ISRAEL RAM CHU KUM 4 CHHUNGA VAWI 5 NAN AN INTHLANG LEH TA (Ex-PM Benjamin Netanyahu a rawn comeback thei dawn em?)

Vawiin, November 1 hian Israel ram chuan kum 4 chhung atan vawi 5-na turin inthlanpui a nei leh ta. Bible-in a lo sawi angin, "Ramin a bawhchhiat chuan hruaitute an inthlak zut ṭhin," (Thufingte 28:2) a lo tih angin Israel ram pawhin hruaitute an thlak ngunin, Prime Minister pawh an inthlak ve ta zut mai! Party hrang hrang awm mah se, chungho chu tum thuhmun tiin, hlawm khat (bloc) anga ṭangrualin, an parliament "Knesset" chu thunun an tum a, Conservative (hardline) Likud sangawizawnpui parties leh Liberal (Labor) ho, chawhmeh duh zawng inangte chu an ṭangrual a, nasa takin an inhrui pawh mek. Vawiina an inthlan turah Hardliners leh Liberals hote chu tu zawkin nge sorkar siam thei ang tih hriat a harsa rih hle a ni.

Batya Levinthal-a thlirna tarmit aṭangin, party tênaute i han bihho teh ang u (A rem leh party lianho pawh kan la sawi leh dawn nia, Isreal politics hi kan ngaihven tlang si a! –CT) .

(1) LABOR : Anni hi center-left political party an ni a, an pawm zau huau mai a, Mizoten "Thiangzau, pawl lo pawl" kan tih ang deuhte an ni. (tuna sorkar chelhtu PM Yair Lapid erawh Yesh Atid party niin, centist–leftwing party, Labor party rim nam hnai tak a ni thung, Likud party ni lova party lian 2na a ni). Yair Lapid hian nationalist PM Naftali Bennet chu kum 1 awrh hnuah a rawn thlak a, Bennet hi Netanyahu lamṭang ṭhin, eiruk thubuai vanga Netanyahu duhlotu a ni. Labor party hi "HaAvoda" tiin an koh mai ṭhin a, socially-democratic economy kalpui duhtute an ni a, Arabs/Palestinian hote nen pawh bekte zar khata tawmho mai duhtute an ni.

Neih inangte inneihna (same-sex marriage), gay hoten fa an lak theih nana midang chhûl hawhsak (surrogacy), ganja zuk khap loh, Sabbath nia mipui tana bus service-tir, buai reng ai chuan Palestinian hote independent peka ralthuam neihtir loh, Isreal ram chu Juda ram ni si, democracy ram anga awmtir zel an thlawp a, he party hi khawpuia cheng leh middle-class societies ten an thlawp tlangpui.

(2) MERETZ: Kum 1992 a Left-wing party 3 ten an din a ni a, Meretz chu Zionist tho niin, an inhawng zau lehzual a, tunlai khawvel hmasawnna leh ṭhangtharte mila inkaihhruai duh, social-democratic, sakhaw lal bik awm lo, human rights zah, sakhaw tinreng zalenna zahsak te, two-state solution te, West Bank-a Palestinian hote chenna hmuna Juda thil (assets) neih hrensak, green–environmentalism thlawptute an ni. Central Israel ramah an bûk a rit tlangpui.

(3) JEWISH HOME: An hotu Ayelet Shaked te chuan ex-PM Benjamin Netanyahu kaihhruai Likud party chu 1992 aṭangin an zawm ve tlangpui a, anniho hian Juda duh rumzual an tamin New Right party an ti a, Yamina party nen Jewish Home party an siam a, anni hian Jewish thil chu nasa zawka chawi lar vul chuk te, khawvel hmun danga Judaho, saphun leh phun lo lakluh chur chur te, Palestinian independent pek miah loh leh West Bank aṭanga Juda puantah tela chhuahtir miah loh te, firfiaka chetna reng reng nuai chimih vek leh economic liberalism an thlawp a, Juda ngen ngun taka awm zel duhtute an ni.

(4) YUSRAEL BEITUNU: Anni hi Europe ram aṭanga pemkhawm Judaten an bawh huk deuh va, an hotupa Avigdor Liberman chu Defense Minister te ni tawh, duh rum ul mai, Palestininian kawhmawh bawl deuhte chu beleuh ṭhawta tuk zal duh mai zel, sorkar tinghing ṭhintu, lal siamtu a ni, an ti mai ṭhin!

Benjamin Netanyahu nen hrui khat vuanin, tawh khirh tak leh ram hruai ruatin an awm ṭhin a, mahse, 2018 election ah Netanyahu pawl chhuahsanin, 1999 aṭangin secular si, right-wing takin an awm chho va. An party hming awmzia chu "Israel hi kan ram a ni" tihna a ni a, Netanyahu nena sam phiar zawma sorkar siam erawh a duh lo. Juda nationalism vawng burtu niin, Israel sipaite chu hmelmate inrin hmaa beih thut (preemtive strike) theihna dan nei tura Israel military dan kalpui duhtute an ni. An sorkar chuan Iran, Lebanon leh Syria hote chu "Awih ah si..." ti hman meuh lova khawn beleu thut duh mai chi an ni! Terrorist tawh phawt chu tihhlum zel duhtu, West Bank a Judate khawsak leh inbenbel zel duhtu, two-state solution duhlotu, liberal economy duhtu an ni a, Russia atanga Israelis pemlut, Russian ṭawng hmangtuten an thlawp hle.

(5) RA'AM : Israeli-Arab Mansour Abbas a din niin, Israel inthlanah kawngro an su phian zel. Abbas hi United Arab List an tih Juda thisen kai lo parties pawlah Gen. Secy te a ni a, kum 2019 ah chuan Israel inthlanpuiah an chuh a, Islamic Party anga ngaih niin, far-left policy an thlawp tlangpui.

Ra'am tih chu Joint List nen, Arab party 3 an infinkhawm a, mahse, 2021 kumah kehdarhin Israel rama Juda pa kaihhruai sorkar chu a vawi khat nan sawhchiar sorkar an zawm ve a, Juda origin te ram tiin Israel an pawmpui a, two-state solution pawmin, East Jerusalem chu Palestinian (West Bank & Gaza) khawpuia ngai tlata pawmtu an ni.

Palestinians jail tang zawng zawng chhuahtir leh, an duh anga an rama refugees kirtir a, Israeli-Arabs hnam tlem zawk pawmpuite leh Constitution anga Islamist or Israeli-Arabs ang pawm duhtute an ni. Ra'am party chuan Arabs hote chu right-wing sorkar pian loh nan, vote thlak uar turin an fuih a ni.

(6) HADAS-TA'AL: A dintu Ayman Odeh chuan 1988-ah daih politic a luhchilh a, far-left non-Zionist Arab party an ni. Odeh hian Joint List zawmin Gen. Secy ah te a lo awm tawh a, tunah Ta'al party chu center-left an ni. Ta'al chuan Palestinian state independent an pawm a, Hadash hian two-state solution a pawm thung.

He mite hian kum 1967 hma lam anga Palestinian ram awmtir duhin, West Bank aṭanga Juda pet chhuah vek duhtute an ni. Wirkers' right, environmental issue tuipui, social economy duhtu an ni. Hadash voters te chu Arab's secular duhtu, Israel hmar lama cheng leh Kristian hote an ni tlangpui. Far-left Jewish voters an hipin, an vote ṭeuh ṭhin, tih a ni.

TU NGE SORKARNA SIAM ANG?

Israel ram hian 2019 kum aṭangin vawi 5 inthlanpui an neihna tur a ni a, tun ṭumah pawh tu party-in nge sorkarna siam ang a, tu nge chak ang? tih hriat a harsa hle.

Mipui ngaihdan lakna (poll) hnuhnung berah ex-PM Netanyahu leh a right-wing thawhpuite pawhin sorkarna an siam pha lo deuh tura tarlan a ni a, Knesset seats 120-ah 61 hmuh a ngai a, Israeli-Arabs voters te an pawimawh hle dawn a ni.

Kum 2021 khan Israeli-Arabs hote hi PM Netanyahu lalthutthleng pheh suk theih nan, an ṭangkaiin an pawimawh hle a, tun ṭumah erawh vote an thlak ṭhat loh chuan Likud party hotu, hardliner Benjamin Netanyahu chu rawn comeback thei turah an ngai. Chutih rual care-taker PM Yair Lapid chu thla 4 awrh chauh PM ni mah se, Gaza leh West Bank-a Palestinian helho leh firfiak a phindarh danah a che pain, rum ve viau a. Netanyahu chu kum 12 a lo lal tawh a, Yair Lapid chu "second chance" pek ṭha ti an awm nual thung.

Kar kalta khan Nablus, West Bank a Palestinian hel pawl "Lion's Den" (Sakeibaknei Puk) intihel hotu Mahmoud al-Bana, Wadee al-Houh (31) te chu Israel sipaiten luhchilhin an kaphlum a, man an nei nual bawk. Lion's Den pawl hi West Bank aṭanga Israel beitute an ni.

Israeli-Arabs te chuan Judate ang bawkin vote rights an nei a, Israel rama cheng mihring 5% chengte an ni. US-based Council of Foreign Relations erawh chuan, "Israeli-Arabs te hian en hranna (discrimination) an tawk nasa hle a, an zingah Palestinian inti ngat tam tak an awm", a ti.

The Guardian (UK) chuan, kum 2018 khan Nation State dan angin Arabic ṭawng chu official state language aṭanga tihbo (demoted) a ni, a ti. Juda hnam hla "Hatukva" ah chuan tihian a bul a inṭan a : "Thinlungah i awm chhung chu, Juda thlarau chu a che vel reng a ni..." tiin, "Mit khap zawng zawngten Zion ram nuam melhin, an tinzawn a... Kan hnam zalenna chu kan ramah/Zion ram leh Jerusalem-ah," tiin a tawp a ni.

A ni, a ni tak asin!

Judate tan zawng hmakhawsanga an lal ropui Lal Davida khawpui din Jerusalem khawpui chu khawi hmun leh ramah pawh awm mah se, an theihnghilh thei mawlh lo va, an lungrilah, ṭanglaiah ṭhamin an rilfang thlengin a zut a! Babulon lui kama tuipuisuthlahah te ṭhuin, an kete chu tui vawt dam diaia chiah chungin an ṭingṭang, phaiphuleng leh lemlawite tumin, hlimawm takin varihaw ram ṭha hmu ianga zai vawrin, tlang kara luite tuithiang luang ri angin nui siauin, van karak zawngin nui vel chiam ṭhin mahse, a tawpah zawng,

"Aw Jerusalem, ka theihnghilh che chuan, ka kut dang lamin a thil thiam theuhnghilh ve rawh se. Ka hriat reng loh che chuan, ka lei hi ka dangah bet tlat rawh se. Ka hlimna ber aia Jerusalem ka duh zawk loh chuan..." (Sam 137) tiin, ngaiin an rum vawng zawng zel mai ṭhin a ni!

Isreal ram hian US President Donald Trump hmalakna zarah, an "Chatuan khawpui" nia an ngaih Jerusalem-ah US Embassy suan luh a lo ni tawh a, chumi hnuah "Abrahama Thuthlung" (Abraham Accords) tiin, a hmaa inhaw tṭhin Arab ram dang UAE, Bahrain, Morrocco leh Sudan te nen thuthlung an lo ziak fel tawh bawk a ni.

Naftali Bennet chuan, Dec 2021-a business conf.-ah, "Israel ram chu Judate tan a lo piang tawh a, engtin nge chutah chuan Arab society chu kan thlunzawm (integrate) tak ang?" tih chu zawhna awm a ni, a lo ti a, hei hi mi tam tak chuan "Palestinian Dream" phatsannaah ngaiin, kum 2022-ah chuan Abbas leh a party te chuan Israel sawhchiar sorkar chu an chhuahsan zui a, tin, West Bank leh Gaza a sorkarah pawh an tel zui ta lo a ni.

Tun ṭum inthlanah hian "Religious Zionism" inti ho, "neo-Kahanists" an tih mai bawk te chuan Netanyahu's Likud party chu sorkar an rawn siamtir thei awm mang e? tih a ni. Sorkarna an rawn lak theih chuan eiruk thubuai awrh mek Netanyahu's Corruption & Bribery Case/trial tihtawp thuai tura hma an lak rin a ni. He "neo-Kahanists" hruaitu Itamar Ben-Gvir chuan Prime Minister ni laite criminal investigation neih ṭhin tihtawp a duh a ni. Ben-Gvir hi a duh rum il el hle mai a, a lar chhovin a ṭawngkam tam tak chuan Israeli-Arabs hote a tithlabar hle ṭhin a, "Jerusalem khawpui chu chatuanin Judate khawpui a ni" ti bur mai mi a ni. Amah a la ṭhalaiin thisen lum ngah tak a la ni bawk a, amah hi US-in firfiak a tih Rabbi Meir Kahane zuitu niin, kum 1994-a Hebron hmuna Palestinian thah chiamna (massacre) ah mawhphurtu Baruch Goldstein a thlalak chu a room-ah a tar kuau ṭhin bawk.

Ben-Gvir hian Arab mi, Israel khualehtui nei, "ram leh hnam" tana rinawm lo chu hnawhchhuah (deport) hmiah mai duhmi a ni. Sunday khan Netanyahu leh Ben-Gvir pawlte inbiaknaah Ben-Gvir chuan, "Tu nge Public Security Minister ni ang?" tih zawhna a siam chu Netanyahu chuan, rang taka chhangin, "Sorkarna ka siam chauhvin Ben-Gvir chu minister a ni ang," tiin a sawi a, hei hi Donald Trump Jr., in US FBI hruaitu ka ni ang, tihna tluk velah an ngaihsak, The Guardian chuan a ti.

Ben-Gvir hi Juda ṭhalai lalin an atchilhin, an "Hero" hle mai a, a campaign laiin "Ben-Gvir, Ben-Gvir" tiin an bawr luih luih zel a, police te pawh an vir buai hle ṭhin a ni. Bazalel Smotrich leh Ben-Gvir te hian boruak an siam hle zel a, right-wing hoten sorkarna an siam theih chuan Senior Cabinet an chân ngei rin an ni.

Brig. Gen. Benny Gantz, Israeli Defense Minister chuan, Ben-Gvir te ṭhian dunte chu sorkar siamnaah an tel chuan, "Ram chhung meiin an tikang ang," a ti. Ben-Gvir hi kum 18 a nihin firfiaka chetna a lo neih tawh vangin 2007 kumah sipaiah ṭantir phal loh (disqualified) a lo ni tawh a, racism ti nasaah puh a ni.

Yaakov Katz, Jerusalem Post Editor chuan BBC hnenah, "Ben-Gvir leh Smotirich te chuan kan democracy kalphung tihdanglam an duh a, chu chuan hun thimah min hruai thei ang a, mawngkawhur leh chhetil (lesbian) an ngaihdan te, Arab hote nena kan inlaichinna te, hmeichhe en dan thlengin boruak dang a siam phah thei ang," a ti.

Ben-Gvir hi kum 2021 March thlaah MP a rawn ni ṭan a, amah thlawptute chu "Arab-ho thi rawh se" (death to Arabs) tih aiin "Terrorists hote thi rawh se" (Death to terrorists) tiin sawi a, au zawk tur a ni, a ti. BBC palai hnenah, "Arabs mi rinawm lo hnawhchhuah ka sawi lo. Ngaithla chiang teh, Arabs zawng zawng hnawhchhuah (expel) ka duh lo, Jihadists (sakhaw thila indona thianghlim tia firfiaka che ṭhin) te a ni ka sawi ni," tiin a hrilh.

PM hlui Ehud Barak chuan Netanyahu leh Ben-Gvir te ṭang dun chu, "Ṭanrualna thianghlim lo leh Israel ram tana hlauhawm" tiin a sawisel. Netanyahu pawhin Ehud Barak chu "PM ṭha lo tak" (worse) tiin a puh ve ṭhin bawk. Hmanni deuh lawka Netanyahu chanchin ziak (autobiography monsyrosity) "Bibi" tih phek 736 a chhah chu Barak hian dawt tam tak (full of lies) ziakna a tihsak ve bawk.

BBC news chuan, tun ṭum election-ah Netanyahu chu a lo comeback thei dawn em a chiang lo va, mahse, Juda duhrum pahnih "Jewish supremacists" Itamar Ben-Gvir leh Bezalel Smotrich te chuan Netanyahu rawn kirna kawng an sial thui hle niin a sawi. Hengho ṭangrualin sorkarna an rawn siam a nih chuan, khawvel ram danga an thawhpui ṭhian ṭha (allies) hote ngaihven a ni hle dawn a ni. Tun hnaiah Italy ram inthlanah far-right Conservative hoten hnehna an chang a ni. Brazil rama Sunday inthlanah erawh Socialist Lula de Silva, Brazil President hlui, eiruk thubuai siamsak vanga jail-a khung chuan votes 50.9% hmuin, far-right Conservative President term 1 chelh mektu Jair Bolsonaro chuan 49.1 vote hmuin a chak lo thung.

Israel rama poll hnuhnung berah right-wing Netanyahu's block ten seats 120 ah 60 hmu tura sawiin, Left-wing ten 58 hmu turin an sawi a, tun ṭumah Arab-led Hadash-Taal ṭangrual MPs 4 nei hian left-wing an thlawp duh lo a ni.

Kum 2021 election-ah votes 67.4% a tla a, Israeli-Arabs zingah erawh 44.6% chauhvin vote an thlak a ni.

Isreali Defense Minister Gantz chuan, Maj. Gen. Amir Baram (53) chu Isreali sipai hotu ber dawttu Dy. Chief of Military Staff turin a ruat thar a, Jan. 17 atangin Brig. Gen. Herzi Haveli hnen aṭangin charge a la ang. Brig. Haveli hi Chief of Staff-ah kaisangin Chief of Staff ni mek Lt. Gen. Aviv Kochavi a thlak ang. Dy Chief of Staff thar tur Baram chu Israel sipai Northern Command, 2019 aṭanga hotu niin, Parachute Brigade, 1988 ah a lo hruai tawh ṭhin a ni.

Hetianga Israel election neih laiin Xinhua news chuan, Palestinian Foreign Minister Riyad al-Malaki chuan niminah, Israel ram chuan a nuclear ralthuam neih tibo vekin, "nuclear ralthuam awm lohna" (nuclear-weapon-free zone) ah siam turin a phut, a ti. Hei hi UN Gen. Assembly First Comtt-ah Egypt ramin Isreal nuclear chungchanga thu thehluh a neih vang a ni a, he thu hi Jordan, Morocco, Bahrain leh Palestinian Authoritu ten an thlawp. Isreal hi Middle East rama nuclear bombs nei awmchhun ram niin 80-120 vel neiin an chhutsak. UN Gen. Assembly First Comtt chuan votes152-5 zetin, Isreal chu a nuclear ralthuam tibo turin an phut a ni.

UN Gen. Assembly First Comtt hi UN hnuaia Committee peng lian 6 zinga pakhat niin, khawvela nuclear ralthuam tihbona tura hmalakna a ni. Israel hian Non-Nuclear Proliferation (NPT) thuthlung a ziak ve lo va, tikhawtlai lova ziak ve thuai turin an phut a ni.

- CT LALRINAWMA