A 'KHAWBUNG' LEH TA

Kan Chief Minister 'zahawm tak' (?) a ṭawngvai leh ta kan ti dawn nge, khawbung a ti leh ta deuh deuh kan ti dawn nge, a dawt sawi 100 (za) chuang hi duh tawk lovin nakkum inthlana a tlin leh theihna ‘chance’ awm chhun ni-a ngaiin tun kum khat vel chhunga dawt 100 dang sawi belh hram a tum ni ang? Sawifiah ngaihna pawh a awm ta lo ve.

1. "Thlai thar hralhna ngaihtuah tur, marketing board emaw society sorkarin din se tih rilruah a awm lian." A rilru-ah hetiang thu hi a rawn awm thar thut em ni? Kum 10 chuang a CM chhung khan hetiang ngaihtuah nachang hi a lo hre ngai lo vem ni? Nge Minister ni pha lo tihlungawina ni ngeia ngaih MLA 14 te tana 'Board' a siam zulzuia tu emaw tihlungawi nan ‘Board’ pakhat din belh a ngai leh ta zawk em ni?

2. "Pathianin kan rama malsawmna min pekte hmang thiam turin kan thluak kan hmang ang." Kan thluak hi Dawtsawi nan leh Restricted Tender tih nan kan hmang rim ta em a; thildang ngaihtuah nan i hmang ve tawh ang u, a tihna em ni ang?

3. "Processing leh marketing tih fuh chuan 4th grade leh MR inchuh luih luih lovin, a aia hlawkah kan kal thei vek dawn." Mau lamah khan IAS te kha a senghawi zo tawh a, he lamah hian 4th grade leh MR te i senghawi ve tawh ang u, a tihna em ni ang?

4. "America-ah chuan sorkar hnathawk ni lovin, loneitute an chapo; chutiang chu keini pawhin kan hlat bik lo." Loneitute chu chapo tura tihchangkan a tum tihna em ni? Inngaitlawma chapona duh lotu Lal Isua hming chu a lam zen zen tawh dawn lo a tihna em ni ang? Switzerland(of the East) aiah America (of the East) lam a hawi ta em ni?

5. “Nakinah chuan kan ram hausakzia hi kan va hre tlai deuh ve kan la ti ang.” Kum 20 zet, 'ram tana' ramhnuaia a vahvaih hun te leh hetiang hre thei tura kum 20 dawnlai sawrkara a fawng vuantu zinga mi a nih tawh si hi chuan, nakinah chuan ti lovin, tunah pawh kan va hre tlai deuh ve, ti tur a ni zawk lo’m ni?

Hetianga thu belhchian dawl lo pui pui a chhakchhuak fo hian Chief Minister nihna te, Mizoram leh Mizo hnamte leh amah ber pawh a tizahawm lo kan ti a. A ‘official adviser’ ni lote pawhin zahthlak kan tih avangin, ‘thurawn’ vawi tam tak kan pe tawh a. Engtikah nge hetiang tih hi a sim dawn le?

Nge, Mizo mipuite hi hetianga bawl tlak lekah min ngai a, hetianga bawl loh chuan Chief Minister a nih theih lohva, a ni zui thei dawn bawk lo. Chief Minister nih zel hi ka la duh si a, ka tihdan pangngai hian ka ti zel dawn, a tihna em ni ang?

Chu chu a ngaihdan a nih chuan, a ngaihdan chu a thlak dawn si lo va; mipuite zawk hian kan ngaihdan kan thlak a, hetianga bawl mai mai hi duh tawh lova, kan 'zim tawt' a hun tawh zawk?

Kan ram leh hnam tan, ngun takin i inngaihtuah ang u.

CHIEF MINISTER SAWI TLANGPUI
1) Thlai thar hralhna ngaihtuah tur marketing board emaw society sorkarin din se tih rilruah a awm lian.
2) Pathianin kan rama malsawmna min pekte hmang thiam turin kan thluak kan hmang ang.
3) Processing leh market tih fuh chuan 4th grade leh MR inchuh luih luih loin, a aia hlâwkah kan kal thei vek dawn.
4) America-ah chuan sorkar hnathawk ni loin, loneitute an chapo; chutiang chu keini pawhin kan hlat bik lo.
5) Nakinah chuan kan ram hausakzia hi kan va hre tlai deuhve kan la ti ang.

- M Lalmanzuala