Dikna leh fel taka tih duh mite 'mi firfiak' titu Kristian kan ni!

Kan hmaah dar­thlalang hungin kan hlimthla dik tak ka'n tarlang ṭhin a. Nimahsela, mahni nihna hmu duh hauh lo kan kàt nuk lai tak hi a ni Kelkang harhna pawhin a sut chim zawh hauh loh chu.

Kawng an siamna lung, lung me ang maia no chuan rei min daih dawn loh avangin ka sawisel a. Pa pakhat, thil inti hre ve fu, hriat ziktluak erawh nei lo chuan, "I negative-in i firfiak lutuk!" tiin min zilh a. Firfiak leh kherkhiap awmzia pawh hre lo chu ka hnial thui duh ta lem lo a ni.

Sawrkar hnathawk a hun taka pisa kai ṭhin a, a hun taka bang ṭhinte mi ti kher kher, mi duhtui, mi kherkhiap tia chhuah daih ṭhin kan ni. Dân ang taka hnathawk ṭhin Pu Chhuanate ang chu, ‘mi khirh, mi duhtui’ tia chhuah daih zel ṭhin kan ni.

Kohhran inkaih­hruaina anga kohhran kalpui tum tlat Upa chu, "Upa tunlai lo, upa zim, upa inhawng lo" tia chhuah ṭhin Kristian kan ni. MLA fund, a bial chhûng baka hman phal lo, pawl ṭanpui nâna a fund pechhuak phal lo, "MLA nikhua lo, MLA induh, MLA sual" nihna pe daih duh ram kan ni.

Office thuneitu ber, office hun chhûnga mitthi ral phal lo, mimal thil ti tura office chhuahsan phal lo, dept thil mimal tâna hman remti lotu chu, "Hotu sual, hotu kherkhiap, hotu ninawm, hotu intithu" kan ti.

Dik tak leh fel taka tihduh mi chu kan hua a, dân hrula thil ti mai thei mite erawh mi fel leh ṭha tiin kan fak thung ṭhin. Mipuite zawk hian thuneitute hi dik lohna leh fel lohna hmunah kan hruai lut zawk ṭhin. Roreltute kan sawisel luai luai lai hian keimahni nihna kan hmu thiam si lo.

Lal Isua kha a hring a hranin Zoramah hian thuneitu rawn ni se, mi sual, mi fekfawn, mi kherkhiap, mi induh tiin mi tam tak chuan kan chhuah ngei ngei ang. Thufingte-in, "Inthawina aiin dik tak leh fel taka rorêl chu LALPA tân a pawmawm zawk" titu a ni tlat. Inkhawm tam tih lam a ni lo, dik tak leh fel taka nuna inkhawm a ni chauh zawk!

Kan ramah harhna a lo thleng ṭhin a, mi ramah pawh a thleng ve tawh ṭhin. Harhnain min tawh dan erawh a inang lo lai si hi ngaih­tuah a ngai a ni. Welsh, London etc rama harhna an tih chuan sual an tih ṭhin leh nundan dik lo an simna kha a ni. Chuvanga mi sual man tur an awm loh a, jail hial a ruaka a awm theih ni.

Kan rama harhna ve thungah chuan kan lam vak vak a, kan ṭawngṭai mawlh mawlh a. Kan ṭap a, chirhah kan inngaihtlawm siak chiam a. Inah kan haw hnuah mipui nunphung erawh a pangngai reng a la ni si. Kan chapona te, dik leh fel lo deuh hleka thil tih te, eiruk leh thil dang dang kan nuna an la bet tlat mai hian Kelkang harhna hi a timualpho takzet zet a ni.

- Lalremliana Pachuau