KRISMAS CHU, I DAWH NAWN DAWN EM?

November thla kan chuang kai leh ta reng mai, rilru ngaihtuahna lam pawhin Krismas lam a hawi chho ṭan deuh ta. Kohhran hrang hrang pawhin Krismas lawm dan tur kan insingsa in committee te kan ṭhu chho malh malh hlawmin a rinawm.

Kum hnih chhung tehmeuh ruai ṭheh thei lovin kan awm tawh bawk a, Pathian zarah kumin chu Krismas leh kumthar pawh ruai nen kan lawm theih ngei beisei ila. Krismas leh kumthar kan lawm dan, a bikin ruai kan buatsaih dan en hian insiamrem ve deuh kan ngai em aw tur niin ka hria.

Tun dinhmuna (2019 hma lam) kan Krismas leh kumthar lawm dan en hian ruai kan inbuatsaih pui siak ta mai emaw tih tur a ni. A kohhran hausa deuh aṭanga a harsa deuh thleng pawhin theihtawka ruai ropui tak siam vek kan tum niin a lang. Ruai menu nise kan tlar dul a, a siam tam lamah lah kan ei sen loh a tam, kan ei ngai loh a tui siam vek kan tum ni hian a lang. Midang kan va el in kan va thik pawh a ni lova, keimah ni hian kan phak tawka a ropui leh hnianghnar thei ang bera lawm hi kan tum em em vek ni hian a lang.

Sa nise chi hrang hrang kan siam a, a siam dan chi khat chauh ni lo deuh te in ka siam bawk a. Sa ei thei lo tan a tui thei ang berin vegetarian counter kan ti ve zel ta bawk a. Sum pawh kan seng nasa a, tha pawh sen nasat a ngai hle reng a ni. Kan hun pui a ni a, kumtluana kan lo nghahfak ve a nia pui tak ruai buatsaih pawh hi a phu viau mai.

Amaherawchu, krismas leh kumthar ruai kan ṭheh hian kohhran a mipui awm zat aṭang emaw a ṭheh tura kan beisei aṭangin emaw ruai kil zat hi kan beisei angin kan ṭheh pha lo vek ṭhin niin a lang a, a bang nawi hi a tam em em fo mai.

Ruai hnianghar taka kan ei vek hnu hian kan ei bang kan paih hi a tam ṭhin hle mai a, a zia lovin a uihawm viau a ni. A lehlamah chuan fatu hah ten sa bang nawi an hawn thei a ṭha viau kan ti ni thei e. Fatute hian tumah in sa bangnawi beiseiin an rawn fatu ka ring lova, chutiang siam kep chi pawh a niin a lang lo. Mipui ei tur tawk aia tam kan siam vak vak hi ṭul loa sum sen ralna a ni.

Kum hei leh chen ruai kan buatsaih dan en hian kan tih hautak ta lutuk a, items/ menu a tamin a bang nawi a tam ta lutuk a, kan inenfiah deuh chu a ngai ta viau in a lang. Kohhranin kan ruaiṭheh dan ennawm a, fel fai zawk a ro kan rel a hun ta em aw ka ti. Sa kg khat ei theih zat mipui kan tih pun a hun ta viau, sa rawp laia ei ang khan chhut chi a ni tawh lova, tin sa chi hnih chi thum kan siam chuan a vaia kg zat aṭangin chhut a ngai tawh ang. Tin, a ruai ṭhehtu zat pawh kum hmasa lama kan theh dan enin kohhran member aṭangin kumin a kal tur beisei zat dik zawkin a chhut theih vek a, chu mi ei ral tur tawk hi kan siam mai hi a hun ta. Fatute chuan a bang a awm lo chuan an hawn lo mai ang; sa bangnawi beiseiin an fatu ka ring lem lo.

Krismas leh kumthar menu te hi thlak thleng ve ṭhin ta ila. Krismas a kan items lo ang deuh kha kumthar ah te siam ila, a vai vaia siam nghal vek kher hi a ṭulin a lang lem lo. Kristiante hun pui a ni a, duhthala chaw leh sa han ei te chu a chakawm e. Mahse, krismas leh kumthar a menu ngai vek, a chikim veka siam lo hian thlak ila kan ei tui zawk mai lo’ng maw? Krismas leh kumthar a kan item zawng zawng hi kan ei kim vek seng dawn emaw tih tur a tlar vak lo hian, a tui leh hrisel tha chhawp lamah te hian in el ta zawk ila.

Bai thak leh chutney ṭhenkhat zawng zawng hi chu in lamah pawh kan ei chak vak lo te a ni thei a, zawngṭah bawl nen lama tih kim ve hrim hrim aiin a tui leh hrisel lam hi uar zawk ila. Kan items tam tak hi chu kan ei ngam loh, kan mamawh lem loh te a ni. A ruai tih puina niawm taka siam vak hi a hun ta lem lo.

Mi tam tak chuan vegetarian ho siam te hi a tui kan ti zawk ta emaw tih turin kan thiam thil show nan kan hmang emaw tih tur a ni a. Sa ei ho ei anga kan hmui leh items chi hrang nen kan ti duah a, a ṭhen te chu sa ei thei lo pawh ni lo, sa ei peih lo mai mai te pawh kan ni hlawm awm e. A vegetarian counter zawk hi a tuiin an hmui zawk mah thei hial awm e. Heng te pawh hi sum sen a tam a, a hautak lo zawnga kan tih thiam deuh deuh a pawimawh.

Mizo tih danah chuan tualmei khuk a ruai pui han siam ngei hi a nuam kan tiin ropui bik riau hian kan hria a, kan hnawl ngawt thei lo. In lam emaw hotel changkang tak aiin krismas ruai chu tui lo zawk mahse kan ngaihlut a, kan ngawihpawimawh a ṭul awm e. Chutih rual erawh chuan ruai hlutna leh ropuina hi a items tam aiin a eitu in tui tihnaah te, siam tam aiin kan ei chin kha tui kan ti em tih hi pawimawh zawk. A hautakna leh a bang tam lam hi a ruai ropuina ber a ni lo e.

- Engkima Chawngthu