MODI-A'N RSS HO HNENAH PM A AN VAWRH CHUAN HINDUTVA A TIAM

"Hindutva tih hi Hindu sakhua inrelbawl dan leh Hindu sakhua inzirtir dan a ni tawh lovang a. Bharat (India) thu bul/ thurin bul/ chêt dân tur kaihruaitu atan Veda zirtirnate, hmanlai Hindu zirtirnate leh India Sakhaw lehkhabu in chiang taka a lo puanzar tawh angin- 'Thutak chu pakhat chauh a ni, mifing te chuan hming tam takin an lo ko thin, thil siam zawng zawng te hi chhungkhat vek kan ni  tih hi a ni tawh zawk ang'."

Tuna kan Prime Minister lo ni ta, Narendra Modi hian RSS ho hnenah PM candidate atan vawrh tura a intiam ṭum khan, hengho hi a intiam a, a intiamnaah hian a ding ngheta a tihlawhtling chho mek a nih hi. Narendra Modi intiamna hi mi nawlpuiin Modi kan hriat hma September, 2013 khan TV a chanchinthar puangtu lar tak pakhat Headlines Today, tuna India Today ni ta hian an lo sawi daih tawh a ni. Chung RSS hnena a thutiamte chu a hnuaia mi te hi an ni: 

1. Abrogation of Article 370

2. Ram Mandir sak

3. Uniform Civil Code

4. Bawng talh khap

Hindu ho hian Budhist, Sikh, Jain leh Parsi te hi Hindu peng pakhat (sect) angin an pawm a. Family Law hengho te nen hian an inṭawm vek. Muslim ho ten dan hrang (Shariat law) an nei a, Kristian te leh Tribal ten dan hrang kan nei ve bawk a. Uniform Civil Code hman a nih chuan rinna hrang leh hnam hrang hrangten dan hrang kan neihte hman a theih dawn tawh lova, dan inang vek hman a ṭul dawn a ni. Uniform Civil Code hi kristian leh Tribal-te tan a hlauh­awm khawp ang. All India Muslim Personal Law Board leh Christian Council te pawhin an do nasa khawp mai. 

Uniform Civil Code hi Times Now-ah an rawn puan khan tun kum maiah BJP-ten Parliament-ah pharha a taka hman ṭan an tum thu nikum khan an lo chhuah tawh bakah nikum November thla khan Union Home Minister Amit Shah chuan TV programme pakhat 'Republic Summit' ah an kawm ṭumin Uniform Civil Code chungchanga BJP ten an intiamnaah an la ding nghet a. BJP chu an manifesto tihlawhtling ṭhintu an nih angin a hun takah an rawn la hlen chhuak dawn tiin a sawi a ni. 

Tuna BJP sawrkarin Hin­dutva an dinna tur atana hman­rua anga ngaih, hnam leh sakhaw tlem zawkten kan do leh hlauh em em, Citizenship Amendment Act hi chu a hnawksak leh hlauhawm dan tur chungchangah Uniform  Civil Code lakah chuan aitechhinna ang chauh a ni. A chunga tarlan Narendra Modi intiamna chungchang khi September, 2013 daih tawh khan India Today chuan an lo chhuah tawh a, khi a thu tiamna ang khian India ram hi Hindu ram siamna tura Narendra Modi-i'n RSS ho hnena a lo intiamna chu a thleng dik ta zat zat a ni. 

Ram Mandir chung­changah hian Hindu ho ta Muslim lalten ro an rel laia an tih chhiatsak, chutah Muslim ho sakhaw hmun an sak hnan tih kha kan hriat dan a ni a, chu chu a dik a nih ngai chuan Hindu ho hian an tihtur tak an ti maiah a ngaih theih tiin mi tam tak chuan ngaihdan an siam mai awm e. Amaherawhchu, hetiang zawnga rilru an pek chuan a dik ti pawh an awm ngei ang. India ramah sakhaw lama minority zingah Muslim pawh an tih ngam tawh chuan keini hmanlaia khawvel ram hrang hranga hnamdang awp ṭhintu Kristian sawrkarte hmalakna leh thil tih tam tak bakah mi ram an awp hunlaia kan missionary te hmalakna RSS ten an huat tak zet tam tak a awm a, chuvangin hmanlai thil thleng avanga an duh dan anga phuba lakna ni awm anga ngaih theih turin leh tun hi chu Hindu lalber hun a ni tih rilru puin khang hunlai thil thleng siam ṭhat an tum zel chuan keini India rama minority, a bik takin keini Kristian te tan chuan a hrehawm khawp ang. 

India emaw khawi ram pawh ram hruaitu tan chuan hmanlai kan inhliam tawnnate inngaidam tawn a, theihnghilha tun dinhmun aṭangin ramin engnge hma­sawnna tur a mamawh ber leh ram inpumkhatna tur atana pawimawh ber kha ngaihtuah hun a ni zawk lo maw. Hetianga inṭhendarh zawnga chet hi ram tan a ṭha ber ang em? BJP hian sakhaw hmangin India a tikehdarh dawn a ang riau asin. Keini tan chuan a ṭha zawk daih tiin mi tam tak rilru-ah a awm thei, mah se heng BJP leh RSS chhulchhuakho hi chuan India ram hi kum za tam tak pawnlam mi sakhaw dang i.e., Muslim leh Kristian ho awpna avangin Hindu sakhua vuantute hi darhsarh taka awmin sakhaw dangte an vawn phah a. Hengho pawnlam miten min awp hma hmanlaia India ram awm dan anga lungrual taka sakhaw khat, Hindu sakhua vuana chumi sakhaw dan anga inawp leh hi an tum ber leh ngaihdan a ni. 

Sawi tawh angin keiniho pawh hi Hindu sakhaw vuan reng ṭhin sakhaw dang a chhan kan sawi tawhte avanga vuan chawp angah lek min ngai. Anni ngaihdanah chuan heng pawnlam sakhua laka min then thianghlim hi an tum dan a ni. Chuvangin, kan duh duha kan ṭhensan mai hi chu an phal loh hulhual hmel. Chuti chhapah heng mi te hian kan ramah hian mahni chauha kan awm hi an rem ti awzawng lovin a lang, CAB leh hmanraw dang dang pawh an hmang ang, chungte chu hmanrua a hmangin hnam dang leh sakhaw dang nen inchîm pawlha kan cheng ho tunlai thil thleng te aṭang hian an tum ber niin a lang ta. Kan ramah ngei hetiang a nih chuan independent chu sawi loh minority kan la ni mai ang. 

Aw le, kan sawi tawh ang khian Hindu lalna ram din tumtuten an thil tihah tumah dang theitu nei lo ang maiin chak takin tunlai hian hma an la mek a, chuvangin keini Mizo Kristiante hian Pathian rawn chungin huaisen takin Ama hnenah heng mite thil tih leh hmalaknate do let turin a hmanrua-ah inhlanin a ram leh hnam angin kan ram, kan hnam leh kan sakhaw himna turin kan lungrual a ngai a ni. 

- Lalhruaitluanga Bawitlung

Source- RSS: A View to the inside, Republic TV, Headlines Today, Times Now, BJP Website.