Langsar leh langsar lo politics

Politics-ah hian langsar leh langsar lo hi chak leh chak loh tehna atan kan hman avangin Congress khan an chhiat pui tawh a. Mizoram politics hi mahni phak tawk tawka awm hmun aṭanga ka lo thlir ve danah langsar leh langsar lo hian thuk takin a ti buai a, kan ruling party MNF hian tun boruak hi an chhiat phahna tur a ni thei tih hria se. Langsar tur leh langsar lo tur hi Party High Command-in an rel loh chuan buai an hmabak tlat a ni kan hotute hian. 

Congress hun lai khan Minister pakhat kha a langsar viau mai a, amah kha chu a fel ve hrim hrim bakah ṭhin siam a thiam a, party pawhin uanna atan an hman tur khan a hnathawh kha a puangzar thiam a. Kha kha Congress tana thil lawmawm ni tura pawn lam aṭanga kan lo thlir laiin Bhawan lamah chuan nasa takin khi a lo siam daih tawh a, CM duhsak bik a lo nih tel bawk avangin Congress party inlungrualna thlengin a nghawng chho ta rup a ni kan ti thei ang. 

Beiseina sang tak nen kan duh loh Zu do tura intiam leh cheng nuai 3 sem intiam chungin MNF party chu an lo lal leh ta a. A hma kum 10 lawka kan hnawl hnu kha chu nimahse hmel thar te nan an lo lang bawk a. Zu khap an tum bawk a, NLUP aia tam SEDP-ah cheng nuai 3 min pek an tum bawk a, mipuiin kan vote leh ta a ni. 

He party hian term khat pawh ro an la rel hma in a chhungah khi awm thei tur a rawn lang ta ṭuam ṭuam a, chu chu langsar leh langsar lo bawk hi a ni leh ta a ni. 

Ram leh hnam tlachhia tam tak hi pawn lam aṭanga nekna vang ni lovin chhungril inpum khat lohna vang a ni thei tih history in min hrilh tawh a. MNF chhung khi tur pawh hi an hnawh khah thuai loh chuan a khi hi a zau tial tial ang a, a la phel phawt lo ang tih a sawi theih tawh loh. 

MNF Senior Minister leh vangvat kai MLA te pawh an hming kan hmuh ngai loh lai in langsar bik leh lansarh khel an lo piang ta a, chu chuan Congress hun lai ang chiah khan Chief Minister duhsakna a dawng ve leh chiah bawk a, Hnam Run lam an inrawlh loh chuan Congress hnung zuina tur a ni ve thei tlat a ni. 

Chief Minister hi langsar se, a bak hi chuan lar khelh te, media play te hi chu tih ve vak loh a ṭhatna chu CM vanga hri laka him anga insawi palh te pawh kha a ṭhat lohzia kan hmu tawh a. Education lama hna lak dikzia an sawi tuk lawkah RTI hmangin "Ipte pui ban na" politics a lo lang leh ta a, CM ni lo an chet tam chuan a buai zel a, tuna mi hi chuan Hnam Run hi a tibuai chho ve thei. 

ZPM lam lawmah lo tla tehreng pawh ni se ZPM chhung pawh hi a khi lo bik em ni? tih zawhna hi chhan harsa a ni.