No Chanve!
Tlai lam dár nga a pel det a. Khawpui lùn laia infiamna hmun aṭang chuan ṭhian dùn - Andy leh Lenny-a te chu inkhêl zo hlim hlawt tih hriat tak hian an rawn chhuak thlan hluam a. Tui vawt leh cold drinks vawt zawrhna dàwr lam an pan ding nghâl.
An pahnih chuan litre chanve tui bottle chu an tlâk thuai mai. An chhãwl chu a la hãl hle a ni chék ang chu, no-a energy drinks thli tùrin dàwrkai chu an ti zui a. Ding chunga tìtì pahin dàwr kawtah chuan an khiat dùn leh a.
Chutia thil an in lai chuan zu rui pakhat, kal hlei thei lo hian anni ṭhian dùn chu a rawn su thut mai. No-a an thil in lai chu a rawn sut buaksak titih! Chu zu ruipa chu a ṭhianten an kai hrang nghal thuai a; mahse, energy drinks chhuata bua chu ruh chi ziazáng a ni si lo! Andy thin chu a ter at a. Mahse, Lenny-a erawh a ngawi ngal thung.
‘Eng ngati nge i ngawih reng a!? Hei, kan no chanve lai min tih buaksak hi i hmu ve lo em ni?’ tiin a Lenny-a chu lungawi lo Andy-a chuan a ti hrep a. Lenny-a chuan muangchángin, ‘Ka hmu ve tho a lãwm. Min tihbuaksak vek loa a làwmawm ngawt a nia; no chanve vêl in tùr kan la nei tho a lãwm,’ a ti ta êt mai a!
Hmãnlai hian zirna in sáng taka rilru lam zirtirtu sáng (psychological professor) hian zirlaite a zirtír zawh rual chuan an zirlaibu khup tùrin a hrilh a. Zirtírna dawhkànah chuan no a rawn chhawp chhuak thut mai! A chhúngah chuan no chanve vêl àwm tùr tui a thli zui a.
Zirlaite chuan a ngai tê bawka, ‘He no-a tui awm zât hi no chanve-a khat nge a niha no chanve-a khat lo?’ tia zawhna a zawh leh an ring sup hlawm. Mahse, tûn ṭum chu an ring sual chhiava chiang hle!
‘Ka kuta ka ken lai no-ah hian tui a awm a; no hi engtia rit nge a niha in rin hlawm le?’ tiin an zirtirtupa chuan a zâwt ta thut mai!
Zirlaite chuan an inrinsiak nak nak hlawm. A chhànna dik tak niàwm rêng an hre fuh thei si lo - ‘risk’ ngawt loh chuan!
Zirtirtupa chuan heti hian a sawi ta a: ‘A rih záwng chu he noa tui awm zât leh a rihna lam a ni lo e,’ tiin.
A sawi zawm zêl a: ‘He noa tui awm, ken thuta zãng tak rih záwng hi a kengtu azira chhût ngai a ni. A kengtu ken rei leh rei loh lamin he no rih záwng hi a hril zâwk ang. Minute khat chhúng lek ka ken chuan a zãng hle ang; mahse, darkár khat ka ken chuan a rit viau tawh ang,’ a ti ta mai a!
No chanve thlírtute chuan ngaih dàn chi hnih an nei fo - a kiam lam thlírtu leh a la awm zât thlírtu. Keini ve hi le? Kan beisei ang, kan hisâp lâwk anga thil a kal loh hian ‘A chanve a bo hmak!’ tia indawm kun mai chíng mi nge kan ni nge, ‘E khai! A chanve dang ka la nei tho e!’ tia kan thil chàn lam aia kan la chan awmchhun lungawipui thiam mi kan ni zâwk?
Lungawina leh hlimnate hi, beih chiama neih chi a nih ngawt loh cháng a awm ve fo. Kan ban phâka inchhawp reng aṭanga dawn theih thil a nih chàng pawh a awm ve ṭhin. Tam tak hi chu kan rilru hrisèl dàn azira ni tina kan neih theih a ni ve a nia! Chu chu kan hai fo a; sum leh pai, building chhàwng sáng, phone chhuak thar, lirthei changkãngahte leh thil dang dangah lungawina hi kan zawng ṭhin. Lungawina awmna chu kan rilru, khawvêl kan thlìr dànah a awm zâwk ṭhin a ni si a.
Professor leh zirlaite ‘case’ pawh khi … no chanve thu-hla tho a ni. Rilru hrehawm leh beidawng dáwna kan inhriatna chhan ni bera ka hriat chu - min tinatu kan hriat reng ṭhin vàng hi a ni!
Kan ṭahna leh kan natnate hi chhût chiang ta ila - kan nat ṭan lai aia a tûka kan nat fé zâwkna chhante hi… A chhànna mãwl tak chu - kan hriat renga kan vulh len ṭhin vàng a ni.
Sâwtna tùr leh ziaawm-puina tùra rilru kan sèn thu ka sawi lo e; mite min sawi dàn … lei ka batnaten ka bat zât min ṭhìn dàn ‘type’ … ka bialpa ex-ina min tihel vêl dàn … tih te leh chhan tam tak vàngin kan lungngai fo. Mahse, kan ṭahna hi keimahni vêk hian kan vulh lian ṭhin a, ṭah zui châkawm khawp hian mahni leh mahni hi kan infuih ṭap fo mai a. A chunga Professor kan sawi ang khian, zan khua leh a tûk niléng thleng thlengin no kan keng ṭhin a - a tìra zãng tak kha, ken reng tâkah chuan a tûkah a lo rit tawh êm mai ṭhin a lo ni!
Pangngai reng chu no a ni; pangngai lo erawh chu, no kengtu keimahni hi! Bán a kham hmaa thil ritsak tùr chu dah mai thiam kan zir a va’n ngai tak êm!
– Zirsangkima