Kristiante leh Zu

Kan thu sawiho tur hi issue lian tak a ni. VDP-te kan tia, zu an check a, an man a, an in te an kalh sak a, khawtlangin kan sawi sup sup ṭhin. Sawrkarin an khap bur bawk a, zu chu a vangin a to thei hle, mahse, a in duh te chuan an in reng thei tho.

Kohhrante pawhin hma an la a, veng ṭhenkhatah phei chuan a zuarte thawhlawm pawh an dawng duh lo hial a ni. Kum alo vei a sawrkar chuan zu an zuar ve leh ta. Kohhranin a duh loh thu a puang chamchi a, mahse, ngaihthlak a ni ta lem lo. A duh pawl leh duh lo pawlten an sawi luih luih mai.

Khawvel history-ah hian zu hi a lanna a rei tawh. Thuthlung Hlui hun lai, BC eng emaw zah kal tawhah pawh khan a lo awm daih tawh. Keini Mizote pawh hian kan hmel hriatna a rei hmel tawh hle. Mizote saphoin min awp hma, kan pi pute hunlai pawh khan, zu chi hrang hrang kan lo nei ve tawh a ni.

Kan chheh vel- Manipur, Tripura etc. te pawh hian anmahni tualṭo zu chi hrang hrang an nei a. Tun hnu hian keimahni tualṭo zu, kan pi pute hunlaia mi ang kha chu kan nei tawh lo thung a ni. Zu ṭha lo tak tak kan nei a, sap zu, beer etc kan nei a. Mynmar leh Cachar aṭang te hian zu kan la lut a, to tak takin an zuar chhawng leh ṭhin. Tunah zu khap a ni a, mahse, duh tan chuan hmuh tur a awm reng tho.

Zu hi heti tak hian kan do a, kan duh lo a, mahse i mi rin zawng deuh khan chhuahvah nikhua, picnic-na emaw ah chuan a in ru zuk duh tlat.

Tunhma deuh khan vaiho hian an ti e, an ti ṭhin- Mizoram chu Pathian lokal dawn ti reng a, mahse, Kolkatta kan thleng a lokal leh dawn si lo, an ti.

Pathian thu lo hrilh ṭhintute zu nena an chetla kha an lo hmu leh si ṭhin ni ngei tur a ni!

Mizote kan hnam ala naupang a, kristianna lamah pawh hian nghawng a nei ve zel emaw ni a tih theih. Koh­hran, khawtlang leh inchhungkhurah hian kan inzirtir ngun tawk lo a ni thei em? Mizo zia hrim hrimah hian intih pa nan, relax nan, ṭhian kawm nan, rualpawl nan te kan hmang a. Sual vang hrim hrim a in kan awm bawk ang.

Zu ṭhat lohzia sawi chhun zawm leh ila. Zu hian kan taksa a tichhia a, natna pawh a thlen thei a ni. Nupa ti ṭhentu a ni thei a, tlakranna thlentu a ni a, insual bung bungna leh thihna hial a thlen thei. Chapona hi Pathianin a duh lo hle a, zu chu chapo taka min siam theitu a ni.

Motor accident tam tak pawh hi driver zu ruih vang a ni duh hle. A ṭhat lohna dang tam tak a la awm, Kristiante tan chuan in loh tawp a ṭha ber.

- Lalchhandama Colney