2023 inthlan titi leng vel
Kum 2023 ah hian MLA kan lo inthlang leh ta dawn reng mai. Politics lam tui pui ve loten kan ngaihtuah loh lai hian politician te chuan mut mawh hnar mawhah neiin an tei kual sek tawh tih chu boruak aṭangin kan hmu thiam ṭan tawh a, Krismas hla kan sak zawh rual rual hian kan ram enkawl tuma min hmangaihtute an rawn inlar dawn a nih chu maw.
Congress hian kum 2008-a MNF paih thlaa sorkarna din an tum ang khan candidate hi an rim kual nasa a, Congress nge nge chu politics thiam leh thluak fing an nih avangin rim tur pawh an hre ṭha a ni.
He Congress hian officer bang hlim te, YMA hruaitute, sorkar lama service nei lai te, mi langsar mi hmingṭha ṭhalai te, lehkhathiam sang tak takte an rim kual an ti. Congress thar siam an tumna kawngah hian a hlui an paih ngam chuan come back thei lo an ni bik dawn em ni? A lehlamah Congress politician hlui mipui nin tawh an rawn dah lansarh chuan mipuiin an la ning leh lawi si ang.
ZPM lam hian candidate tur hi 30 vel chu nei fel tawhin a dang 10 vel an la rem fuh hleithei lo niin an sawi. Candidate ṭha tak tak an ni dawn tih a ni a, chutih laiin party lama zawhte upata upa ve tawh, 'Kan chance hnuhnung a ni' ti niawm taka candidate nih tuma party hruaitu zir buai sek chi an kawl nual niin an sawi ve bawk.
ZPM hian khawpuiah hian seat lak hukna chance an nei a, candidate an set fuh chuan Aizawl, Lunglei, Champhai leh Kolasib bakah Saitual, Khawzawl leh Hnahthial thlengin chance nei lo an ni lo an ti a, Siaha leh Lawngtlaiah chuan tlin an la harsat hmel khawp mai.
Hetih lai hian mipuiin Congress leh MNF an nin tawh avang hrim hrima sorkar tura an inngaih chuan an tifuh hauh lovang a, candidate ṭha an neih loh chuan party mi senior tihte hi mipui ngaihzawn loh chu an tla dawp thei a ni.
MNF hi tunah hi chuan tling nawn tur chiang an ni ta hauh bik lova, an vanduaina belhchhah turin Covid a lo leng ve bawk nen mipui hian an ngaizawng lo tih hi a chiang a ni.
SEDP hian hna a thawh vaih erawh chuan vote sang vak lova sorkarna siam khawpa tling thei an la ni. Khawpuiah ni lovin thingtlang lamah ṭang se, khawpui hi chu a sak hmel a, candidate an neih ṭhat a ngai dawn a ni.
- Vanlala