KAN HMANGAIH ZORAM HI

Ka piin sawrkar a hrilhfiah dan chu, Thanga sawrkar duh loh zawng leh bank rawkna an tih angah te hian i lo tel ve riau riau ang e, a pawisawi zawnga chet hi tum loh tur. Tih tur leh tih loh tur a tihte zawm duh loh chu Pathian pawisawina a ni, a tih hi a lo dik hle a ni. Mi pamhamte vangin a hming hi sel ṭhin mah ila, mi rinawm leh dik mi tlemte avangin Pathian hi sawrkar lamah a ṭang tlat zel, a la ṭang zel bawk ang.

Pathianin a hnam thlan Israel te chu khawizu leh hnute tui luanna ram, boruak thiang nuam leh ṭhalai pawh ṭhat duhna Kanaan ram tiam mah se. Chumi ram thleng tura an kalkawnga Pathian chet dan chu kan hre ṭheuh ang. A thu awi duh lo chu an chhuante thlengin an thi fai parh a ni.

Zoramah a hun laia duh duh lei thei tunah erawh a la dam chhun te pawh sawi tlak awm lo nung ve mai mai an tam tual tual. Tuna Israel ram khu tun hma chuan Pathian an hawisan ṭhin avangin khi ram nei leh tura thisen an sen hnemzia leh hmuh sit leh nek sawra an tawrh tamzia chu... Pathianin thu a lo tiam tawh avang chauh a ni; chuti ni lo sela history-ah bak kan hmu tawh lo anga, Sodom leh Gomora iangin an ral tawh ang.

I duh thlan a ni miau a, a mawh pawh i phur ngam tur a ni. Ruihhlo ti ṭhinte pawh hian hei hi ka tih chuan ka thi hma dawn tih an hria a, mahse an sim duh lo, an duhthlan a ni.

Sawrkar sum sawkhek a hlawh phu lova in leh lo meterial leh account a pawisa kan neihte thleng hian kan duhthlanna a ni a, a mawh chu i phur ngam avanga zah pawh dawn lova Zoram hmasawnna tur leh a ṭhen mirethei zawk pawisa tur i lak sak hmak hmak ngam tlat a ni.

Bible-in chhuan 4 a tih pawh thleng hman lo, kum 10+ tlem chauha dikna haichhuah, eirute chhuichhuah hi sawi tur an tam. Hemi hre reng chunga mirethei zawkte chantur ai eiruk zawngin, (Zorin Oct, 27 chhuaka kan Zoramin eiruk thubuai a ngahzia kha case 20 an tling) hei hi theihnghilh suh, i chhuante ni lovin, i dam lai ngeiin i ruk ruk man chu i tel ngei ang.

Pathian hi hman ata vawiin ni thlengin miretheite lamah a la ṭang zar zar tih leh sual man chu thihna a ni tih hi a la pangngai reng. Ni 4 a liam tawh, Lazara a uih tawh ang i ti maw... a rei tawh min chhui chhuak tawh lo ang i ti maw... Hei hi hre rawh a la pangngai reng e.

A tawp ber atan sawi leh ang. Mihring darthlalang chu mihring bawk hi a nih avangin, Bible chuan thirin thir a ti hriam, chutiang bawkin mihringin a mihringpui a ti hriam a ti. Tuna ka awm dan leh ka rilru ang chiah hian, ka fapa awm ve rawh se, hna thawka mi chhawrtu hmuh loha ka zelthel ang chiah hian, ka hlawhfate pawh zelthel ve ṭhin rawh se tiin.

Miten tunge a ni min tih?

- azyuthanga