Bawlhhlawh thliar thei lo chhiah tisang tiin an thang palh ang aw?

Aizawl Municipal Corporation din hnu hian AMC vanga hmasawnna eng zât nge kan hmuh tawh? AMC din hnu hian Aizawl mipuiin chhiah kan chawi ngai loh engzât chiah nge kan chawi belh tawh? AMC hian bawlhhlawh hi a paihna hmunah hian ṭawih thei leh ṭawih thei lo hi an thliar tak tak chiah em?

Municipal Corporation awm hnua mipui chhiah pek punna hi a säng a, property tax ringawt pawh hi a säng hle a ni. Aizawlah chuan in sak hmaa chawi tur a tam a, architect leh engineer rawih a ngai a, tunah phei chuan lei laih dâwn pawhin pawisa chawi zel a ngai tawh a ni.

AMC Site Deve­lopment & Slope Modification (SD&SM) Regula­tions, 2017 tih hmangin mipui an khuah­khirh a, an khuah­khirh ka tih chhan chu Geologist rawih man mipuiin an chawi tawh chuan lei laih hi an phalsak deuh zel avangin pawisa chawi belhna a ang a ni. AMC pian hnuah Aizawl mipuiin sum an chawi belh nasa a, chumi hu chu mipui hian an hmù lêt em le?

AMC hnathawh langsar chu bawlh­hlawh paih a ni a, bawlhhlawh paih man pawh tun hnai­ah an tisang em ni kha? Bawlhhlawh paih tur hi ṭawih thei leh ṭawih thei lo thliar tura min nawr nasat laiin a hmuna zuk kal ZPM MLA te khan bawlhhlawh an paih pawlh mai mai kha an zuk finfiah leh ta si a. AMC hian bawlhhlawh tal hi chu lo chingfel thei se a ṭha lo maw?

Term hmasa leh a hmasa leh aṭang tawh khan kan Councillor te hi India ram khawpui bakah foreign thleng thlengin an zin a. Kan bawlhhlawh sawngbawl danah hmasawnna a awm em em si lova, mipui pawisa khawh ralna a ni thei zawk lo maw? Hetiang te te hi mipui hian an chhut ve avangin AMC hi a ṭan hret a ngai.

Tuirial lama a paih khawmnaah hian bawlhhlawh hi ṭha takin an lo thliar tawh a nih phei chuan mipui hriatah video nen rawn ti lang se a ṭha ang.

Parking fee pawh hi Aizawl mipuiin kan chawi tam a, parking fee pawisa hi AMC lamah a lut a. AMC sum bawmah hian mipui hian kan chhung lut hnem a, mipui hnenah ṭha takin pe chhuak se a ṭha.

Property tax hmanga ambulance lei sup sup kha a ṭhat rual rualin a dangah party mi duh­sakna hna pek a tam si, Councillor eizawnna dang nei lote an chawlh rualin an hausa deuh sawt tihte kan hmù bawk nen. AMC hrim hrim hi kan khei ni lovin Municipal Corporation chak leh changkang zawk hi Aizawl mipui pawisa thawhtute hian an phu a ni.

Engpawhnise bawlhhlawh paih chinah tal hi chuan lo ṭang lehzual se, hei lo hi "Ka Pianna Zawlkhawpui" tia auh tur kan nih loh avang hian AMC hi ṭang sauh sauh rawh se.

- Lalthanmawia