Ka zawhnate
Pu Editor, heng ka zawhnate hi a chhan leh a vang dik ta min hrilh theih chuan ka lawm hle ang.
1. Eng vangin nge kan tu kan fate an piana an hming kan phuah/ sak hian heti em ema sap ho hming in phuah/ sak tel kan chin tak viau le?
2. Mizote aia an lo changkan leh hma an lo sawn a, zirna thiamnaah an lo san hmasak bik em em vang hi a ni thei ang em?
3. Keini aia an ngo var piak puak vang hian kan awt deuh em ni zawk?
4. India ram state dang Nagaland, Tripura, Manipur etc te hian an tu leh fate hmingah hian sap ho hming hi an phuah tel ve chhen em?
5. Sap hming put tel hi, changkannaah kan ngai em ni?
6. Sap hmingin phuah tel tak fo mai hi, nakin zelah hun lo la kal zel tur atan kan Mizo hnam tan hian a la pawi thei viau mai lo’ng maw?
7. Sap hming in phuah tel kan ching ta viau mai hi kan Mizoṭawng humhalh zelna atana min tichhetu a la ni thei ang em?
8. Kan zoṭawng hum him zelna atan hian sap hming in phuah tel loh hram hi a ṭha dawn lo’n ni?
9. Engati nge sapho hming in phuah tel duh viau si, Vai hming hi kan in phuah tel ve duh miah loh? A rem ve tho lawm ni, entir nan Ali Ramzaua, Murmu Lalduhawma, Kanchhi Lalfakawmi, Didi Rosiami etc tih te pawh a rem ve tho awm sia!
10. An hang em mai, an ṭawng dan reng mai a ṭhing etc. kan tih vang em ni zawk?
11. Kan ṭawng humhalh zelna atan hian hnam dang hming in phuah/ sak tel hauh loh hi thil ṭha tak a ni dawn lo’n ni?
12. Mi ṭhenkhatin an hming an ziah hian, an hming bul hawrawp pakhat leh an hnam hming an ziah ṭhin hi enge a chhan? Entir nan- L Hmar, K. Tochhawng, B. Chhangte etc te a tam mai. Hetianga hming ziah hi enge a ṭhatna leh a ṭul bik riau na?
13. Hetianga hming ziak ṭhinte hi lo thi ta sela an thlan lungphunah L. Hmar, K. Tochhawng, B. Chhangte tia ziak tur a ni ang em? L hi a pian aṭanga a hming sak dan a nih ka ring lo. Chutiangin K tih ringawt te, B Chhangte tih ringawt te hi in tih van vauna lek a ni thei ang em? a chhan hriat a chakawm hle.
- Lallianzuala, Durtlang