Police nupuite motor tih kal zel
MS-a Ralte khan Mizorama Police Officer ṭhenkhatin motor pakhat aia tam an kawl thu, an nupuite pual anga kawl an awm dan kha a rawn ziak a, hei hi Mizoram Police Officer tuna mi te thiam loh lam ni loin, sorkar sum a harsat tak tak hma khan tun hma tawh khan police officer lian chin hi chuan motor hi pakhat aia tam hi an kawl hrim hrim a, hei hi tuna mite demna atan hmang mai lovin a kalphung zawk hi thlak zawk a ṭha lo maw? tiin rawtna ka rawn siam ve duh a, Police office ni mek te hian an Police Officer senior tih dan kha an rawn la chhang a, chu chu kalphungah an nei tawh a, tunah sorkar a retheih tawh si avangin tihtawp a ṭha ang.
MS-a Ralte thuziakah khan, "Public money hmanga lei government vehicle Police Officer ṭhenkhat in private ta ang maia an nupui leh fate pual anga an hmang hi chu ngaimawh a hun ta a ni," a tih hi a dik hle a ni. Police hian pawisa an nei tawh bik lova, Police Station tam takin motor pawh nei tawh lovin misual umzuina kawngah pawh tlan theih lohna an ngah chho a, pawisa an neih loh vangin motor indaih loh bakah petrol leh diesel man an nei tam loh vang a ni a, hetih lai hian Police Officer lian chuan motor pahnih an la nei a, an motor pakhat chu 'family car' angin an hmang a, sorkar driver leh sorkar petrol hmangin an fate sikul kal an hruai a, an feh a, an bazar a, nupuite leng an hruai a, in sakna hmanrua leina atana hmang tawk lah bo lo.
Thuziaktu hmasa MS-a Ralte khan, "Keia sawi duh na lam ki chu a dang leh daih a, Police Station tam takah hian motor an indaih lova, chu bakah misual hnu chhui tur pawhin Petrol an indaih loh avangin an tlan chhuak kim thei lo an la ti lehzel a, Police Station tam takah motor indaih lo, SP chin Officer lian zingah motor ṭha pahnih kawl, a ṭhen chu Bolero pahnih kawl tawp te, hman deuhva an lei Duster leh motor ṭha dang kawl kawpte hi an awm nual an tia, hei hi Home Secretary level emaw DGP lam aṭang hian emaw motor sem rual dan hi awm se, Officer va tihbuai hrim hrim lam ni lovin an nupuite hman tur a awm si chuan Police Station leh Out Post lama indaih lohnaah hian motor hi sem rual se Mizoram tan a ṭha dawn si a," tiin a rawn sawi a, hei hi 100% in ka thlawp a ni.
Kan ramah hian sorkar hian pawisa a nei lo tih chu kan pawm a, a pawisa neih sa a hmang thiam lo zawk hi siam rem a ngai a ni. DGP leh officer lian pahnih pathum lo hi chuan motor 2 hi kawl tawh lo se, sorkar officer kha an nih ve mai bakah public money hmanga motor lei a nih avang hian tualchhunga an awm chhung chu motor pakhat kawl se, an duh chuan zinna motor ṭha deuh hi pool-a hman theih awm se a ṭha mai lo maw? Kan kalphung hmasa kha a lo dik tawh lova, tun ah hi chuan petrol manah pawh sorkar a inkhap tawh a ni si a, motor 2 kawl khapna hi kan Home Minister hian chhuah se, Police Station lamah motor ṭha an mamawh hi officer lian kawl pakhat zawk hi la ta se motor 20 vel hi lei belh ngai lovin Police hian an nei sa niin a hre chiangte chuan min hrilh a ni.
- Lalthanmawia, Bawngkawn