsawn emaw a awm hran chuang lo va, an rawn civil luh ve ngâwk mai, an fakawm ka ti.
Lehkhabu pho rûnpuiah hian, lehkhabu thar hlak mi hrang hrang ziak 31 zet chu a rual tlanga tlangzarh (release) a ni bawk a, he programme pawh hi a hautak lo thei ang bera hun hman a ni leh pek a, tun hma anga khawi conference hall emawa, refreshment hautak zet leh mi pawimawh sawm bîk emaw, lehkhabu tlangzarh tura khawi emaw laia mi chal lang leh thiltithei sawm a awm hran lo, an senior adviser-in vawilehkhatah a tlangzarh tawp mai a ni.
Lehkhabu ziaktute leh publisher-te'n an lehkhabu an hralh thei tawh meuh lo emaw an tihte chu insit rilru tak chungin an pho chhuak a, mahse rin ang a lo ni hauh lo, mipui an rawn lût a, hun rei tak lehkhabu mu ngawt ngawt tawhte chu ram mipuite chuan an rawn kai tho leh ta ur ur mai. Ṭhalai leh nu leh pa, kum upa lam thlengin lehkhabu kan la hnualsuat lohzia an rawn tilang chiang ta hle mai a, a va lawmawm tehlul êm.
Mizo Writers Association leh lehkhabu pho rûnpui organising committee mawlh mai kha fak an va phû êm, lehkhabu pho chhuaktu, an member ni lem lote pawh dawhkan an rem felpui nawk nawk a, lehkhabu maimawm ril leh vaivutin a lo bawm lêk lûk tawhte chu an tihfaipui a, an rem felpui nawk nawk bawk a, intilal leh intihotu takin an kawk kual mai mai lo va, anmahni kha a takin an che chhuak tak meuh meuh a ni. Tin, lehkhabu ziaktu, an lehkhabu ṭhutpui hman lote chu M.W.A hruaitute hian a ṭhutpuitu tur M.W.A sum sengin an chhawrsak nia maw le! Hei lo liama inpêkna thuk hi a awm dawn em ni.
Ziak mi za leh sawmthum pahnih laiin an lehkhabu ziah an pho chhuak a, lehkhabu chi hrang hrang sanghnih leh za sawmnga pho chhuah niin, lehkhabu hralhnaa an sum hmuh zawng zawng belhkhawm chu Rs. 909350 man a tling hial bawk, lehkhabute hi a man pangngai aia tlawmin an zuar deuh vek bawk.
Lehkhabu pho rûnpuiah hian, lehkhabu hralh kal zual sawmthum (top 30) thlanchhuah a ni a, chu'ngte chu:
1. I ti thei–Pc. Lalremruati
2. Mizo ṭawng ziah dan–Mizo language committee
3. Pârmawi–John. Lalchhanchhuaha
4. Ṭawng un hrilhfiahna–James Dokhuma
5. Thla hleinga zân–James Dokhuma
6. Rilru far chhuak–James Dokhuma
7. Nuthlawi–Mai Sokhlei pâr
8. Pasalṭhate lu nghahna- Sangzuala Pachuau
9. Zoram politic lumlet dan–A.Thanglura
10. Hnam ropuite u, tho r'u le–Lalhruaitluanga Chawngte
11. Mizo ṭawng kalphung–James Dokhuma
12. Mizo thawnthu–PS. Dahrawka
13. J.F-a love letter–J.F. Laldailova
14. Khawhar In–James Dokhuma
15. Zozam pâr–Zikpuii Pa
16. Chicks magnet–Loretta Khawlhring
17. Ka ram leh kei–R. Vanlawma
18. Lungrualna tlang–Zikpuii Pa
19. Pherzawl titi–L. Keivom
20. Hmangaihna hrui khat vuanin–Mamawii Colney
21. Zoram khawvel–L. Keivom
22. Mi lu lak leh vai run chanchin–F. Lalremsiama
23. Rambuai literature–Dr. Lalawmpuia Vanchiau
24. Argentina football bu–K. Remruatfela
25. Hmangaihzuali–C. Laizawna
26. Ka tawnhriat–C. Laizawna
27. Engtin awm ta zel ang maw–C. Thuamluaia
28. Ch. Chhunga chanchin–James Dokhuma
29. Mathematical trick–Lalthlamuana
30. Indian union chhunga Zofate rin luh kan nih dan–K. Remruatfela ziah leh Anita–C. Laizawna ziahte an ni.
He lehkhabu pho rûnpui hi, ni 28. October. 2022 thleng neih tura ruahman kha a ni a, mahse mipuiiin an hlut êm avang leh mipui ngenna avangin, a tuk ni 29. (Inrinni) chawhnu dar 1 thleng pawh sei a ni a. Heti chung hian mipuiin an la kham lo hle a, lehkhabu hi kan lo la hlutzia an tilang a, kan la hlut dawn chauh ni pawhin a lang.
- MC.Lalthianghlima M.C.L Publications