Smuggler leh eirute incheina!!!

Mizoramah hian dan lova pawisa lalut mihausa thut hi an tam ve ta hle a ni.

Tun hma aṭanga hausa ni lo, an hnathawh pangngai kan hriatpui chin aṭanga hausak theihna em em nei si lo, kum li kum nga chhung vela mi hausa em em lo ni tate hi an khawsak dan leh an incheina aṭang hian a hriat theih ve tlat, in lo chik ve em?

Ṭhi an awrh chuan ṭhi naran mai mai an duh lo va, a lian leh hrawl em em hi an awrh tih in hmu ve ṭhin ang. Ṭhi man to uchuak hi an mamawh bik a, a mawi vang leh inhmeh vang pawh ni lovin an ṭhi aṭangin pawisa an ngah tih lan tir a ngai a ni. Zungbun pawh chuti tho chu. Zungbun lawk ber bur, tle lian fahran mai leh bawk liau luau hi an bun ṭhin. A zungbun en ringawt pawh a, 'Chhei le, hei chu mi hausa tak a nih hi,' an tih theih tur an bun tlangpui. Chutiang bawkin sana pawh to uchuak, Mizorama hmuh phak zen zen loh bun kher hi an mamawh tlat a ni.

Pheikhawk te hi a lawk chi hi a awm a, lawk uchuak fahran hi heng smuggler, eiru leh an fate hi chuan an bun deuh kher zel a, sneaker ni se a mawi vang ni lova a man a to vanga lei an ching a, he thu i chhiar pawh hian i mitthla kual zur zur thei a, an pheikhawk aṭang hian an hausakna hi lan tir a ṭul a ni ngei ang.Thawmhnaw tle chi an inbel lahin an tle fal em em bawk a, smugger an nih hi thup tum mahse hetiang mai mai aṭang hian an hriat leh tlat zel a, vawi leh khata hausa hi chu an hriat hran nalh a ni.

Pi leh pute aṭanga hausa ṭhang tawh chin hi chuan hausak pawh hi an thiam a, an uchuak vak lova, officer eiru nasa leh an fate, khehpuam hausa kan tihte leh kuhva phurh ruk avanga hausa leh chiahpuam product ang chin hi chu an che lian a, ram pawna an zin pawhin hotel naran aia ṭha bik hi an thlang chat chat a, hausa anga lan an mamawh a ni.

Pawisa mamawh vanga sumdawng ni lo, pawisa tam uchuak neih thut avanga sumdawnna anga lantir tur mamawh an nih lêt tawh avang hian an eizawnna nia an thlante pawh hi han en ula thil langsar bung bung chi hi an zuar deuh zel a, hetiang mite hi chu an ṭhenawmte hian an hre chiang a, chu bakah mi pangngai chin chuan pawisa che vel en hian an ngaisang thei chuang lo.

- Lana Leo